Ezekiyeli 33 - Emakhuwa Bible

Ezekiyeli namalipelela a oYixrayeli

¹ Yave aahuuluma ni miyo, eeraka:

² “Mwaana a mutthu, muulume ni axunninyu ni ngweerelase: ‘Miyo, Yave, kaaruuhelaka ekatana mulaponi emoha, ni muloko wa elapo eyo wamuthanla mutthu weera akhale namalipelela,

³ ni owo oona ekatana enrweela mulaponi, aniipa nipalapatta noowooperera muloko,

⁴ vano mukina iiwa oruma wa nipalapatta ahinapwatthela woopereriwa, ni yarwa ekatana, enamwiiva, nthowa na okhwawawe, ti nawawe.

⁵ Eenre owo iiwa oruma wa nipalapatta ahinapwatthela woopereriwa, nthowa na okhwawawe, ti nawawe. Owo aapwatthenle, saano iixooponleene.

⁶ Vaheera namalipelela oona erwaaka ekatana, ahiniipa nipalapatta weera ooperere muloko, ni ekatana yarwa, enamwiiva mmoha a yaawosa, mulopwana owo anaakhwe niwoko na yootakhalaawe, mene kinoomoonela namalipelela okhalano nthowa na okhwa wa mutthu owo.’

⁷ Mwaana a mutthu, kohookhalihani namalipelela a muloko wa aYixrayeli; tivawo, mwiiwe maswaaka ni ngwooperere mwa Nsinanaka.

⁸ Kaamweerelaka mutakhali weera vekhaikhai owo anaakhwe, ni nyuwo mwaahuuluma ni yoowo weera aceendye iphirosawe, mutakhali owo anaakhwe mwa yootakhalaawe, vaheera Miyo kinoowoonelani okhalano nthowa na okhwawawe.

⁹ Vanonto, nyuwo mwamooperera mutakhali weera ahapuwe mphironimwawe, ni owo aahihapuwa, anaakhwe mwaha wa yootakhalaawe, mene nyuwo mohiivuluxa.

¹⁰ Mwaana a mutthu, muleele muloko wa oYixrayeli: ‘Nyuwosa muneera: “Soopahulasahu ni sootthekasahu ti yoolemelaahu ni sinnoondiha seiyo. Vano moota heeni nneeraahu nikhale ni okumi?” ’

¹¹ Mwaaleelase: ‘Kinlipela mwa okumaaka,’ onghima Yave onlamula sootheene, ‘khoonkisivelaru okhwa wa atakhali, kimpacera toko ohaawela weera awosa ehapuwe mphironimwaya ni ekhale ni okumi. Muhokolowase! Muhokolowase mphironimwanyu moonanara! Ii! Muloko wa oYixrayeli, muntthunela heeni okhwa?’

¹² Tivawo, mwaana a mutthu, mwaaleele ha axunninyu: ‘Wookoleleya wa oororomeleya khoomutapuxa owo attiyamaaru, ni otakhala wa mutakhali khoommoroxa owo ahiyaleene yeeyo. Vano oororomeleya attheka, khakhala ni okumi niwoko na ororomeleyawawe wa khalayi.’

¹³ Miyo kamuroromeliha oororomeleya weera owo anaakhale ni okumi, anapaka yoonanara, khasuupuweleliwaru mitekosawe soororomeleya; owo anaakhwele yoonanara opankaawe.

¹⁴ Miyo kamweerela mutakhali: ‘Vekhaikhai nyuwo mmwikhwe,’ vaheera owo ahiya yootthekaawe, anapaka yeeyo eri yoororomeleya ni yoowookoleleya,

¹⁵ owo ahokoloxa yeeyo aakuxalaawe ntoko yooweemexera mookoongoranimwawe, anahokoloxa iiyalaawe, aneettela ikano simvaha okumi ahipakakaru yoonanara, vekhaikhai owo anaakhale ni okumi.

¹⁶ Kheekhalaru yoottheka opankaawe eneera yuupuweleliwe. Owo oopaka yeeyo eri yoororomeleya ni yoowookoleleya; vekhaikhai owo anaakhale ni okumi.

