Ezekiyeli 48 - Emakhuwa Bible

Ittima sa ipuumba

¹ “Ipuumba sintthariheliwa masinaaya ti iya: Mmwiinanoni wa mpatta wa ottuttuwani, aDani ekhalaneke ettima emoha; mwiinano otthariheke musewe wa oHeteloni mpaka oLebo-Hamati; oHazari-Henani ni mwiinano wa mpatta wa ottuttuwani wa oDamasku, waattamela oHamate sipakele mpatta nyiinanosaya okhuma mpatta ninkhuma nsuwa mpaka mpatta ninkela nsuwa.

² awAxeri ekhalaneke ettima emoha; eyo evireke mmwiinanoni mwa elapo ya Dani, okhuma mpatta ninkhuma nsuwa mpaka ninkela nsuwa.

³ aNafitali, ekhalaneke ettima emoha; eyo evireke mmwiinanoni mwa ettima ya awAxeri, okhuma mpatta ninkhuma nsuwa mpaka ninkela nsuwa.

⁴ aManaxe ekhalaneke ettima emoha; eyo evireke mmwiinanoni mwa elapo ya aNafitali, okhuma mpatta ninkhuma nsuwa mpaka ninkela nsuwa.

⁵ awEfrayimi ekhalaneke ettima emoha; eyo evireke mmwiinanoni mwa elapo ya aManaxe, okhuma mpatta ninkhuma nsuwa mpaka ninkela nsuwa.

⁶ aRubeni ekhalaneke ettima emoha; eyo evireke mmwiinanoni mwa ettima ya awEfrayimi, okhuma mpatta ninkhuma nsuwa mpaka ninkela nsuwa.

⁷ aYuda akhalaneke ettima emoha; eyo evireke mmwiinanoni mwa ettima ya aRubeni, okhuma mpatta ninkhuma nsuwa mpaka ninkela nsuwa.

⁸ Ettima nyuwosa muneeraanyu moonihere ntoko yoovaha yootteelihiwa, evireke mmwiinanoni mwa elapo ya aYuda, okhuma mpatta ninkhuma nsuwa mpaka mpatta ninkela nsuwa. Eyo ekhalaneke ikilomeetru* muloko ni tthaaru ya mweekhuveelonimwaya, ni mweerakamelonimwaya okhuma mpatta ninkhuma nsuwa mpaka ninkela nsuwa olikaneke ni wunnuwa wa khula ettima ya ipuumba iyo; Nipuro Nootteela* nikhaleke eriyari ya seiyo.

⁹ Ettima yootteelihiwa nyuwosa muneeraanyu mumveleeleleke Yave, ekhalaneke ikilomeetru* muloko ni tthaaru sa mweerakamelonimwaya, ni ikilomeetru* ithanu sa mweekhuveelonimwaya.

¹⁰ Ti yeela eneera ekhale ettima yootteeliheriwa asaserdoti*. Eyo ekhalaneke ikilomeetru* muloko ni tthaaru sa mweerakamelonimwaya mpatta wa ottuttuwani, ikilomeetru* ithanu sa mweekhuveelonimwaya wa mpatta ninkela nsuwa, ikilomeetru* ithanu sa mweekhuveelonimwaya wa mpatta ninkhuma nsuwa, ni ikilomeetru* muloko ni tthaaru sa mweerakamelonimwaya wa mpatta wa ohitto. Eriyaraaya, nikhaleke Nipuro Nootteela* na Yave.

¹¹ Ettima eyo ekhaleke ya asaserdoti* ootteelihiwa, eyo tiiyo, ekhapira ya Zadoki, mwa yaawo yaaroromeleiye wookirumeela, ni yahaahapungwe ntoko yaapankaaya aLeevi ehapungweene aYixrayeli.

¹² Enookhala yoovaha yootteela wa yaawosa, ettima yootteelaxa, eviraka mmwiinanoni mwa elapo ya aLeevi.

¹³ Elapo yootheene ya aLeevi, ekhalaneke ettima ya ikilomeetru* muloko ni tthaaru sa mweerakamelonimwaya, ni ikilomeetru* ithanu sa mweekhuveelonimwaya. Orakamawaya wootheene, okhalaneke ikilomeetru* muloko ni tthaaru ni mweekhuveelonimwaya, ikilomeetru* ithanu.

¹⁴ Awosa ehithumiheke, hata ehaakakhanyiheke ni etthu ekina ya yeeyo. Ettima ela ti yooreerela ya elapo yootheene, ni ahivahiweru mutthu mukina, niwoko ti yootteela wa Yave.

¹⁵ Ettima enghaleeyo, ikilomeetru* piili ni eriyari ya ekilomeetru* emoha sa mweekhuveelonimwaya, ni ikilomeetru* muloko ni tthaaru sa mweerakamelonimwaya evareliweke muteko esidade yootheene wa oteka impa ni ociha mihuwo. Esidade ekhaleke eriyaraaya

¹⁶ ni ekhalaneke miringo iya: Mpatta wa ottuttuwani, imeetru* macira miloko miili ni macira mararu; mpatta wa ohitto, imeetru* macira miloko miili ni macira mararu; mpatta ninkhuma nsuwa, imeetru* macira miloko miili ni macira mararu; ni mpatta ninkela nsuwa, imeetru* macira miloko miili ni macira mararu.

