Exteri 2 - Emakhuwa Bible

Exteri aathatuwa pwiyamwene

¹ Eviraleene ehuhu, omukhurunungweene murima mwene Ahaxeveroxi, aamuupuwelela Vaxeti ni yeeyo aapankaawe nitho moota aalamulihalaawe aamalihalaawe mulattwaawe.

² Vano anamalaka a mwene yaaheera: “Aasaaseriwe mwene asimwali oowiikosoopa ooreeraxa.

³ Mwene aathanleke asitokweene mweelaponi sootheene sa omwenaawe weera emuruuhele asimwali ooreeraxa awo wa empa ya axaara a mwene musidadeni yoolipihiwa ya oSusa. Awosa ewehawehiweke ni Hegai, enoko* ya mwene onaawehaweha asithiyanaawe ni ephwanelihiweke.

⁴ Mwaamwali owo eera amusivelihe mwene ti yoowo aarowa okhala pwiyamwene erandelo ya Vaxeti.” Miruku iye saamusivela mwene, analamula opakiwa hiiho.

⁵ Vano ehuhuweene yeele aakhala musidadeni yoolipiheriwa ya oSusa muYuda a epuumba ya Benyamini iitthaniwa Mordekai, mwaana mulopwana a Yahiri, mwaana mulopwana a Ximei, mwaana mulopwana a Kixi.

⁶ Aakuxiwe oYerusaleemu vamoha ni Yekoniya, mwene a oYuda ni akina mukhottoni ni Nebukadenezari, mwene a oBabiloniya.

⁷ Owo aakhalano naamaayaawe iitthaniwa Hadasa aamunnuwihalaawe niwoko na ohikhalano atithawe naari amayawe. Mwaamwali owo aasuweliwatho ntoko Exteri, aari oovoreiha murima ni ooreeraxa. Mordekai aamukuxa ntoko mwanawe ekhwaakaru atithawe ni amayawe.

⁸ Nihimmwakaru nlamulo na mwene, yaaruuhasiwa asimwali ancipale musidadeni yoolipihiwa ya oSusa ewewawehiwaka ni Hegai. Aaruuhiwatho Exteri empa ya mwene awehawehiwaka ni Hegai aari namawehaweha a asithiyanaawe mwene.

⁹ Mwaamwali ole aamusiveliha Hegai ni aamukhavihera. Woowaakuveya aamvaha sootthuneya sooreerela ni yooca yooreerela. Aahaathanla arumeiyi asithiyana athanneeli vaate wa mwene weera emurumeele Exteri ni aamuthaamihera Exteri vamoha ni arumeiyi asithiyana ale vanipuroni nooreerela na asithiyanaawe mwene.

¹⁰ Vano Exteri khuulumme etthu ya mulokwaawe naari ya makholowaawe, niwoko Mordekai aamukhoottiha ohima.

¹¹ Khula nihuku owo anneettelela niinno niinno waattamela nipuwa na empa ya asithiyanaawe mwene weera asuwele moota aaraawe Exteri ni etthu heeni yaamukhumelela.

¹² Ahinaaye wiixoonihera wa mwene akhalaru mwaamwali, waatthuneya okwanihera eyaakha iirehereraka ophwaneliwa waahimmwale wa asithiyana: nyeeri mithannamosa ni makhura a emira*; ni nyeeri mithannamosa sikina iyo ni makhura moota mukina oowunkhela.

¹³ Aarowaawe wiixoonihera wa mwene, mwaamwali aamwaakhela sootheene seiyo aatthunaawe orowano okhuma empa ya asithiyanaawe mwene mpaka empa ya mwene.

¹⁴ Aarowawo oxekuwa ni oxaawaya aahokoleela mpatta mukina wa empa ya asithiyanaawe mwene aawehawehiwa ni Xahaxegasi, enoko* ya mwene aawehaweha ikuxosawe. Mwaamwali owo khaahokoleela wa mwene ahimusivelanxe ni ahimwiitthanenle nsina.

¹⁵ Yaaphiyalaaya emaaraawe Exteri, mwaana muthiyana a Abihaili, atatawe Mordekai, mwa yoowo aampankaawe mwaniye, Exteri khaavekenleru etthu ohiya seiye Hegai, enoko* aawehaweha asithiyanaawe mwene, aahimalaawe. Exteri annaavoreihela murima ootheene yaamoona.

¹⁶ Aaroihiwa wa mwene Ahaxeveroxi mpaanimwawe mwa mwene mmweerini wanaamuloko (eyo tiiyo mweeri Tebeti) wa eyaakha yanaathannapiili ya olamulawawe.

¹⁷ Vano mwene aamusivelaxa Exteri waapwaha asithiyana akina. Owo aahaakheleliwa ni mwene niwoko na ophwaneliwawawe waapwaha asimwali akinaawo. Hiiho aamutthuka ecireemba ya opwiyamwene, anathatuwa pwiyamwene erandelo ya Vaxeti.

¹⁸ Vahoolowaya mwene aampakela Exteri efesta etokotoko aalattulaka maneethaawe ni asitokweenaawe ootheene. Aalamulela wiitthuuwa mweelaponi sootheene, anakawa samahala mooreeranimwawe murima.

Mordekai onoonelela yoovaanelela

¹⁹ Vano asimwali oowiikosoopa yaathukumanyihiwaaya emaara yanaaveeli, Mordekai eera akilaantheene vamulako wa empa ya mwene.

²⁰ Exteri aahiipithiha exiiri ya mulokwaawe ni ephattuwelo ya makholowaawe ntoko Mordekai aamulamulenlaawe, niwoko annapwaherera otthara malamulo a Mordekai antoko aapakaawe aaraawe vaatewawe.

²¹ Nihuku nimoha, Mordekai akilaathiyeene vamulako wa empa ya mwene, arumeiyi eeli yiitthaniwa Bigetani ni Terexi yaalipelela mulako wa mwene yaanyoonyiwa emvaanelelaka omwiiva mwene.

²² Wa soothesene, Mordekai aasuwela sa yoovaanela ele, anamuthalihera pwiyamwene Exteri ni owo aalamula othaliheriwa mwene aromolaka nsina na Mordekai.

²³ Iiwexenxeene, waahooneya weera yaari ekhweeli. Arumeiyi ooweeli yaathomeiwa waatthukelelaniwa kuleele. Sootheene seiye saalempwa mulivuruni sa nyaha vamaithoni wa mwene.