Biblia Todo Logo
Bìoball air-loidhne

- Sanasan -

Exteri 4 - Emakhuwa Bible


Mordekai onimvekela Exteri ekhavihero

1 Mordekai asuwelaka sootheene saakhumelenle, aahaahula soowarasawe, anawara esaakho, aniihela ettuura, anakhuma musidade iinlaka ni alalamikaka vancipale.

2 Aarowa mpaka vamulako wa mwene, mene khaavolongwe, niwoko khaatthuniheriwa ovolowa mutthu oowara esaakho.

3 Khula elapo yaaphiyalaayawo ekano ele ni nlamulo na mwene waakhala wiikhupanyera otokotoko variyari wa aYuda, enatthuka, eniinla, enalalamika. Ancipale yiixaatalela vasaakhoni yiihenleene ettuura.

4 Arumeiyi asithiyana ni inoko saawehaweha asithiyanaawe mwene emuthaliherakaru Exteri yaamweerela Mordekai, owo aathananaxa. Aamurumihela soowara weera aware ni arule esaakho, mene owo khaakhelenle.

5 Vano Exteri aamwiitthana Hataki, enoko* emoha ya mwene aathanliwe weera amurumeele Exteri, anamulamulela weera asuwele enimukacamiha Mordekai ni heeni ompakaawe hiiho.

6 Hataki aarowa wuuluma ni Mordekai vanipuwani na esidade, ohoolo wa mulako wa mwene.

7 Mordekai aamuthalihera sootheene saamukhumelenle ni moota wa musurukhu Hamani aaroromelinghaawe ohela onsungiwa muhakhu wa mwene weera ephwatiwe aYuda.

8 Aamvahatho ekaratta yaalempwale siweheriwaka sikina ya ekano yuuluma sa ophwatiwa wa aYuda ni yaasuwelihiwe oSusa weera owo amoonihere Exteri. Mordekai aamuleela enoko* omunyesereriha Exteri weera aphiye vamaithoni wa mwene amudyoonttelelaka ni ikharari mwaha wa mulokwaawe.

9 Hataki aahokolowa, anamuthalihera Exteri sootheene Mordekai aamuleenlaawe.

10 Vanonto, Exteri aamulamula Hataki omweerela Mordekai ha:

11 “Asitokweene ni atthu ootheene a ilapo sa mwene aasuwela weera eri ekano emoha paahi wa akhalaru mulopwana hoye hoye muthiyana anaamwaattamele mwene vanipuwani na mpuwa ahiitthaniwe ni yoowo – onimwiiviwa, mwene aahimookolela ekopwaawe ya eyuuma yoorikaxa amuurelaka okumi. Aavira mahuku miloko miraru kihiitthaniwaka vamaithoni wa mwene.”

12 Mordekai aakhelelakaru yoowaakhula ya Exteri

13 aalamulela oleeliwa: “Muhuupuwele weera, mweenre mukhala mpaani mwa mwene, mmoopowe nyuwo paahi eriyari ya aYuda ootheene.

14 Nyuwo mwaahuuluma mweehuhuni ntoko ela, ekhavihero ni otapuxeya wa aYuda onuurweele mpatta mukina, mene nyuwo ni emusi ya atithinyu munimookhwa. Onoowereya weera mvarelingwe opwiyamwene niwoko na ehuhu ntoko ela.”

15 Vano Exteri aamurumihela Mordekai yoowaakhula ela:

16 “Murowe mwaathukumanyihe aYuda ootheene ari oSusa ni mwatthuke mukeerelaka miyo. Muhice naari muhiwure othana ni ohiyu miraru. Miyo vamoha ni arumeiyaaka asithiyana ninootthuka ntoko nyuwosa. Vahoolowaya kinoowaattamela amwene onoohitthunihereyaru munlamuloni. Wakhala okhwa, nkikhweeke!”

17 Hiiho Mordekai aavenya anapaka sootheene Exteri aamulamulenlaawe.

Makhua Shirima Bible © Christelike Lektuurmaatskappy NPC, 2021.

CHRISTELIKE LEKTUURMAATSKAPPY NPC
Lean sinn:



Sanasan