Ezekiyeli 7 - Emakhuwa Bible

Erisa yookhuveela

¹ Yave aahuuluma ni miyo moota ola:

² “Mwaana a mutthu, Yave onlamula sootheene oneerela ha muloko wa oYixrayeli: ‘Woophiya ommaleloni! Woophiya ommaleloni wa mattuumba maxexe a elapo ya oYixrayeli.

³ Vano ommaleloni ori mwa nyuwo, ni Miyo kinimooyeeherani isarasaka. Kinimoottaruxani kittharihaka mweettelowaanyu, ni kinimootthuvelelani soopakasanyu soohiira.

⁴ Nkoowehani ni ikharari hata nkiwuurelani; vekhaikhai Miyo kinimootthuvelelani mweettelowaanyu ni soopakiwa soohiira eriyaraanyu. Hiiho, nyuwo munoosuwela weera Miyo ti Yave.’

⁵ Yave onlamula sootheene oneera ha: ‘Moone erisa! Erisa mwa yeeyo ehitonko wuupuweleliwa enimoowa.

⁶ Woophiya ommaleloni! Woophiya ommaleloni! Owo onimoorukunuwelani. Woophiya!

⁷ Nthorihelo nohoophiyerelani nyuwo munkhala mulaponi. Yoophiyera ehuhu, nihuku nookhuveela; wookhala orukureereya muru ohikhanle ohakalala mmanyaakoni.

⁸ Kihanle vakhaani wooyeeherani isarasaka ni okwanihera woonyoonyeriwaniwaka. Miyo kinimoothorihani kittharihaka mweettelowaanyu ni kinimootthuvelani kittharihaka soopakasanyu soohiira sootheene.

⁹ Nkoowehani ni ikharari hata nkiwuurelani; Miyo kinimootthuvelani kittharihaka mweettelowaanyu ni soopakasanyu soohiira sootheene siri eriyaraanyu. Hiiho, nyuwo munoosuwela weera ti Miyo, Yave, kinoomanani.

¹⁰ Moone nihuku! Noophiya! Nthorihelo nohoonihereya, ekopo yoophuwa, wiixoona woottuva.

¹¹ Nipuhero noothatuwa ntoko ekopo weera nittaruxe yoonanara; khawoworu a muloko anaahale, aani khawoworu a nakupa ole – mihakhu ni epilaaya soothesene sinoovenxiwa.

¹² Yoophiya ehuhu, noophiyera nihuku. Namathuma ahitthape hata namathumiha ahithanane, niwoko isarasaka soosareela munakupani moothemwene.

¹³ Naari namathuma ni namathumiha ehalaka ni okumi, namathumiha khoopola ettima othumihalaawe, niwoko moonelo mwaha wa nakupa ootheene khahokoleela ottuli. Khoowoworu oniwuureliwe niwoko na sootakhalasaya.

¹⁴ Naari yiipaka mapalapatta, ni erehereraka sootheene soolikanasene, khawoworu anaarowe okhottoni, niwoko isarasaka soommorela nakupa ootheene.

¹⁵ Ekatana eri vaate, nihooxo ni etala siri mpuwa; yoowo anaakhale ntuphini, aniiviwe ni ekatana, ni yoowo anaakhale musidade, anaakhwe etala ni nihooxo.

¹⁶ Ootheene eneera ehale ni eneera yoopowe, anookhala mmanyaakoni yiipulelaka ntoko ikhunda sireene mmareyareyani, khula mutthu niwoko na yootakhalaawe.

¹⁷ Matata ootheene kheelipalipa, ni makutha ootheene anookocakoca ekhalaka oohilipa ntoko maahi.

¹⁸ Awosa eniyiikhuneele ikuwo soolalamikano ni eniiwarele ikuwo sootteengula. Ikhovesaya sinimuulihiheyaxa muru, ni mayihaaya eniimetthiwe.

¹⁹ Eparathaaya* anoovonyera mmiseweni ni eyuumaaya yoorikaxa eniyooneliwe okhala yoohitteela. Eparathaaya* ni eyuumaaya yoorikaxa khasiwera waatapuxa vanihukuni na isara sa Yave. Ovoliwawaya khawaamalela hata kheevona niwoko iyo saahaakwattuliha mootakhalani.

²⁰ Awosa yaahakalalela axiveevaaya ooreera, ni yaavarela muteko woopakela milukusaya soohiira ni icaambulosaya sa mwiikho. Tivawo kineeraaka kaatatuxere itthu iyo soohitteelasaya.

²¹ Sootheene iyo kinimwinnyerera mmatatani mwa anamarwa ntoko soohuhuliwa ni mmatatani mwa atakhali a mulaponi ntoko soowiiyiwa, ni awosa anoovaliha iyo.

²² Kinimwaahuluwasa, ni awosa anoohiiriha Nipuronaka noosiveleyaxa; anamwiiya eniivolowe ni eniihiirihe.

²³ Mureherere onyooro niwoko elapo yoosareya ephome yooyeehiwa, ni esidade yoosareya nipuhero.

²⁴ Kinimwaaruuha atthu ootepaxa otakhala a mmilokoni weera ekuxase impasaya; kinoomaliha wiixoona wa aweri ni mapurowaaya ootteela anoohiirihiwa.

²⁵ Waaphiyaka otteenguwa, awosa animwaasa murettele, mene kheephwanya.

²⁶ Eviraleene erisa, enimoorwa erisa ekinatho, ni oviraleene woopiha, onimoorwa woopiha okinatho. Eniyeerere waasaasa moonelo wa mpatta wa mprofeeti, ni nihusiho na nlamulo mwa asaserdoti* nnooriheya, mpakatho olaka wa asitokweene.

²⁷ Mwene aniikhupanyere, mwaana mulopwana a mwene anaawarele ikuwo sa olalamika, ni matata a muloko wa mulaponi eniithukumele. Kinimwaapakelasa yeeyo mweettelowaaya omphwanelaaya, ni kinimwaathoriha kittharihaka moota wa okhalawaya. Hiiho eniisuwele weera Miyo ti Yave.’ ”