Ezekiyeli 42 - Emakhuwa Bible

Ikwaartu sootteela ni exiri ya omokoni

¹ Vahoolowaya mulopwana ole aakirongha mpatta wa ottuttuwani, mpaka nipuwa na omokoni, anakivolongha mmakwaartuni saawehanne nipuwa na Empa ya Muluku ni exiri ya omokoni wa mpatta wa ottuttuwani.

² Impa soothataanyerana mwa seiyo mulakwaaya waawenghe mpatta wa ottuttuwani, mweerakamelonimwaya waarino imeetru* miloko mithanu ni imeetru* tthaaru ni mweekhuveelonimwaya waarino imeetru* miloko miili niithannamosa.

³ Mpatta mmoha wa ikwaartu waarakamelana imeetru* muloko okhuma nipuwa na mpuwa mpaka mpatta mukina wa soonyikalela sa nipuwa na omokoni, waatekeleliwamo ohoolo wa impa tthaaru soothataanyerana.

⁴ Ohoolo wa ikwaartu waakhala woovira wa mpuwa waarino imeetru* ithanu mweekhuveeloni, ni mweerakamelonimwaya imeetru* miloko mithanu ni imeetru* tthaaru. Milakosaya saawenghe mpatta wa ottuttuwani.

⁵ Vano, ikwaartu sa osulu saaphureyaxa, niwoko mootekeleliwamwaya, waathanuwaxa opwaha ikwartu sa empa ekhaani ni ya eriyari.

⁶ Ikwartu sa empa yanaararu khasaarino amarimbu ntoko yaaraayano mapuwa. Tivawo, soonyikalelasaya saaraaya ikhaanene opwaha sa ikwartu sa empa ekhaanene ni ya eriyari.

⁷ Yaakhala exiri ya omokoni yeereranne ni ikwartu ni nipuwa na omokoni; mweerakamelonimwaya waarino imeetru* miloko miili niithannamosa, ohoolo wa ikwaartu.

⁸ Musera wa ikwaartu muxerexere ni nipuwa na mpuwa, mweerakamelonimwaya waarino imeetru* miloko miili niithannamosa, ni yoowo waakhuveenle Nipuro Nootteela*, mweerakamelonimwaya waarino imeetru* miloko mithanu ni imeetru* tthaaru.

⁹ Ikwaartu sa vathi vathi, saarino mulako mpatta ninkhuma nsuwa, nooneyaayawo nipuwa na omokoni.

¹⁰ Mpatta wa ohitto, exiri yootheeneeyo ya nipuwa na omokoni, wooluluwana nipuwa na Empa ya Muluku, ni mpatta waawehanaaya ni exiri ya omokoni, saakhala ikwaartu

¹¹ waaviriwaaya ohoolowaya. Saari ntoko ikwaartu sa mpatta wa ottuttuwani; saamulikanela mweerakameloni ni mweekhuveeloni, moovoleela ni munnuwelowaaya. Milako sa mpatta wa ottuttuwani

¹² saamulikana ni milako sa ikwaartu sa mpatta wa ohitto. Waakhala mulako ompacereroni wa waavoleeliwa weereranne ni exiri yaaweha mpatta ninkhuma nsuwa, mwa yoowo waavoleeliwa.

¹³ Vahoolowaya, mulopwana ole aakeerela: “Ikwaartu sa mpatta wa ottuttuwani ni ohitto singwehana onipuwani na Empa ya Muluku ti ikwaartu mwa seiyo asaserdoti* ammwaattamela Yave ancaayawo sooveleela sootteelaxa. Weiwo awosa anthokorora sooveleela sootteelaxa –sooveleela sa irooro, sa soottheka ni sa nthowa, niwoko nipuro nno ti nootteela.

¹⁴ Hiiho, asaserdoti* yaavolowaka mmapuroni ootteela, erooke paahi onipuwani na omokoni erunleene soowara amvaranaaya muteko, niwoko iyo ti sootteela. Ewareke soowara sikina ehinaaye okhuveela mapuro ohiyeriwaaya muloko.”

¹⁵ Mulopwana ole amalihaleene oringa seiyo saari Mpaani mwa Muluku, aakikhumihera vaate, akivirihaka vamulako wa mpatta ninkhuma nsuwa, anaringa mukhwipimwaya moothemwene.

¹⁶ Aaringa mpatta ninkhuma nsuwa ni ekopo yooringano; waarino imeetru* macira meeli ni miloko mithannamosa.

¹⁷ Aaringa mpatta wa ottuttuwani; waarino imeetru* macira meeli ni miloko mithannamosa, attharihaka ekopo yooringano.

¹⁸ Aaringa mpatta wa ohitto; waarino imeetru* macira meeli ni miloko mithannamosa, attharihaka ekopo yooringano.

¹⁹ Vahoolowaya aarowa mpatta ninkhuma nsuwa, anaringa; waarino imeetru* macira meeli ni miloko mithannamosa, attharihaka ekopo yooringano.

²⁰ Hiiho, owo aaringa ettima ya mipatta soomixexe. Mukhwipimwaya, yaakhala exiri yaarino imeetru* macira meeli ni miloko mithannamosa mweerakamalonimwaya mpakatho mweekhuveelonimwaya, amwalamwalihaka Nipuro Nootteela* ni piswa.