Ezera 5 - Emakhuwa Bible

Opwahereriwa wa oteka

¹ Vano mprofeeti Hagai, ni musaserdoti* Zakariya, a ekhapira ya Ido, yaahaathalihera otthuna wa Muluku aYuda a oYuda ni oYerusaleemu mwa Nsina na Muluku a oYixrayeli aari mwa yaawosa.

² Vanonto Zerubabeli, mwaana mulopwana a Xeyaletiyeli ni Yexuwa, mwaana mulopwana a Yozadaki, yaapacera orasela Empa ya Muluku oYerusaleemu. Ni maprofeeti a Muluku yaari ni yaawo yaakhaviheraka.

³ Ehuhuweene yeele Tatenai, guvernadori a ilapo sa okhopela mooloko Efratesi ni Xetari-Bozenai vamoha ni asikhwaawe yaarowasa woowaakuveya waakoha: “Taani oolamulenleni orasela Empa ya Yave ela ni ixirisaya?”

⁴ Yaahaakohatho: “Antekaawo masinaaya taani?”

⁵ Vaheera maitho a Mulukwaaya yeera ewoonaka asitokweene a aYuda ni awosa khayaahiihiwe ovara muteko mpaka eeraawe arumiheliwe Dariyexi mutthenga ni yaakheliwe yoowaakhulaawe mwaheene yoowo.

⁶ Ti ela ekaratta Tatenai, guvernadori a ilapo sa okhopela mooloko Efratesi ni Xetari-Bozenai vamoha ni asinthamwenaaya yaari asitokweene a ilapo sa okhopela mooloko Efratesi yaamurumihenlaaya Dariyexi.

⁷ Ekaratta yaamurumihenlaaya ensoma ha: “Wa mwene Dariyexi: Salaama ni murettele.

⁸ Musuwele amwene weera hiyo naarowa elapo ya oYuda, wa Empa ya Muluku Mutokweene. Muloko wa weiwo onoorasela yeeyo ni maluku matokotoko ehelaka itthaabwa sitokotoko vaxirini. Muteko onnavariwa ni nthiti ni onneetta woowaakuveya.”

⁹ Vano naahaakoha asitokweenaaya: “Taani oolamulenleni oteka Empa ya Yave ela ni ixirisaya?”

¹⁰ Naahaakohatho masina a asitokweenaaya weera nilepe neerelaka wooleelani.

¹¹ Yoowaakhulaaya yaari ha: “Hiyo arumeiyi a Muluku a wiirimu ni vathi ni ninrasela Empa ya Muluku yaatekiwe khalayi – Empeene yeele mwenaahu mmoha mutokweene aatenkaawe ni aamalinghaawe.

¹² Vaheera yeenre makholowaahu yamunyoonyiha Muluku a wiirimu, Owo aawinnyerera mmatatani mwa Nebukadenezari, muKaldeya, mwene a oBabiloniya, mwa yoowo aaphwante Empa ya Yave, anatthuka muloko aronghaka oBabiloniya.

¹³ Wa soothesene, vayaakhani yoopacera moolamulani mwa Siru, mwene a oBabiloniya, mwene Siru aalamulela weera Empeene yeele ya Muluku yaraseliwe.

¹⁴ Mpaka aakhumiha mpaani mwa milukusawe oBabiloniya ikaruma sa eyuuma yoorikaxa ni sa eparatha* sa Empa ya Muluku, mwa seiye Nebukadenezari aakhumihalaawe Mpaani mwa Yave oYerusaleemu aronghaka mpaani mwa milukusawe oBabiloniya. Aamwinnyerera seiye mutthu oniitthaniwa Xexibazari, mwa yoowo aamukhalinghaawe ntoko guvernadori,

¹⁵ anamulamulela: ‘Mukuxe ikaruma iya, mwiikaathi Mpaani mwa Yave oYerusaleemu ni mwarasele Empa ya Muluku vaniproniwaya na khalayi.’

¹⁶ Hiiho Xexibazari ole aahoorwa, anateka mathipelo a Empa ya Muluku oYerusaleemu. Okhuma nihuku nenenenne mpaka olelo ennatekiwa, mene kheenaaye omalihiwa.”

¹⁷ Vano wooreerelani amwene, mulamule owehawehiwa munamalepelani a emwene a oBabiloniya weera moone vekhaikhai mwene Siru alamulela oraseliwa Empa ya Muluku oYerusaleemu. Ningweherera yoowaakhulaanyu wa mwaheene yoola.