Ethupululo 16 - Emakhuwa Bible

Soohooxa ithannapiili sa isara sa Muluku

¹ Vano kaahiiwa nsu ntokotoko naarweela wa Empa ya Muluku, niweerelaka andyelo athanneeli: “Murowe, mwarihele vatthayani ikoomixi ithannapiili sa isara sa Muluku.”

² Ndyelo oopacera aarowa ni aarihela vathi ekoomixi, ni yaakhumelela makhwatta oonanara ni oovoreiyaxa, mwa yaale yaarino eneneero ya enama ya mmunepani ni yaalapa ecaambulowaaya.

³ Ndyelo anaaveeli aarihela mphareiyani ekoomixaawe, ni eyo yaathatuwa ephome ntoko ya namakhwa, ni itthu sootheene sa okumi sa mphareiyani saahookhwa.

⁴ Ndyelo anaararu aarihela nnyoolokoni ni anaattuuttu a maahi ekoomixaawe, ni awo yaathatuwa ephome.

⁵ Vano kaamwiiwa ndyelo aarino ikuru sa maahi ootheene, eeraka: “Othorihawanyu ti wa ekhaikhai, Nyuwo muri ni mwaari, Ootteela,

⁶ hapo awo avuuvihale ephome ya atthu oororomela ni maprofeeti, ni vano Nyuwo mohaawuriha ephome, ntoko awo aphwanenlaaya.”

⁷ Kaawiiwa altaari* yaakhulaka: “Aani, Apwiya Muluku a ikuru sootheene, othorihawanyu ti wa ekhaikhai ni woororomeleya.”

⁸ Ndyelo anaaxexe aarihela vansuwani ekoomixaawe, ni naavahiwa nsuwa ikuru weera naahise atthu ni mooro.

⁹ Awo yaahisiwa ni oviha otokotoko ni yaalapha Nsina na Muluku orino ikuru sa soohooxa iya. Wa soothesene, yaakhootta orukunxa murimaaya, naari omvuwiha Muluku.

¹⁰ Ndyelo anaathanu aarihela ekoomixaawe vahiceni ya enama ya mmunepani, ni omwene waakhala mpiphini. Atthu yaakhuura malumaaya asineenaaya, niwoko noowoona ovoreiya,

¹¹ ni yaamveiha Muluku a wiirimu niwoko na ovoreiyawaya ni makhwattaaya. Wa soothesene, yaakhootta orukunxa murimaaya wa mitekosaya.

¹² Ndyelo anaathannamosa aarihela mmoolokoni mutokweene Efratesi ekoomixaawe, ni maahaaya yaawelela weera yaarehererele ephiro mamwene anrweela ninkhuma nsuwa.

¹³ Vano kaahoona sikumaka minepa soonanara miraru soolikana ni anaphulu mmwaanomwaya edrakoni*, enama ya mmunepani ni mprofeeti oolokottha.

¹⁴ Siri minepa soonanara simpaka ineneero sootikhiniheya. Iyo sinrowa wa mamwene ootheene a elapo ya vathi, weera saathukumanyihere ekhotto ya nihuku ntokweene na Muluku a ikuru sootheene.

¹⁵ “Moone, kingwa ntoko namwiiya! Ooreelihiwa ti yoole ongwehaweha mmunepani, ni onthokorora ikuwosawe, weera aheette woohiwara, ni weera sihooniwe soowuulihasawe muru.”

¹⁶ Vano saahaathukumanyiha mamwene vanipuroni niitthaniwa vaHeberi Harmagedoni*.

¹⁷ Ndyelo anaathanneeli aarihela musulu ekoomixaawe, ni wa Empa ya Muluku naakhuma nsu ntokotoko naarweela vahiceni, neeraka: “Yoopakiwa.”

¹⁸ Waakhala overunya, oruma, itari ni otetereya otokotoko wa elapo. Khoonakhumelele otetereya wa elapo ntoko wu okhuma apattuxiwakaru mutthu mweelaponi.

¹⁹ Esidade etokotoko yaakawanyiwa mipatta miraru, ni isidade sa ilapo saamora. Muluku aamuupuwelela Babiloniya mutokweene ni aamvaha ekoomixi ya eviinyu ya isara sa isikulasawe.

²⁰ Icirumba sootheene saatthawa, ni nyaako sootheene khasawereya ophwanyiwa.

²¹ Maralala matokweene wiirimu yaahaamorela atthu, maluku matokotoko a maralala, nilemenleene nimoha-nimoha ikiilu* miloko miraru. Atthu yaamveiha Muluku niwoko na maralala, niwoko yoohooxa ele yaari yoowoopihaxa.