¹⁷ Wa soothesene, axunninyu aneera: ‘Ephiro ya Yave, kheehiyono yoororomeleya.’ Mene ti iphirosaya sihiroromeleiye.

¹⁸ Oororomeleya ahiya ororomeleyawawe, anapaka yoonanara, owo anaakhwele yeeyo.

¹⁹ Vano mutakhali ahiya yootakhalaawe anapaka yeeyo eri yoororomeleya ni yoowookoleleya, eenre apaka hiiho, onookhala ni okumi.

²⁰ Vanonto, ii! Muloko wa oYixrayeli, nyuwo muneera: ‘Ephiro ya Apwiya kheehiyono yoororomeleya.’ Vaheera, Miyo kinoomuthoriha khula mutthu kittharihaka mweettelowaawe.”

Omora wa oYerusaleemu

²¹ Vanihukuni nanaathanu na mweeri wanaamuloko wa eyaakha yanaamuloko ni piili ya otthukiwawahu, mulopwana mmoha oopongwe oYerusaleemu aahoorwa wa miyo, anakeerela: “Esidade yoomora!”

²² Vano oxekuwa ahinaaye ophiya mulopwana ole ntata na Yave naari mwa miyo, ni Owo aahula eyanowaaka. Hiiho, yaahuleya eyanowaaka, ni miyo nkaamaanletho.

²³ Vahoolowaya, Yave aahuuluma ni miyo, eeraka:

²⁴ “Mwaana a mutthu, muloko onkhala mmathalani mmwe a oYixrayeli, oneera: ‘Abrahaamu aari mulopwana mmoha paahi, ni naari hiiho yoowo aakhalano elapo. Vaheera hiyo nri ancipale; vekhaikhai nnimwaakhela elapo ntoko yawihuweene.’

²⁵ Vano ngweerelase weera Yave onlamula sootheene oneera ha: ‘Mweenre nyuwosa mukhuuraka enama ni ephomaaya, munakokhorela milukusanyu muyeehaka ephome, moota heeni muneeraanyu mukhaleno elapo?

²⁶ Nyuwosa munroromela ekatana, mumpaka itthu soohiira, ni khula mutthu a nyuwosa onimvaliha mwaara a mukhwaawe. Hiiho, onootthuneya okhalano elapo?’

²⁷ Mwaaleelase weera Yave onlamula sootheene oneera ha: ‘Kinlipela mwa okumaaka weera yaawo eniihale mmathalani, eniyiiviwe ni ekatana, yaawo ari mutuphini kinoowinnyerera wa axinama a mutuphini weera enyaanyiwe, ni yaawo antthawela moolipa ni munyattani animwiiviwa ni nihooxo.

²⁸ Kinootatuxa elapo nikare noothaamiwa. Kinoomaliha ikurusaya soowiixunnuwiha, ni nyaako sa oYixrayeli sinoothaamiwa moota wooweera mpaka ohikhalaru mutthu anaahaawele ovirawo.

²⁹ Miyo kaatatuxaka elapo nikare noothaamiwa niwoko na soopaka soohiira sootheene awosa ampakaaya, eniisuwele weera Miyo ti Yave.’

³⁰ Vaheera wa nyuwo, mwaana a mutthu, axunninyu antthekulela sa nyuwo muxirini ni mmaseleni mwa impa, yeerelanaka: ‘Murwe, mwiiwe mutthenga onrweela mpatta wa Yave.’

³¹ Mulokwaaka onrwa wa nyuwo ntoko okhovelenlaaya opaka, ni onkilaathi weera wiiwe maswaanyu, mene khooneettela. Ngwuulumanimwaya ankhala ntoko oororomeleya, vaheera anghaawela owina woohiroromeleya.

³² Wa soothesene, wa yaawosa nyuwo khaanoopwatthelani ompwaha namwiipa oniipa icipo sa osivela ni nsu nooreera ni ongwera wiipa nnenesene ekaruma ya masoma, niwoko awosa aniiwa maswaanyu, vaheera khaaneettela.

³³ Saakhumelelaka sootheene iyo – ni vekhaikhai sinookhumelela – vano, awosa anoosuwela weera aakhala maprofeeti eriyaraaya.”