Exteri 6 - Emakhuwa Bible

Mwene onimunyesereriha Hamani omuttittimiha Mordekai

¹ Ohiyu ole mwene khasaamurwa ikhove, tivawo aalamulenlaawe oruuheliwa elivuru ya nyaha sa olamulawawe weera asomeliwe.

² Yaasommwa yaalempwale weera Mordekai aamphwanyera Bigetana ni Terexi, arumeiyi eeli a mwene yaalipelela mulako wa mwene, awosa evaanelaka omwiiva Ahaxeveroxi.

³ Mwene aakoha: “Epakiwe eheeni yoomutthapelela ni omutthuvela Mordekai?” Arumeiyaawe yaamwaakhula: “Khaakhenle etthu.”

⁴ Mwene aahaakoha: “Vaate vawo ari taani?” Vano Hamani eera avolongweene vaanaanoru vanipuwani na vaate wa empa ya mwene weera amvekele mwene otthukeleliwa kuleele wa Mordekai aareherenraawe.

⁵ Arumeiyaawe yaamwaakhula: “Ti Hamani ori vanipuwani.” Mwene aahaalamula: “Mumvoleihe mu.”

⁶ Hamani avolowakaru, mwene aamukoha: “Ontthuneya ompakela eheeni yoole onimusiveliha mwene?” Vano Hamani aahiixuupuwelela: “Taani amwene antthunaxaaya omuttittimiha kihikhanle miyo?”

⁷ Hiiho aamwaakhula mwene: “Amwene mwatthuna omuttittimiha mulopwana owo,

⁸ mulamulele weera oruuhiwe mukaandyo wa emwene ni ekavalu* yaawelaaya amwene etthukiweene ecireemba ya emwene.

⁹ Vahoolowaya aavaheke akina a oottittimiheyaxa oororomeleya mukaandyo ni ekavalu* ni awosa engwariheke mukaandyo mulopwana owo amwene antthunaaya omuttittimiha ni emweettiheke vakavaluni* mmiseweni sa esidade, emuttottopelaka ohoolowawe: ‘Empakeya ti ela wa mutthu mwene ontthunaawe omuttittimiha.’ ”

¹⁰ Vano mwene aamulamula Hamani: “Murowe woowaakuveya, mwakuxe mukaandyo ni ekavalu* ni mwampakele muYuda Mordekai yeeyo muhimmaanyu. Owo okilaathiye vamulako wa mwene. Muhiipithiheru etthu nyuwo muhimalaanyu.”

¹¹ Hiiho Hamani aakuxa mukaandyo ni ekavalu*. Aangwariha Mordekai, anamweettiha vakavaluni* mmiseweni sa esidade, amuttottopelaka ohoolowawe: “Empakeya ti ela wa mutthu mwene ontthunaawe omuttittimiha.”

¹² Vahoolowaya Mordekai aahokoleela vamulako wa mwene, vaheera Hamani aatthimakela owaannyawe ooyeviheyeene, oowuulihiheyeene muru,

¹³ anamuthalihera mwaarawe Zerexi ni asinthamwenaawe ootheene sootheene seiye saamukhumelenle. Anamalakaawe ni mwaarawe yaamweerela: “Eenre Mordekai, mwa yoowo onooyeleelihani, akhala muYuda, khamuwera ongwina. Woohihovela munoophwatiwa.”

¹⁴ Etthekulaka hiihaale, yaahoorwa inoko* a mwene, enamwaakuvihiha Hamani ofestani Exteri aareherenraawe.