Ezekiyeli 24 - Emakhuwa Bible

Esupuriya eviluwaka

¹ Vanihukuni nanaamuloko na mweeri wanaamuloko wa eyaakha yanaathannaaxexe, Yave aahuuluma ni miyo eeraka:

² “Mwaana a mutthu, mulepe nihuku nna na olelo, niwoko mwene a oBabiloniya oomurica Yerusaleemu nihuku nenenenna.

³ Muthalihere muloko woovaanya ola niphwanaphwaniho ni mwaaleelase weera Yave onlamula sootheene oneera ha: ‘Mwaapeye esupuriya weera evihe; mwaapeye weera evihemo maahi.

⁴ Muhelemo itthuri sa enama, itthuri sooreerela sa etakhwi ni sa khakobe. Musarihemo makhuva ooreerela;

⁵ mukuxe yooreerela ya muhuwo. Muhutte ikhuuni waathiwaya weera yiitthwe makhuva; mukaphulihe maahi ni mwaapeye sootheene siri musupuriyani.

⁶ Niwoko Yave onlamula sootheene oneera ha: Ii! Esidade yoosareya ephome, esupuriya erino murawa, mwa yeeyo mavovowaaya eneera ehimale! Mwiitthe muruulaka entthuri entthuri muhithanlaka.

⁷ Vano ephome owo oyeehalaawe eri eriyaraaya; owo oyeehenre vamwala woohimela etthu; khayeehenre vathi yeeraaya yuuheeleleye ni ntthupi.

⁸ Kohiikaathi ephomaawe vamwala woohimela etthu weera kitannye isara ni kiinle ikukuttula ni weera eyo ehikutteleliwe.

⁹ Tivawo Yave onlamula sootheene oneeraawe ha: Ii! Esidade yoosareya ephome! Miyotho kinimuukelela ikhuuni, aani ikhuuni sincipalexa.

¹⁰ Vanonto, muukele ikhuuni ni mpattihe mooro. Mwaapeye nnenesene enama muhelaka soosivasiva; makhuva awo eze mpaka othatuwa ettuura.

¹¹ Vahoolowaya mwiikaathi esupuriya yoohikhalamo etthu vamakhalani a mooro weera evihe mpaka ebronzaaya* oluttuwa weera soohitteelasaya sitothowe ni soohalahalasaya size, silakaseye.

¹² Vaheera khoongwereya opaka yeeyo; hata mooro khoongwera omalamaliha yoohalahalaaya ya murawa.

¹³ Vano, soohitteelasanyu ti soohaawelasanyu. Keenre Miyo kahaawela wootteelihani, ni nyuwo khamutthunne otteelihiwa, nyuwo khamuhokoleela okhalatho ootteela isarasaka sihookhurunuwenleni.

¹⁴ Miyo, Yave, kohuuluma. Yoophiyera ehuhu kineeraaka kivare muteko. Nkikhurunuwa; nkimorela ikharari, hata nkihiyerera. Nyuwo mmwithorihiwe ottharihiwaka mweettelowaanyu ni mitekosanyu, onghima Yave onlamula sootheene.’ ”

Okhwa wa mwaaraawe Ezekiyeli

¹⁵ Yave aahuuluma ni miyo eeraka:

¹⁶ “Mwaana a mutthu, kihanle vakhaani ovenxa yeeyo munsivelaxaanyu. Wa soothesene, muhilalamike, naari muhiinle hata muhimoroxeru niithori.

¹⁷ Muhitthunihereru wiiwiwa wiipulelawanyu; muhiikhupanyere mwaha wa anamakhwa. Mulipihe eturbantaanyu* ni ngware ikwakwaattaanyu; muhikuttelele ekhove hata muhice yooca ekhoveleliwe ociwa ni anamalalamika.”

¹⁸ Hiiho, oxeexelo kaahuuluma ni muloko, ni oxekuwa mwaaraka aahookhwa. Waaxiiye, kaapaka yeeyo kaalamuleliwaaka.

¹⁹ Vano muloko waakikoha: “Dyoontte, munithalihere etaphulelo ya itthu iyo.”

²⁰ Miyo kaawaakhulasa: “Yave okeerenle ha:

²¹ Mwaleele muloko wa oYixrayeli weera Yave onlamula sootheene oneera ha: ‘Kihanle vakhaani ohiiriha Nipuronaka Nootteela* – nipuro noolipa nyuwosa muniikuxereraanyuno, mwa nenno munsivelaxaanyu, etthu yoowooreeraxani. Anamwane asilopwana ni asithiyana, nyuwosa mwaahiyalaanyu oYuda animwiiviwa ni ekatana.

²² Nyuwosa mmwipakase yeeyo miyo kipankaaka. Khamukuttelelasa ekhove hata khamuca yooca ekhoveleliwe ociwa ni anamalalamika.

²³ Nyuwosa mmwiware eturbante* mmurumwanyu ni ikwakwaatta munaawonimwanyu. Khamulalamika hata khamwiinla, mene munimoondasa niwoko na sootakhalasanyu ni khula mutthu onimwiipulela meekhaawe.

²⁴ Ezekiyeli anaakhale eneneero wa nyuwo; nyuwosa mmwipakase yeeyo owo opankaawe. Eyo yeereyaka, nyuwo munoosuwela weera Miyo ti Yave onlamula sootheene.’

²⁵ Vano nyuwo, mwaana a mutthu, vanihukuni kineeraaka kivenxe Nipuronaya Noolipa, ohakalalawaya ni ovuwawaya, yeeyo ansivelaxaaya, mpakatho anamwanaaya asilopwana ni asithiyana ari oosiveleyaxaaya,

²⁶ nihuku nno, namatthawa anooruuheleni ihaali.

²⁷ Ehuhuweene yeeyo eyanowaanyu enoohuleya; nyuwo mmuulume ni yoowo ni khammaala. Hiiho, nyuwo mmwikhale eneneero wa yaawosa, ni awosa anoosuwela weera Miyo ti Yave.”