¹⁷ Mpatta wa ottuttuwani, esidade ekhalaneke ettima yoohikhala etthu ya imeetru* ncira ni miloko miili niithanu, mpatta wa ohitto imeetru* ncira ni miloko miili niithanu, mpatta ninkhuma nsuwa imeetru* ncira ni miloko miili niithanu ni mpatta ninkela nsuwa imeetru* ncira ni miloko miili niithanu. Eyo evareliweke muteko woociha mihuwo.

¹⁸ Ettima enghaleeyo, empakelana mwiinano ni ettima yootteelihiwa yootheene, ekhalaneke ikilomeetru* ithanu mpatta ninkhuma nsuwa ni ikilomeetru* ithanu wa mpatta ninkela nsuwa. Soohephasaya sikhaleke yooca ya anamiteko a musidade.

¹⁹ Anamiteko a ipuumba sootheene sa musidadeni anoolimamo.

²⁰ Ettima yootheene vamoha ni esidade, elikaneleke mipatta sootheene sinkhala ikilomeetru* muloko ni tthaaru wa khula mpatta. Eyo ti yoovaha yootteelihiwa, mwa yeeyo nyuwosa muneeraanyu muurele.

²¹ Ilapo sineera sihale mmipattani soomiili sa ettima siri vattimani yootteeliheriwa ni wa esidade sikhaleke sa mwaana a mwene. Iyo sirooke okhuma ikilomeetru* muloko ni tthaaru sa ettima yootteelihiwa mpaka omwiinanoni wa ninkhuma nsuwa ni okhuma ikilomeetru* muloko ni tthaaru sa esidadee mpaka mmwiinanoni mwa ninkela nsuwa. Ittima piili iyo, soolikanela mweerakameloni wa ittima sa ipuumba, sikhaleke sa mwaana a mwene, ni ettima yootteelihiwa vamoha ni Nipuro Nootteela* na Empa ya Muluku, sikhaleke eriyaraaya.

²² Hiiho, ettima ya aLeevi ni ya esidade sikhaleke eriyari ya ettima eri ya mwaana a mwene. Ettima ya mwaana a mwene ekhaleke eriyari ya mwiinano wa aYuda ni wa aBenyamini.

²³ Mwaha wa ipuumba sikina iyo: aBenyamini anookhalano ettima emoha; eyo ekhumeke mpatta ninkhuma nsuwa wookela mpatta ninkela nsuwa.

²⁴ aSimeyoni ekhalaneke ettima emoha; eyo evireke mmwiinanoni mwa elapo ya aBenyamini, okhuma mpatta ninkhuma nsuwa mpaka ninkela nsuwa.

²⁵ awIsakari ekhalaneke ettima emoha; eyo evireke mmwiinanoni mwa elapo ya aSimeyoni, okhuma mpatta ninkhuma nsuwa mpaka ninkela nsuwa.

²⁶ aZebulomi ekhalaneke ettima emoha; eyo evireke mmwiinanoni mwa elapo ya awIsakari, okhuma mpatta ninkhuma nsuwa mpaka ninkela nsuwa.

²⁷ aGadi ekhalaneke ettima emoha; eyo evireke mmwiinanoni mwa elapo ya aZebuloni, okhuma mpatta ninkhuma nsuwa mpaka ninkela nsuwa.

²⁸ Mwiinano wa mpatta wa ohitto wa aGadi okhumeke oTamar, mpatta wa ohitto mpaka maahi a oMeriba-Kadexi, vahoolowaya, ovireke onxaapwani na wExipitu mpaka ephareiya etokweene.

²⁹ Ela ti elapo muneeraanyu mukawele ipuumba sa aYixrayeli ntoko yoohiyeriwa, ni iyo sinookhala ittimasanyu,” onghima Yave onlamula sootheene.

³⁰ “Milako sa musidade ti iya: Vaxirini wa mpatta wa ottuttuwani orino imeetru* 2 300 mweerakamelonimwaya,

³¹ milako sa esidade sitteheriweke masina a ipuumba sa aYixrayeli. Milako miraru sa mpatta wa ottuttuwani sikhaleke milako sa Rubeni, Yuda ni Leevi.

³² Vaxirini wa mpatta ninkhuma nsuwa, orino imeetru* 2 300 mweerakamelonimwaya, sikhaleke milako miraru – sa Yoseefe, Benyamini ni sa Dani.

³³ Vaxirini wa mpatta wa ohitto orino imeetru* 2 300 mweerakamelonimwaya, okhalaneke milako miraru: mulako wa Simeyoni, wa Isakari ni wa Zebulomi.

³⁴ Vaxirini wa mpatta wa ottuttuwani orino imeetru* 2 300 mweerakamelonimwaya, okhalaneke milako miraru: mulako wa Gadi, wa Axeri ni wa Nafitali.

³⁵ Othanuwa wa mukhwipimwaya moothemwene okhalaneke ikilomeetru* ithanniixexe ni eriyari ya ekilomeetru* emoha. Okhuma ehuhuweene yeeyo woorowa ohoolo, esidade yiitthaniweke: ‘Yave ori vaava.’ ”