Ezera 4 - Emakhuwa Bible

Wiittana wa otekiwa wa Empa ya Yave

¹ Amwiittana a aYuda ni aBenyamini yaasuwela weera anamatthukiwa aYixrayeli yeera emutekelaka Empa Yave, Muluku a aYixrayeli.

² Awosa yaarowa wuuluma ni Zerubabeli ni mapwattapwattha, enaweerela: “Munitthunihere wookhaviherani oteka, niwoko ntoko nyuwosa hiyotho nnimulapa Mulukwaanyu ni ninnampakela sooveleela okhuma ehuhuweene yeele ya Esarehadoni, mwene a wAsiriya, mwa yoowo oniruuhale nno.”

³ Vaheera Zerubabeli, Yexuwa ni mapwattapwattha akinaawo a aYixrayeli yaawaakhula: “Khamuntthuniheriwa nyuwosa orasela Empa ya Yave, Mulukwaahu. Hiyo paahi nneera nimutekele Yave, Muluku a aYixrayeli, ntoko Siru, mwene a oParesi aanilamulenlaawe.”

⁴ Vano miloko saarukureenre saaheerera ovololiha muloko wa oYuda soopopihaka weera ohipwaherere otekiwawaya.

⁵ Yaahaavaha makhwankwa anamalaka weera ehiihe muloko ni epupurumihe soovaanelasaya. Eyo yeereiye moolamulani wootheene wa Siru, mpakatho wa Dariyexi, mwene a oParesi.

⁶ Ompacereroni wa olamula wa Xerxexi yaalepa ekaratta yoowoothera atthu a oYuda ni oYerusaleemu.

⁷ Vanonto mmahukuni a Artaxaxete, mwene a oParesi, Bixelami, Mitredati ni Tabeheli vamoha ni asikhwaawe akinaawo yaamulepela ekaratta Artaxaxete. Ekaratteene yeele yaalempwale munuulumoni na Eramewu ni mootaaya woolepa.

⁸ Rehumi, mutokweene a anakhotto ni Ximexai, namalepa, yaamulepela ekaratta mwene Artaxaxete yootheraka oYerusaleemu moota ola:

⁹ Rehumi, mutokweene a anakhotto ni Ximexai, namalepa, vamoha ni asikhwaaya ootheene – aphuki, asitokweene a atthu a oTripolisi, elapo ya oParesi, wEreki ni oBabiloniya, awElami a oSusa

¹⁰ ni miloko sikina, mutokweene Axurbanipali oothaamiha anatekiha musidadeni mwa oSamariya ni ilapo sikina mweelaponi okhopela mooloko Efratesi.

¹¹ Ekaratta yaamulepenlaaya ti ela: “Wa mwene Artaxaxete, eyo ekaratta ya arumeiyaanyu a okhopela mooloko Efratesi:

¹² Nnooleelani amwene weera aYuda arwiiye wa hiyo wa mpattaanyu yaarowa oYerusaleemu ni vano anrasela esidadeene yeeyo yoovaanya ni yoonanara. Awosa anrasela ixiri epakaka mathipelowaaya.

¹³ Ohiya toko yeeyo, amwene ontthuneya osuwela weera esidade eyo yatekiwa ni ixirisaya sarehereriwa, awosa kheerwatho ekhumiha mucaango, naari oliva musoko hoye hoye soolivela. Hiiho onoovukuwa muhakhu wa emwene.

¹⁴ Vano, neenre hiyo nikhalaka arumeiyi a empa ya emwene ni ohireeraka woona mwene ahittittimihiwaka, hiyo ninlepa ekaratta ela weera amwene musuwele itthusene seiya.

¹⁵ Ninlepa weera waasaasiwe munamalepelani mwa makholowaanyu. Mwemmo amwene munimoonelela weera esidade eyo ti ya ettiyamaaru, yoosareya makacamiho wa mamwene ni ilapo sikina. Nri nipuro noovaanya okhuma khalayi. Ti niwoko na yeeyo esidade eyo yaaphwatingwaaya.

¹⁶ Nnooleelani amwene weera esidade eyo yatekiwa ni ixirisaya sarehereriwa, kheewo eniihale wa nyuwo okhopela mooloko Efratesi.”

¹⁷ Mwene aawaakhula ha: “Wa Rehumi, mutokweene a anakhotto ni Ximexai, namalepa, vamoha ni asikhwaaya ootheene ankhala oSamariya ni mweelaponi sikina okhopela mooloko Efratesi: Isalaama sa murettele.

¹⁸ Ekaratta munirumihenlaanyu yoosommwa ni yootaphuleliwa vamaithoniwaka.

¹⁹ Koolamulela ni arumeiyaaka aahaasaasa enoonelela weera esidadeene yeeyo yookhalano mwaha woorakama ngwaavaanyani mamwene ni weera naari nipuro na ovaanya ni ovaanelela.

²⁰ oYerusaleemu waakhalano mamwene a ikuruxa yaalamula ilapo sootheene sa okhopela mooloko Efratesi ni yaaliviwa misoko, mucaango ni soolivela.

²¹ Vano mwaalamulele atthweene yaawo ohiya mutekwaaya weera esidade eyo ehiraseliwe mpaka kineeraaka kilamulele.

²² Mwiipasoope weera sootheene iya sikwanihereye vanneneni. Nkintthuna weera sooreera sa emwene sikacamiheye.”

²³ Esommwakaru ekaratta ya mwene Artaxaxete wa Rehumi ni Ximexai, namalepa ni asikhwaaya, yaarowa woowaakuveya wa aYuda oYerusaleemu yaanyesererihaka ohiya mutekwaaya.

²⁴ Hiiho muteko wa oraseliwa wa Empa ya Muluku oYerusaleemu waahiyereriwa mpaka eyaakha yanaaveeli ya olamula wa Dariyexi, mwene a oParesi.