Ezekiyeli 13 - Emakhuwa Bible

Othorihiwa wa maprofeeti oowootha

¹ Yave aahuuluma ni miyo, eeraka:

² “Mwaana a mutthu, mwaathaliherele otthuna wa Muluku maprofeeti a oYixrayeli mwa yaawo anthalihera otthunawaya mwa Nsina na Yave vaanaano va. Mwaaleele yaawo anthaliha seiyo anuupuwelaaya: ‘Mwiiwe masu a Yave!

³ Yave onlamula sootheene oneera ha: Ii! Wa maprofeeti alolo antthara munepaaya ehoonaka etthu!

⁴ Ii! aYixrayeli, maprofeetaanyu ari ntoko akhwatte eriyari ya mmilepeni.

⁵ Nyuwosa khamurongwe ottiya mitari sa exiri wa muloko wa oYixrayeli weera eyo epwaherere yoolipeene mukhottoni vanihukuni na Yave.

⁶ Nyoonelosanyu ti soowootha ni sootthomasanyu ti soolokottha. Awosa aneera: “Yave onghima,” Owo ahaaruminghe; wa soothesene angweherera weera Owo onookwanihera maswaaya.

⁷ Nyoonelo iyo murinaanyu ti soowootha ni itthu muntthomaanyu ti soolokottha. Muneera “Yave onghima,” Miyo kihooleenleni!

⁸ Tivawo Yave onlamula sootheene oneeraawe ha: Niwoko na maswaanyu oolokottha ni nyoonelosanyu soowootha, koowiittasani, onghima Yave onlamula sootheene.

⁹ Ntatanaka nnimwaawanano maprofeeti arino nyoonelo soolokottha ehimaka sootthoma soowootha. Awosa kheekhalela mpatta wa muthukumano wa mulokwaaka, naari khayaalikeleliwa munamalepelani a oYixrayeli, hata kheevolowa mulaponi mwa oYixrayeli. Hiiho, nyuwosa munoosuwela weera Miyo ti Yave onlamula sootheene.

¹⁰ Eyo eniyeereele niwoko anghapuxa mulokwaaka yeerelaka: “Murettele,” ohikhanle murettele, ni yaatekaka exiri yoohilipa, anttikitthela ekaali*.

¹¹ Tivawo, ngweerele yaale anttikitthela ekaali* weera exiri enoomora! Enimoorwa epula etokotoko, ni kinoorupiha epula ya maralala, yoopeke epheyo yoowuupa.

¹² Exiri ekurumungweene, muloko onimookohani: “Eri woowi exiri mwaattikitthenlaanyu ekaali*?”

¹³ Tivawo Yave onlamula sootheene oneeraawe ha: ‘musaranimwaka kinoorumiha woopa epheyo yoowuupaxa, ni moonyoonyiwanimwaka epula ya maralala ni epula etokotoko enoorupaxa, ephwateke.

¹⁴ Kinookurumula exiri muttikitthenlaanyu ni kinoophwata mpaka wooneya mathipelowaaya. Eyo yaamoraka, nyuwosatho munoophwateliwa vamoha, ni munoosuwela weera Miyo ti Yave.

¹⁵ Hiiho kinookurunuxela isarasaka exiri ni wa yaale yaattikitthenle. Kinooweerelasani: “Exiri yoolakaseya, vamoha ni yaale yaattikitthenle –

¹⁶ maprofeeti awosa a oYixrayeli yaamuthalihenre otthuna wa Muluku moota woowootha Yerusaleemu ni yaarino nyoonelo sa murettele wa yeeyo ohikanle murettele, onghima Yave onlamula sootheene.” ’

¹⁷ Vano mwaana a mutthu, ngwuulumele anamwane asithiyana a mulokwaanyu anthalihera soowuupuwelasaya mwa Nsina na Yave. Mwaathalihere yaawosa otthuna wa Muluku,

¹⁸ ni mweere: ‘Yave onlamula sootheene oneera ha: Ii! Wa asithiyana anttottha mapaatiri ookhwiri oowara mmoononi ni ampaka soowiikhuneela owiitho soorakamaxa weera mpharihe muloko. Munuupuwela weera munoophariha munraakhoni mulokwaaka nyuwosa mwiiruuhelaka muneenaanyu?

¹⁹ Nyuwosa mookihiirela eriyari ya mulokwaaka mwaakakhanyihaka ni esevada* vakhaani ni inyenyeeri sa epaawu. Woolokottha mulokwaaka oniiwa soowootha, nyuwosa moowiiva yaale yahaaphwanenle okhwa, munawuurela yaale yahaaphwanenle okumi.

²⁰ Tivawo Yave onlamula sootheene oneeraawe ha: Kiniittanano mapaatiraanyu a ekhwiri mwa yaawo mumpharihaanyuno muloko ntoko ipalame, ni kinoopasa munyoononimwanyu; kinootapuxa muloko mumpharihaanyu ntoko ipalame.

²¹ Kinimwaahula soowiikhuneelasanyu owiitho kitapuxeke mulokwaaka mmatatanimwanyu, ni owo khoolamuliwatho ni ikurusanyu. Hiiho, nyuwosa munoosuwela weera Miyo ti Yave.

²² Nyuwosa moompororiha oororomeleya ni soowoothasanyu, Miyo kihitthunaka waathananiha, ni mohaalipihera atakhali weera ehihiye iphirosaya soonanara, yoopolaka hiiho okumaaya.

²³ Tivawo nyuwosa khamukhalanotho nyoonelo soolokottha ni khamurwatho mweettela sa ehako. Kinootapuxa mulokwaaka mmatatanimwanyu. Hiiho, nyuwosa munoosuwela weera Miyo ti Yave.’”