Ezekiyeli 11 - Emakhuwa Bible

Othorihiwa wa anamalakela ootakhala

¹ Vano Munepa waakeemexa, onakirongha vamulako wa Empa ya Yave owenghe mpatta ninkhuma nsuwa. Iwe, vamulako yaakhala asilopwana miloko miili naathanu ni eriyaraayasa kaamoona Yaazaniya, mwaana mulopwana a Azuri, ni Pelateya, mwaana mulopwana a Benaya, ahooleli a muloko.

² Yave aakeerela: “Mwaana a mutthu, alasa ti atthu amvaanelela sootakhala, evahaka olakela woonanara musidadeene yeela.

³ Awosa aneera: ‘Kheekhuveenle ehuhu yooteka impa. Esidade ela ti mwaapu, ni hiyo nri enama yaapeiwalemo.’

⁴ Tivawo, mwaathalihere otthuna wa Muluku, mwaana a mutthu, mwaathalihere.”

⁵ Vano Munepa wa Yave, waahoorwa wa miyo, onakiruma ohima weeraka: “Yave oneera ha: Ii! Muloko wa oYixrayeli, ti yeeyo nyuwosa munghimaanyu, vaheera Miyo koosuwela yeeyo munuupuwelaanyu.

⁶ Nyuwosa khamureere owiiva atthu ancipale a esidadeene yeela ni mmisewenimwaya moosariha mittembo.

⁷ Vanonto Yave onlamula sootheene oneera ha: Mittembo mvonyenraanyu mmuseweni ti enama ni esidade ela ti mwaapu, mene Miyo kinoowoomolanimo.

⁸ Nyuwosa munoova ekatana, ni ekatana, kinimooruuhelanisa, onghima Yave onlamula sootheene.

⁹ Miyo kinoowoomolasani musidade, kiwinnyererekeni mmatatani mwa anamarwa ni koottaruxekeni.

¹⁰ Nyuwosa munimwiiviwa ni ekatana, ni Miyo kinimoothorihelasani nnyiinanoni sa oYixrayeli. Hiiho nyuwosa munoosuwela weera Miyo ti Yave.

¹¹ Esidade ela kheekhala mwaapu wa nyuwo, hata nyuwosa khamukhala enama mpuwamwaya. Miyo kinimoothorihelasani nnyiinanoni sa oYixrayeli.

¹² Hiiho, nyuwosa munoosuwela weera Miyo ti Yave, niwoko nyuwosa khamuttharinghe ikanosaka hata khamwiiwelenle malamulowaaka, mene muttharinghe makhalelo a miloko soorukureenreni.”

¹³ Vano, miyo kithaliheraka otthuna wa Muluku, Pelateya, mwaana mulopwana a Benaya, aahookhwa. Vahoolowaya kaahuuramihela ekhove vathi, kinakhuwelaxa: “Ii! Yave onlamula sootheene! Munimwaaphwata woomalela oohalahala a oYixrayeli?”

Yave onooreherera oYixrayeli

¹⁴ Yave aahuuluma ni miyo moota ola:

¹⁵ “Mwaana a mutthu, axunninyu, aani axunninyu ari emusaanyu xaxaxa ni muloko wootheene wa oYixrayeli, ti yaawosa aneereliwa ni amaki a oYerusaleemu: ‘Awosa aamurakamela Yave. Ti hiyo nivahingwe elapo ela weera ekhale yawihuweene.’

¹⁶ Vanonto mweere: ‘Yave onlamula sootheene oneera ha: Kaaroowoomolelaru ilapo soorakamelaxa eriyari ya miloko kaamwaraxelaka eriyari ya ilapo, mweehuhuni yeele kaakhala ntoko nipuronaya nootteela yakhalaru elapo yaarowaaya.’

¹⁷ Vanonto, mweerase: ‘Yave onlamula sootheene oneera ha: Miyo kinimoothukumanyihani eriyari ya miloko koohokoloxekeni mulaponi mmwaraxeliwaanyu, ni kinimoohokoloxerasani elapo ya oYixrayeli.’

¹⁸ Awosa anoohokoleelamo ni anoovenxa icaambulosaya soohiira ni milukusaya soothanyeya.

¹⁹ Kinimwaavahasa murima woohikawanyeya, kiheleke munepa munyowani mpuwamwaya; kinoovenxa mwa yaawo murima wa nluku kaavaheke murima wa ethayi.

²⁰ Hiiho eniittharihe ikanosaka ni anoopasoopa wiiwelela malamulowaaka. Awosa anookhala mulokwaaka, ni Miyo kinookhala Mulukwaaya.

²¹ Vaheera wa yaawo murimaaya wuuramenle icaambulosaya soohiira ni milukusaya soothanyeya, kinoomoroxela mmurumwaya yeele apakansaaya, onghima Yave onlamula sootheene.”

²² Vano akerubini* ni mareko a muxerexeremwaya, yaakunga mapuphaaya, ni ovuwa wa Muluku a oYixrayeli waari vasulu wa yaawo.

²³ Ovuwa wa Yave waavenya musidadeni ele, oneemela vamwaako ori mpattaaya ninkhuma nsuwa.

²⁴ Vano Munepa wa Muluku waakeemexa, ni mmooneloni, waakirongha wa yaale yaaronghiwe wootthukiwani oBabiloniya. Hiiho, moonelo kaarinaaka, waamala,

²⁵ kinaathalihera anamatthukiwa sootheene aakoonihenraawe Yave.