Ethupululo 2 - Emakhuwa Bible

Ekaratta wa ekerexa ya wEfeso

¹ “Wa ndyelo a ekerexa eri wEfeso, mulepe: Awo ti masu a Yoole orino ithenyeeri ithannapiili muntatanimwawe na moono mulopwana, ni oneetta variyari wa iyuuma soorikaxa ithannapiili sirino iveela.

² Koosuwela mitekosanyu soovihaxa ni ovilelawanyu. Koosuwela weera khamungwera waavilela atthu oonanara murima ni mwaawoota murima yaawo aniixeerela arummwa ehikhanle, ni mohoonelela weera awo ari anamalokottha.

³ Nyuwo moovilela ni moohaawa niwoko na Nsinanaka ni khamunkhulumuwa.

⁴ Wa soothesene, kookhalano yoowootherani ela nyuwo: moohiya osivelawanyu woopacera.

⁵ Muupuwelele weiwo mwamonraanyu! Murukunxe murima ni mupake miteko mwaavaraanyu ompacereroni. Mwaahirukunxa murimaanyu, nkoorweeleni ni nkivenxe vanipuroniwaya eyuumaanyu yoorikaxa erino iveela.

⁶ Wa soothesene, ela ti yooreeraanyu: Nyuwo munthanya miteko sa aNikolawo mwa seiyo Miyotho kinthanyaaka.

⁷ Yaawo arino maaru, yiiwe yeeyo Munepa onleelaaya ikerexa! Wa namawina nkimutthunihere oca sa mwiri wa okumi ori mParadisu* wa Muluku.

Ekaratta wa ekerexa ya oSmirna

⁸ “Wa ndyelo a ekerexa eri oSmirna, mulepe: Awo ari masu a Yoole ori Oopacera ni Oomalihera, Yoole aakhwiiye, ni vano ori ni okumi.

⁹ Koosuwela sohooxasanyu ni osiwaanyu, mene nyuwo muri ni mihakhu! Koosuwela oveiha wa yaawo aniixeerela aYuda ehikhanle, ereene toko eSinagoga* ya Satana.

¹⁰ Muhoove wa itthu muneeraanyu muhaawe. Miyo kinooleelani: Diyabu* anaavonyere akina a nyuwo mukaliposo weera aweerereni, ni nyuwo mmwihaawe osoondiwa woomalaka mahuku muloko. Mukhale oororomeleya mpaka okhwa ni Miyo nkoovaheeni ecireemba ya okumi.

¹¹ Yaawo arino maaru, yiiwe yeeyo Munepa onleelaaya ikerexa! Namawina kharwa ahaawa naari vakhaani okhwa wanaaveeli.

Ekaratta wa ekerexa ya oPergamu

¹² “Wa ndyelo a ekerexa eri ya oPergamu, mulepe: Awo ti masu a Yoole orino ekatana yoowiitha ninno ninno.

¹³ Koosuwela munkhalaanyu, weiwo eraayawo ehice ya Satana. Wa soothesene, nyuwo moopwaherera moota woororomeleya mwa Nsinanaka, ni khamukhoontte nroromelonanyu mwa Miyo, hata wa mahuku a Antipa, namoonaaka oororomeleya, mwa yoowo iiviwe mwa esidadeene yeeyo onkhalaawewo Satana.

¹⁴ Wa soothesene, kookhalano soowoohimahimani sikina nyuwo: Nyuwo mookhalano iwo atthu antthara mahusiho a Balaami, mwa yoowo aamuxuttihale Balaki waareiya muraakho aYixrayeli weera ece sooca sooveleeleliwa miluku sikina, ni weera epake olavilavi.

¹⁵ Mooteene yoowo mookhalano akina antthara mahusiho a aNikolawo.

¹⁶ Tivawo, murukunxe murimaanyu! Mwaahirukunxa, kinimoowa woowaakuveya ni nkaawanane yaawo ni ekatana ya eyanowaaka.

¹⁷ Yaawo arino maaru, yiiwe yeeyo Munepa onleelaaya ikerexa! Wa namawina nkimvahe emana* yoovithiwa. Nkimvahetho nluku nootteela ni nsina nnyowani noolempwa mwemmo, noosuweleiya paahi ni yoowo onaakhela.

Ekaratta wa ekerexa ya oThiyatira

¹⁸ “Wa ndyelo a ekerexa eri oThiyatira, mulepe: Awo ti masu a Mwaana a Muluku, mwa Yoowo maithwaawe ari ntoko nlumi na mooro, ni inaawosawe ntoko eyuuma yoowiitthwaxa vamooroni.

¹⁹ Koosuwela mitekosanyu, osivelawanyu, nroromelonanyu, orumeelawanyu ni ovilelawanyu, ni koosuwelatho weera miteko sooreera sa vaanaano soopwahaxa seiye sa khalayi.

²⁰ Wa soothesene, kookhalano yoowootherani ela nyuwo: Munimvilela muthiyana owo Yezabeli oniixeerela mprofeeti. Owo onaaphariha arumeiyaaka ni mahusihowaawe weera epake olavilavi ni ece yooca yooveleeleliwa miluku sikina.

²¹ Koomvaha ehuhu yoorukunxa murimaawe wa olavilavaawe, mene owo khantthuna.

²² Vano kinoomuttaruxa kimurumihelaka eretta etokotoko ni nkaaruuhele ohaawa otokotoko yaawo anraruwa ni yoowo yaahirukunxa murimaaya wa miteko owo omvaraawe.

²³ Nkiwiive anamwane a muthiyana owo. Vano, ikerexa sootheene nsisuwele weera Miyo ti Yoole onsuwela nnenesene soowuupuwela ni mirima, ni khula mutthu nkimwaakhelihe ntoko mutekwaawe omphwanelaaya.

²⁴ Wa nyuwo akina ari oThiyatira, nyuwo muhintthara mahusihowaawe ni muhisomme yeeyo awo aneeraaya ti ixiiri soowiixeraxa sa Satana, wa nyuwo kineera: nkooreyani murindi mukina,

²⁵ mene muvarexexe nnenesene yeeyo murinaanyu mpaka Miyo kineeraaka kiwe.

²⁶ Wa yoole ongwina ni onkwanihera mitekosaka mpaka ommaleloni, kinoomvaha ikuru sa olamula miloko:

²⁷ “Owo anaalamule ni ekopo ya eyuuma, ni anaapwexakase ntoko mwaapu wa oloko” –

²⁸ hiiho ntoko Miyotho kaakhenlaaka ikuru wa Atithaka. Nkimvahetho Tthanda.

²⁹ Yaawo arino maaru, yiiwe yeeyo Munepa onleelaaya ikerexa!