Ezekiyeli 31 - Emakhuwa Bible

Mwiri wa esidari* woorakamaxa

¹ Vanihukuni noopacera na mweeri wanaararu wa eyaakha yanaamuloko niimoha, Yave aahuuluma ni miyo, eeraka:

² “Mwaana a mutthu, munleele Farawu*, mwene a wExipitu, ni mulokwaawe woowaattaxa: ‘Taani onlikana ni nyuwo mootokweeneni?

³ Mmoonelemo wAsiriya – khalayi waari ntoko mwiri wa esedari* wa oLebanoni ni iphandi sooreera saahela munttuusi othako; yaari yoorakamaxa, makukhwaaya ereene a mwiitti yaari vasulu wa othako wootheene.

⁴ Khayaahaleela epula yoowunnuwiha, hata oriirela wa etthaya weera opombihe. Maahi yaahelela nipuro wunnuwaayawo mwiri, ekhwalalelaka mmirini sootheene sa moothakoni.

⁵ Yunnuwaxa opwaha nyiri sootheene sa mutuphini; saaphuwa iphandi sincipale ni iyo saahunnuwa sikuttukutteyaka mwaha woowaatta maahi.

⁶ Ipalame sootheene sa wiirimu saapaka ipuuru mphandinimwaya, axinama a mutuphini ootheene yaayarela vathi wa iphandisaya; miloko sincipale sootheene saakhalela munttuusaaya.

⁷ Ophwaneliwawaya waari otokotoko, ni iphandisaya saakuttukutteiye, niwoko mikwankhwaarisaya saarowa yaaraayawo maahi mancipale.

⁸ Khayaariworu esidari* ya muttimbeni mwa Muluku yaalikanxereya; nyiri sa ipinyeiru* khasaakuttukutteiye ntoko iphandisaya, hata nyiri sikina khasaarino iphandi ntoko seiyo; khawaariworu mwiri wa muttimbeni mwa Muluku, wooreera ntoko yeeyo.

⁹ Miyo koophwaneliha ni iphandi sooreeraxa, sihilikanaka nyiri sootheene sa wEdeni muttimbeni mwa Muluku.

¹⁰ Vanonto, Yave onlamula sootheene oneera ha: Weenre owo wunnuwaka, onarakama ophiyaka osuluxa, ni makukhwaaya a mwiitti yakhalaka vasulu wa othako wootheene, ni weenre wiikuxererakano orakamawaya,

¹¹ Miyo kohinnyerera wa mulamuli a miloko weera owo opakeliwe ottharihiwaka otakhalawaya. Miyo, kookhootta,

¹² ni muloko woohimorelaxa ikharari wa anamarwa, woomoroxa, onahiya. Iphandisaya soomorela mmanyaakoni ni mmareyareyani moothemwene; iphandisaya sirimwaasa omwaraxeliwa mulaponimwaya. Miloko sootheene sa mulaponi soovenya mmunttuusinimwaya, sinathaama.

¹³ Ipalame sootheene sa wiirimu sohiitekiha mmwirini woomora, ni axinama ootheene a mutuphini, angkhala mphandinimwaya.

¹⁴ Tivawo, khoowoworu mwiri wa muxerexere maahi oniwunnuwaxe ngwiixoonani, orakamaxaka ni makukhwaaya a mwiitti ekhalaka vasulu wa othako wootheene. Khoowoworu mwiri mukina woohelelaxiwa oniwunnuwetho hiiho; sootheene silakeleliwe okhwa ntoko atthu ankhwa, sivithiweke ntoko amvitheliwaaya atthu.

¹⁵ Yave onlamula sootheene, oneera ha: Vanihukuni na ovithiwawawe, kaapakiha weera maxaapwaaya oowiixera yaalalamikele; kaahiiha maxaapwaaya ni kaahuumiha maahaaya oowaattaxa. Niwoko na yaawo, koomuhela epiphi Lebanoni, ni nyiri sootheene sa mutuphini saahuuma woomalela.

¹⁶ Koothukumeliha miloko woorumani omorawaya, kaakhuruwelihaaka mulittini vamoha ni yaawo amvithiwa. Vano, nyiri sootheene sa wEdeni, sooreeraxa ni sooreerela sa oLebanoni, nyiri sootheene soohelelaxiwa, saapembesiwa vathi wa etthaya.

¹⁷ Ootheene yaakhala mmunttuusinimwaya, oowiiraananaaya eriyari ya miloko, yaavithiwano vamoha ni yaale yiiviwe ni ekatana.

¹⁸ Mwiri heeni wa wEdeni woolikanxera ni nyuwo ngwaarani ni mootokweeneni? Vanonto nyuwotho, munoomoroxeliwa vathi, vamoha ni nyiri sa wEdeni; nyuwo munimwiixaatalela eriyari ya oohiineliwa, vamoha ni yaale yiiviwe ni ekatana. Ti yeeyo eniimukhumelele Farawu* ole ni mulokwaawe mwincipale wootheene, onghima Yave onlamula sootheene.’ ”