Ezekiyeli 28 - Emakhuwa Bible

Olaleiya mwaha wa mwene a oTiro

¹ Yave aahuuluma ni miyo, eeraka:

² “Mwaana a mutthu, mwaaleele alamuli a oTiro weera Yave onlamula sootheene oneera ha: ‘Ngwixoonani wa murimaanyu nyuwo muneera: “Miyo ti Muluku; kinkilaathela ehice ya emwene ya Muluku eriyari ya ephareiya.” Vaheera nyuwo muri mutthu paahi, khamuhiyono Muluku, naari mwiixeeraka okhala musuweli ntoko Muluku.

³ Weeraka nyuwo musuweli ompwaha Daniyeli? Kheekhala exiiri muhisuwenlaanyu?

⁴ Mweesuwelonimwanyu ni ngwiiwexexanimwanyu nyuwo moophwanya mihakhu munathukumanyiha eyuuma yoorikaxa ni eparatha* mmihakhunimwanyu.

⁵ Mooweranimwanyu otokotoko omweetta nakoso, nyuwo mohaandyeerera mihakhusanyu, ni murimaanyu ommweera otepa wiikuxerera niwoko na seiyo.

⁶ Tivawo Yave onlamula sootheene oneeraawe ha: ‘Mweenre nyuwo mwiixeeraka musuweli ntoko Muluku,

⁷ kinimooruuhelani anamarwa a mmilokoni soohimorelaru ikharari; awosa anoovarela ikatanasaya, ewananeke ophwaneliwawanyu, mirukusanyu ni waarawanyu wootutha.

⁸ Awosa animookuruxelani mulittini, ni nyuwo munookhwela eriyari ya ephareiya moota woopuhereya.

⁹ Weeraka nyuwo mmweere: “Miyo ti Muluku,” vamaithoni wa yaale eniiwiiveeni? Nyuwo mmwikhale mutthu paahi, ohikhanle Muluku mmatatani mwa yaawo eniiwiiveeni.

¹⁰ Okhwawanyu onuukhale ntoko wa oohiineliwa mmatatani mwa anamarwa. Miyo kohuuluma, onghima Yave onlamula sootheene.’ ”

Olalamika mwaha wa mwene a oTiro

¹¹ Yave aahuuluma ni miyo, eeraka:

¹² “Mwaana a mutthu, mulalamike mwaha wa mwene a oTiro ni mmweerele: ‘Yave onlamula sootheene oneera ha: Nyuwo mwaari moota wookwanela, oosareya miruku ni oophwanelaxiwa.

¹³ Nyuwo mwaari wEdeni, munttimbeni na Muluku; maluku ootthuneyaxa ootheene yannoophwanelihani – erubi*, topaziyo*, esmeralda*, krisolito*, onikisi*, yaspe*, safira*, yaspe* ni berilo*. Ivarelelosaya ni soolipelelasaya, saapakeliwe ni eyuuma yoorikaxa; sootheene iyo saarehereriwe nihuku nyuwo mpattuxiwaanyu.

¹⁴ Nyuwo mwaattikittheliwa ntoko kerubini* oolipelela, niwoko koothanlenleni yeeyo. Nyuwo mwaari vamwaakoni wootteela wa Muluku, ni mweetta eriyari ya maluku ooceremela.

¹⁵ Nyuwo khamwaarino nthowa mphironimwanyu, okhuma nihuku mwaapattuxingwaanyu mpaka siphwanyingwaaya sootakhalasanyu mwa nyuwo.

¹⁶ Mumvarexenxaanyu nakoswaanyu moosareya nipuhero, munattheka. Tivawo Miyo koovonyenraakani ooyeviheyeene ottai wa mwaako wa Muluku, kinawoomolani, ii! Kerubini* oolipelela eriyari ya maluku ooceremela.

¹⁷ Murimaanyu woothatuwa woowiixoona niwoko na ophwaneliwawanyu, ni nyuwo moonanariha mirukusanyu niwoko na waarawanyu. Tivawo Miyo koovonyenraakani vathi; kohoopakani mutheelelo wa mamwene.

¹⁸ Nyuwo moohiiriha mapurowaanyu ootteela niwoko na sootthekasanyu sincipale ni nakoswaanyu oohiroromeleya. Tivawo kikhumihalaaka mwa nyuwo mooro woolalingheni onootatuxani ettuura vathi vamaithoni wa ootheene yaawoonani.

¹⁹ Miloko sootheene soosuwenleni saawoonakani sinootikhiniheyaxa; wohoophiyerelani ommaleloniwanyu woowoopiha ni khamukhalatho.’ ”

Olaleiya mwaha wa oSidoni

²⁰ Yave aahuuluma ni miyo eeraka:

²¹ “Mwaana a mutthu, murukunuwele oSidoni; muthaliherele otthuna wa Muluku

²² ni mweerele: ‘Yave onlamula sootheene oneera ha: ‘Koowiittani Sidoni ni ovuwawaka kinimoonihera mpuwamwanyu. Ootheene anoosuwela weera Miyo ti Yave, koottaruxakani ni kiixooniheraka Ootteela mpuwamwanyu.

²³ Kinimoorumihelani nihooxo ni kinoosariha ephome mmisewenimwanyu. Anamakhwa anoomora mpuwamwanyu ni ekatana eniyoorweeleni mmipattani sootheene. Hiiho awosa anoosuwela weera Miyo ti Yave.

²⁴ aYixrayeli kheekhalanotho amwaattamana oonanara murima hata eniyaahome ntoko nyiiwa ni eniyaavulalihe ntoko rupulula. Hiiho, awosa anoosuwela weera Miyo ti Yave.’ ”

Nreeliho na muhoolo wa aYixrayeli

²⁵ “ ‘Yave onlamula sootheene oneera ha: Kaathukumanyihaka aYixrayeli eriyari ya miloko mwa seiyo amwaraxeliwaaya, Miyo kinimwiixoonihera Ootteela eriyaraaya vamaithoni wa miloko. Hiiho awosa anookhalasa mulaponimwaya xaxaxa, mwa yeeyo kaamvanghaaka murumeiyaaka Yakobe.

²⁶ Awosa anookhalawo oolipeene, anooteka impa, ephatteyeke ivideira*; anookhala oolipeene Miyo kaattaruxaka amwaattamanaaya ootheene yaapakenle yoonanara. Hiiho, awosa anoosuwela weera Miyo ti Yave Mulukwaaya.’”