Ezekiyeli 8 - Emakhuwa Bible

Etthu ya mwiikho Mpaani mwa Muluku

¹ Vanihukuni nanaathanu na mweeri wanaathannamosa wa eyaakha yanaathannamosa ya oronghiwa wootthukiwani, miyo vamoha ni asitokweene a oYuda nikilaathiyeene vaatewaka, ntata na Yave onlamula sootheene naakirweela.

² Kaaweha, kinoona ekhalelo ntoko ya mutthu. Wookhuma muyuununi woorowa vathi owo aalikana ni mooro, ni woorowa osulu, ekhalelowaawe yaari yoowaaraxa ntoko eyuuma yoocapeya.

³ Owo aahookola etthu yaalikana ni moono, anakivara mayihi. Munepa waakittukhulela eriyari ya etthaya ni erimu. Munyooneloni sa Muluku, Owo aakirongha oYerusaleemu, mpaka vamulako wa mpatta wa ottuttuwani wa nipuwa na mpuwa, mwa mwemmo yiikaathiwaayamo ecaambulo entannyera ehace ya Muluku.

⁴ Iwe waakhala ohoolowaka ovuwa wa Muluku a oYixrayeli, ntoko moonelo koonnaaka munghawalawani.

⁵ Vano Owo aakeerela: “Mwaana a mutthu, ngwehe mpatta wa ottuttuwani.” Miyo kaaweha, kinoona mpatta wa ottuttuwani, muxerexere wa mulako vakhiviru wa altaari* ecaambulo entannya ehace ya Muluku.

⁶ Owo aakeerela: “Mwaana a mutthu, nyuwo munnoona yeeyo ampakaaya? Soopaka sa mwiikho sa muloko wa oYixrayeli, itthu sineera sikirakamelihere Nipuronaka Nootteela? Vaheera nyuwo mmoone soopaka soonanaraxa opwaha seiya.”

⁷ Woottharelana aakirongha vamulako wa nipuwa. Kaaweha, kinoona nlaka vaxirini.

⁸ Owo aakeerela: “Mwaana a mutthu, muthipe vaxirini.” Miyo kaathipa exiri, kinoona mulako woowiipithiheya.

⁹ Owo aakeerelatho: “Mvolowe ni moone itthu soohiira ni sa mwiikho ampakaayawo.”

¹⁰ Miyo kaavolowa, kinaweha mmwe muxirini moothemwene saacaambuliwa ikhalelo soopattuxiwa soowiipurula soohiyanahiyana ni axinama oohiira ni icaambulo sootheene sa muloko wa oYixrayeli.

¹¹ Ohoolo wa seiyo yaakhala asitokweene miloko mithannamiili a muloko wa aYixrayeli ni Yaazaniya, mwaana mulopwana a Xafani, aari eriyaraayasa. Khula mutthu a yaawosa aarino enghiseriwa erubani* mmatatanimwawe, ni naakhumelelamo nihutte noowunkhelaxa.

¹² Vano Yave aakeerela: “Mwaana a nutthu, nyuwo mohoona yeeyo asitokweene a oYixrayeli ampakaaya mpiphini, khula mutthu vanipuroniwawe noolapa ecaambulowaawe yoopatthiwa? Awosa aneera: ‘Yave khannoona; Owo oothaama mulaponi.’”

¹³ Yave aaheeratho: “Nyuwo munoowoona epakaka itthu sootepaxa ohiira.”

¹⁴ Vano Owo aakirongha vamulako wa mpatta wa ottuttuwani wa Empa ya Yave. Iwe, kaawoona asithiyana ekilaathiyeene emwiinlelaka Tamuzi.

¹⁵ Owo aakeerela: “Mwaana a mutthu, nyuwo munnoona yeeyo? munimoonatho miteko soohiiraxatho opwaha seiya.”

¹⁶ Vano owo aakirongha vanipuwani na mpuwa na Mpaani mwa Yave, ni mmwe vamulako wa Empa ya Yave, eriyari ya nipithela* ni altaari*, yaakhala asilopwana miloko miili naathanu. Awo, erenreene ettuli Empa ya Yave ni ewengheene mpatta ninkhuma nsuwa yaakokhorela onsuwani.

¹⁷ Owo aakeerela: “Mwaana a mutthu, nyuwo mohoona yeeyo? Weeraka miteko soohiira iya khavetthwaayawo muloko wa oYuda? Onootthuneyatho osariha nipuhero mulaponi ni opwaherera okitannyera isara? Moone! Awosa aniikaathi ephandi muxerexere ephula!

¹⁸ Tivawo kineeraaka kiwoonihere isara; nkaaweha ni ikharari hata nkiwuurelaru. Naari ekikhuwelelaka, nkiwiiwa.”