Ezekiyeli 38 - Emakhuwa Bible

Ovolowa wa oGogi

¹ Yave aahuuluma ni miyo, eeraka:

² “Mwaana a mutthu, muhuluwele wa Gogi, a elapo ya oMagoge, mutokweenexa a oMeseke ni a oTubali; munthaliherele otthuna wa Muluku

³ ni mweere weera Yave onlamula sootheene, oneera ha: Ii! Gogi, mutokweenexa a oMeseki ni oTubali, koowiittani.

⁴ Kinimoorukureerihani, kinoohoma ni nimeso ettwattwaraanyu, kookhumihekeni vamoha ni anakhottwaanyu ootheene – ikavalusanyu*, ni anamweettihaaya vamoha ni ikapwitthisaya ni nakupa mutokotoko akuxaleene ixikudu* itokweene ni ikhaani, ootheene awo evukhulaka ikatanasaya.

⁵ aPersiya, aKuxe ni aLibiya eniikhalase ni yaawo – ootheene awo ekuxaleene ixikudu* ni ikapaseti.

⁶ Anakhotto a ilapo sa oGomeri ni oBeti – Togarema, muxerexere wa mpatta wa ottuttuwani, waahiya asilopwana ancipale a ilapo sikina.

⁷ Mwiireherere; mukhale oolikaneene, nyuwo ni nakupa ootheene oorukureenreni, ni mukhale muhoolelaaya.

⁸ Eviraleene mahuku mancipale kimmoolamulelani weera mwavoleele elapo ohokoloxeriwaayawo muloko okhumaka okhottoni. Vano muloko ole waathukumanyiwa ni miloko sincipale mmanyaakoni sa oYixrayeli, saathaamiwe wa ehuhu yincipale. Vaheera ootheene yaawosa anookhalawo oolipeene, evenxiweene eriyari ya miloko.

⁹ Nyuwo, anakhottwaanyu ootheene ni miloko sincipale siri ni nyuwo, munoorowa, mweettaka ntoko ettheku; nyuwo mmwikhale ntoko nihutte nikuttelelaka elapo.

¹⁰ Yave onlamula sootheene oneera ha: Nihuku nno, munookhalano soowuupuwela mmurumwanyu, mukhalaneke yoovaanela yootakhala.

¹¹ Nyuwo mmweere: ‘Kinoovoleela elapo ya mittetthe soohilipa; kinoowanano muloko wa murettele ni ohinghovelaru etthu, mwa weiwo onkhalaayawo musidadeni soohitekeleliwa, soohikhalano masele ni anampattika.

¹² Kinoohuhula, kikuxeke, ni kinootheteela ntatanaka mathala araseliwe nitho muloko othukumanne eriyari ya ilapo, mwa yoowo okhalananxe mihuwo ni mihakhu sincipale, okhalaka eriyari ya elapo.’

¹³ Xeba, Dedani ni ananakoso a oTaresisi vamoha ni amakaaya ootheene anooweerelani: ‘Nyuwo murweenle okuxa soohuhula? Munthukumanenle nakupa ola weera munghuhule, murowanaka eparatha* ni eyuuma yoorikaxa, mukuxaka muhuwo ni sooreela ni mwaakamelaka sooreela sincipale?’

¹⁴ Tivawo mwaana a mutthu, munthalihere otthunawaka ni mmweerele Gogi: ‘Yave onlamula sootheene oneera ha: Nihuku nno, mulokwaaka aYixrayeli waakhalaka woolipeene, weeraka nyuwo khamoona yeeyo?

¹⁵ Nyuwo munoorweela vanipuroniwanyu, mmwiinanoni wa ottuttuwani, muhooliwaka ni miloko sincipale, ootheene awo ewenleene ikavalu*, aani, nakupa mutokotoko ni anakhotto oowaattaxa.

¹⁶ Nyuwo mmwaathataanele aYixrayeli, mulokwaaka, ntoko nihutte ninkhuneela elapo. Ii! Gogi, mmahukuni a muhoolo, kinimooruuhani weera ngwaneno elapwaaka, weera miloko sikisuwele Miyo kiixooniheraka ootteeleene mwa nyuwo vamaithoniwaya.

¹⁷ Yave onlamula sootheene, oneera ha: ‘Weeraka nyuwo khamuhiyono yoole kaamuhimaaka mmahukuni avinre, mwa arumeiyaaka, maprofeeti a oYixrayeli? Ehuhuweene yeele, awosa yaathalihera otthuna wa Muluku iyaakha sincipale weera Miyo kaamooruuhani weera mwaawaneno aYixrayeli.

¹⁸ Yeeyo eniikhumelele nihuku nno, ti ela: Gogi aawananaka aYixrayeli, onyoonyiwawaka onootannyeya, onghima Yave onlamula sootheene.

¹⁹ Kinghima muhacenimwaka ni moonyoonyiwanimwaka, weera ehuhuweene yeeyo onookhala otetereya otokotoko mulaponi mwa oYixrayeli.

²⁰ Ihopa sa mphareiya, ipalame sa wiirimu, axinama a ntuphini, soopattuxiwa siniipurula sootheene ni atthu ootheene anoothukumela vamaithoniwaka. Nyaako sinoopittuwa, nyala sinoophweeya ni ixiri sootheene sinoopittuwa.

²¹ Kinoolattula ekatana weera engwaneno Gogi mmanyaakonimwaka moothemwene,’ onghima Yave onlamula sootheene. Khula mutthu onookuxa ekatana angwananeke munneiye.

²² Kinoomuthorihela yoowo nihooxo ni oyeehiwa wa ephome; kinoorupiha epula yookumburula, ya maralala ni enxofre* enoompattela yoowo vamoha ni anakhottwaawe ni miloko sincipale sineera sikhale ni yoowo.

²³ Hiiho, kinimoonihera otokweenaaka ni otteelawaka, kiisuweliheke mmilokoni sincipale. Vano awosa anoosuwela weera Miyo ti Yave.’”