Ethupululo 5 - Emakhuwa Bible

Elivuru ni eputtiputthi

¹ Vano kaahoona muntatani na moono mulopwana na Yoole okilaathiye vahiceni elivuru elempweene mpuwa ni omokoni ni iwalelo* ithannapiili.

² Kaamoona ndyelo mmoha oolipa, akhuwelaka ni nsu ntokotoko: “Taani omphwanela ohula iwalelo ni ohula elivuru?”

³ Khaawotho a wiirimu, naari a vathi, hata a vathi wa etthaya aawera ohula elivuru, hata aaweha yeeyo.

⁴ Kaahiinla vancipale niwoko na ohiphwanyaneya, naari mmoha oophwanela ohula elivuru, hata oweha mpuwamwaya.

⁵ Vano mmoha a asitokweene aakeerela: “Muhiinle, moone! Mwatto a epuumba ya Yuda, mukwankhwaari wa Davide, aawina weera ahule elivuru ni ahule iwalelo ithannapiili.”

⁶ Kaahoona Eputtiputthi yaakhala ntoko yoowiiviwa, yeemenleene eriyari ya ehice yaarukureeriwe ni ikhalelo ixexe sa okumi ni asitokweene. Eyo yaarino manyaka mathannameeli ni maitho mathannameeli ari minepa mithannamiili sa Muluku soorumiheliwa elapo yootheene.

⁷ Eyo yaahaattamela ni yaahaakhelela elivuru wa ntata na moonowaawe mulopwana na Yoole okilaathiye vahiceni.

⁸ Yaakhelaka, ikhalelo ixexe sa okumi ni asitokweene miloko miili naaxexe yaakokhorela ohoolo wa Eputtiputthi. Khula mutthu a yaale aakhalano makita ni nyaapu soopakiwa ni eyuuma yoorikaxa soosareya ni mwiixi woowunkhela, mwa yoowo ori mavekelo a atthu ootteela,

⁹ ni awo yaahiipa ecipo enyowani: “Moophwanela waakhela elivuru ni ohula iwalelosaya*, niwoko mohiiviwa ni moomuthumela Muluku atthu a epuumba, nuulumo, muloko ni elapo yootheene.

¹⁰ Nyuwo mohaakhaliha yaawo omwene ni asaserdoti* wa Mulukwaahu ni awo eniilamule vathi vaava.”

¹¹ Vano, kaaweha ni kaahiiwa nsu na andyelo oohaalikeleya. Awo yaarukureera ehice, hiiho ntoko ikhalelo sa okumi ni asitokweene,

¹² ni yaahiipa ni nsu ntokotoko: “Yoophwanela ti Eputtiputthi yiiviwe weera yaakhele owera, mihakhu, miruku, ikuru, nttittimiho, ovuwa ni ottottopela!”

¹³ Kaahiiwa soopattuxiwa sootheene siri wiirimu, vathi, vathi wa etthaya ni mphareiyani seeraka: “Wa Yoole okilaathiye vahiceni, ni wa Eputtiputthi okhale ottottopela, nttittimiho, ovuwa ni ikuru wa mahuku ootheene oohimala!”

¹⁴ Ikhalelo ixexe sa okumi saaheera: “Ame”*, ni asitokweene yaakokhorela ni yaalapa.