Exteri 1 - Emakhuwa Bible

Vaxeti ongyeleela opwiyamwene

¹ Ti ela yeereiye mweehuhuni ya Ahaxeveroxi, mwa yoowo aalamula ilapo ncira ni miloko miili niithannapiili okhuma wIndiya mpaka oKuxe:

² Ehuhuweene yeele mwene Ahaxeveroxi aalamula akilaathenleene ehicaawe ya emwene musidadeni yoolipihiwaxa ya oSusa.

³ Vano eyaakha yanaararu moolamulanimwawe, aahaarehererela efesta maneethi ni asitokweenaawe ootheene. Yaari vaavaawo ahooleli a anakhotto a oParesi ni oMediya, asinamwane a mamwene ni maneethi a ilaposawe.

⁴ Wa mahuku ncira ni miloko mithannamiraru aahoonihera othadyirixawawe nitho waara ni ovuwa wa omwenaawe.

⁵ Emalakaru mahuku ale, mwene aapaka efesta ekinatho ya mahuku mathannameeli munttimbeni vaate wa empa ya mwene. Aahaapakela efesta ele atthu ootheene – okhuma oohittittimiheya mpaka oottittimiheyaxa yaari musidadeni ya oSusa.

⁶ Vano nttimbe naasareya iluttu sa eliinyu* yootteela ni ya kanka sitthukiweeneno annela a eparatha* ni mikhoyi sa eliinyu* yootteela ni ikuwo sooxeera – sootheene vasulu wa amarimbu a maluku maramore*. Saakhala ihice sa eyuuma yoorikaxa ni sa eparatha* ni soonyikalela sa maluku a maramore* oothatiwa oorimbelela ni ootteela ecaambuliweene ni maluku ooreeraxa makina.

⁷ Eviinyu yaawureriwa mukoomixini sa eyuuma yoorikaxa – khula koomixi oovirikana ni sikina. Yaakhala eviinyu ya emwene yincipale yoovahiwa mahala niwoko na oreerawawe murima mwene.

⁸ Mwene aalamula weera khula namalattuliwa awureke aatthunelaawe. Owo aahaalamula arumeiyi yaakawa eviinyu weera erumeeleke ehoovelaka.

⁹ Eyo eri hiiho, pwiyamwene Vaxetitho aahaapakela efesta asithiyana mpaani mwa mwene Ahaxeveroxi.

¹⁰ Yaakhala inoko* athanneeli yaamurumeela mwene, masinaaya Mehumani, Bizeta, Harebona, Bigeta, Abageta, Zetari ni Karekasi. Vano, vanihukuni nanaathannameeli, mwene ahapalaxiweene, aahaalamula inoko* awo

¹¹ weera emuruuhele pwiyamwene Vaxeti awanreene ecireemba ya epwiyamwene. Owo aatthuna owoonihera asitokweene ni maneethi ophwaneliwawawe, niwoko pwiyamwene aari ooreeraxa.

¹² Wa soothesene, emuleelaka pwiyamwene Vaxeti nlamulo na mwene, owo aakhootta orowa. Vanonto, mwene aanyoonyiwa vancipale asareiyeene isara.

¹³ Weenre wakhoveleliwa mwene waasaasa miruku sa yaale yaasuwela nnenesene malamulo ni ikano, owo aalamulela wiitthaniwa anamiruku yaasuwenle otaphulela ihuhu ni

¹⁴ yaari asinthamwenaawexa mwene. Aahuuluma ni asitokweene athanneeli a oParesi ni oMediya yaarino mapuro oopacera vakhiviru wa mwene ni yaari oottittimiheya moomweneni. Masinaaya yaari Karexena, Xetari, Ademata, Tarexixi, Meresi, Maresena ni Memukani.

¹⁵ Aahaakoha: “Kimpakeleke eheeni pwiyamwene Vaxeti? Nlamulo ninghimani? Owo khiiwelenle nlamulo na mwene Ahaxeveroxi aaleeliwaawe ni inoko*.”

¹⁶ Vano Memukani aamwaakhula mwene vamaithoni wa oottittimiheyaxa akina: “Pwiyamwene Vaxeti khaaveighale amweneru, menetho maneethi ootheene nitho miloko sa ilapo sootheene sa mwene.

¹⁷ Mweettelo wa pwiyamwene onoosuweliwa ni asithiyana ootheene akinaawo ni awosa khayaahelela asiiyaya yeeraka: ‘Mwene Ahaxeveroxi aalamula weera pwiyamwene Vaxeti arowe wa yoowo, mene owo aakhootta.’

¹⁸ Olelo vaava maneethi asithiyana a oParesi ni oMediya anoosuwela mweettelo wa pwiyamwene, ni ammwaapakela mooteene yoowo maneethi asilopwana ootheene a mwene. Eyo enootannyera niveiho ni minyakunyaku soohimala.

¹⁹ Vano, wamusivela mwene, akhalihe nlamulo na emwene ni nilepiwe vamoha ni ikano sikina sa oParesi ni oMediya siri ikano soohiceendyeya weera Vaxeti ahiphiyetho ohoolo wa mwene Ahaxeveroxi wa mahuku ootheene. Mwene amvare pwiyamwene mukina ooreerela ompwaha yoowo.

²⁰ Hiiho, nathalihiwaru nlamulo na emwene mweelaponimwawe moothemwene sitokotoko, asithiyana ootheene eniyaattittimihe asiiyaya – okhuma oohittittimiheya mpaka oottittimiheyaxa.”

²¹ Mwene ni maneethaawe yaahaakhulela miruku iye ootteeliwene moota wooweera mwene aavarela muteko yeeyo uulummaawe Memukani.

²² Aarumihela ikaratta mipatta sootheene sa omwenaawe – wa khula elapo ni khula muloko, ekarattaaya ni elepeliwaaya ni nuulumonaya. Ekaratta ele yaalamula weera khula mulopwana alamuleke vaatewawe.