Ethupululo 15 - Emakhuwa Bible

Andyelo athanneeli ni soohooxa ithannapiili

¹ Kaahoona wiirimu eneneero ekina etokotoko yootikhiniheya: andyelo athanneeli yaarino soohooxa ithannapiili sookisera, niwoko ni iyo sinkwanihereya isara sa Muluku.

² Kaahoona etthu ekina yoolikana ni ephareiya ya ningaraasi yootakanseriwa ni mooro, ni mukerekheremwaya yaawo yaawinne enama ya mmunepani ni ecaambulowaaya ni nuumuru na nsinanaya. Awo yaahaakuxa amakita yaavahiwaaya ni Muluku,

³ ni yaahiipa ecipo ya Moisesi, murumeiyi a Muluku, ni ecipo ya Eputtiputthi: “Sitokotoko ni sootikhiniheya siri mitekosanyu, Apwiya Muluku a ikuru sootheene. Soowookowa ni sa ekhaikhai siri iphirosanyu, Mwene a ilapo.

⁴ Taani aneera ahiwooveni, Apwiya, ni aneera ahivuwihe Nsinananyu? Vano, Nyuwo paahi ti ootteela. Ilapo sootheene nsirwe ni nsilape ohoolowanyu, niwoko mitekosanyu sa ekhaikhai sohooniheriwa.”

⁵ Vahoolowaya kaaweha, ni yaahuleiya wiirimu Empa ya Muluku, etabernaakulu* ya onamoona.

⁶ Yaakhuma wa Empa ya Muluku andyelo athanneeli yaarino soohooxa ithannapiili. Awo ewanreene mikaandyo sootteela ni soowaara, ni yaahiitthukela vakakasani ni ekuwo yoorikaxa.

⁷ Vano emoha ya ikhalelo sa okumi ixexe yaahaavaha andyelo athanneeli ikoomixi ithannapiili sa eyuuma yoorikaxa soosareya ni isara sa Muluku onkhala mahuku ootheene oohimala.

⁸ Empa ya Muluku yaasareya mwiixi wa ovuwa wa Muluku ni ikurusawe, ni khaawo aawera ovolowa Mpaani mmwe, sihinaaye okwanela soohooxa ithannapiili sa andyelo athanneeli.