Ethupululo 11 - Emakhuwa Bible

Anamoona eeli

¹ Kaavahiwa ettheere yoolikana ni ekopo weera kiphime ni kaaheereliwa: “Murowe ni mwaphime Empa ya Muluku ni altaari*, ni mwawaalikele anamalapa ari weiwo.

² Mwahiyeke nipuwa na vaate wa Empa ya Muluku, muhiphime, niwoko nno avahiwe amalapo. Awo eniinyikale esidade yootteela wa nyeeri miloko mixexe ni miili.

³ Nkaavahe ikuru anamoonaaka eeli, ni awo eniithalihere otthunawaka wa mahuku 1 260, ewanreene esaakho ya olalamika.

⁴ Awo ari nyiri miili sa sooliveira* ni iyuuma soorikaxa piili sirino iveela sinkhala ohoolo wa Apwiya a elapo.

⁵ Akhala mukina ontthuna waananariha, mmwaanomwaya onuukhume mooro oneera waahise amwiittanaaya. Awo antthuna weerera waapaka yoonanara, eniikhwe mooteene yoowo.

⁶ Asilopwana ala aakhalano ikuru soowala wiirimu, moota wooweera ehirupe epula ehuhu eneeraaya ethalihereke otthuna wa Muluku ni ikuru sootatuxa maahi ephome ni soomana elapo ni soohooxa sootheene sakhalaru imaara eneeraaya etthune.

⁷ Awo yaamalihaka onamoonaaya, enama ya mmunepani enrweela ngwiixerani eniyaawanane, eniyaawine ni eniiwiive.

⁸ Mittembosaya nsiriheliwe mmuseweni mutokweene wa esidade etokotoko, mwa yeeyo eniitthaniwa moota wa mmunepani Sodoma ni Exipitu, weiwo athomeiwaayatho Apwiyaaya.

⁹ Wookwana mahuku mararu ni eriyari emoha ya nihuku atthu a miloko, ipuumba, muulumo ni ilapo sootheene eniiwehawehe mittembosaya, ni awo khaanrowa otthunihera weera mittembosaya sivithiwe mmahiyeni.

¹⁰ Atthu ankhala mweelaponi eniihakalale niwoko na seiyo, ni eniipake ifesta, evahanaka samahala mukina ni mukhwaawe, niwoko anamoona eeli awo yaahaakacamiha atthu ankhala mweelaponi.

¹¹ Evirakatho mahuku mararu ni eriyari emoha ya nihuku, wiiseelela wa okumi wa Muluku waahaavolowa ni awo yaaheemela, ni woova otokotoko waahaamorela yaale yaawoonne.

¹² Vano awo yaahiiwa nsu ntokotoko na wiirimu naaweerenle: “Ngweleke, ngweeke nno.” Awo yaawela munihutteni mpaka wiirimu amwiittanaya yaawehaka.

¹³ Ehuhuweene yeele emoharu waakhala otetereya otokotoko ni mpatta wanaamuloko wa esidade waahononeya. Atthu macira miloko mathannameeli yaahookhwa mootetereyani wa elapo. Atthu yaahanle ni okumi yaahoova vancipale ni yaamvuwiha Muluku a wiirimu.

¹⁴ Ii! Ohaawa wanaaveeli woovira; wanaararu onuurwe woowaakuveya.

Nipalapatta nanaathannameeli

¹⁵ Ndyelo anaathanneeli aahiipa nipalapattanawe, ni yaakhumelela masu matokotoko wiirimu, yeeraka: “Omwene wa elapo ya vathi woothatuwa omwene wa Apwiyaahu ni wa Kristuwaawe, ni Awo eniilamule mahuku ootheene.”

¹⁶ Asitokweene miloko miili naaxexe yaakilaathiye vahiceniwaya ohoolo wa Muluku yaahuuramiha ikhovesaya mpaka vathi, enamulapa Muluku,

¹⁷ yeeraka: “Nnootthapelani Nyuwo, Apwiya Muluku a ikuru sootheene muri ni mwaari, niwoko mookuxa ikurusanyu sitokotoko ni moopacera olamula.

¹⁸ Amalapo yaanyoonyiwa; ni isarasanyu soophiya. Yoophiya ehuhu yoowaathoriha akhwiiye ni yoowaatthuvela arumeiyaanyu, maprofeeti ni ootteelaanyu ni yaawo anoova Nsinananyu –asikhaani ni asitokweene – ni yoowaaphwata yaawo amphwata elapo.”

¹⁹ Vano yoohuliwa Empa ya Muluku wiirimu, ni yaahooniwa mwemmwe Arka* a wiiraanawawe. Waakhala overunya, oruma, itari, otetereya wa elapo ni maralala matokotoko.