Epacerero 9 - Emakhuwa Bible

Wiiraanyihiwa wa atthu ni Muluku

¹ Vano Muluku aamureeliha Nowe vamoha ni anamwanaawe aweerelaka: Muyaraneke ni mwaandyeereraneke weera musareyeke mweelaponi moothemwene.

² Inama sa ntuphini sootheene, ipalame, soowiipurula sootheene, ni ihopa sa mphareiya nseereke woothukumelani. Sootheene iyo moovahereriwa mmatatanimwanyu.

³ Itthu sootheene sirino okumi nsikhale yoocaanyu. Hiiho ntoko koovanghaakani soowiima weera muce, hiihotho kinoovahani itthu sootheene.

⁴ Muhikhuureke enama nlelo ereene ni ephomaaya, eyo tiiyo okumaaya.

⁵ Vano yoole aneera awiiveeni, hata mwaamunama naari mutthu Miyo kinoomuthoriha, niwoko na ephomaanyu. Miyo kinoomuthoriha yoowo aneera amwiive mukhwaawe.

⁶ Yoowo aneera ayeehe ephome ya mukhwaawe, ephomaawe eniiyeehiwe, niwoko mutthu aapathuxiwe mweekhaleloni ya Muluku.

⁷ Vano nyuwo muyaraneke ni mwaandyeereraneke. Mmwaramwareyeke elapo yootheene ni musareyeke.”

⁸ Vano Muluku aahuuluma ni Nowe vamoha ni anamwanaawe yaari ni yoowo aweerelaka:

⁹ “Kinookhaliha wiiraanawaka ni nyuwo ni ekhapiraanyutho ya muhoolo.

¹⁰ Aani, kinookhalihatho ni itthu sootheene siri ni okumi siri vamoha ni nyuwo, ipalame, mihuwo, ni inama sa ntuphini sootheene sikhumme munikulani vamoha ni nyuwo, eyo tiiyo itthu sootheene siri ni okumi.

¹¹ Wu ti wiiraana kinkhalihaaka ni nyuwo. Khasirwatho siphwatiwa itthu sootheene siri ni okumi niwoko na maahi a epula ya mirupi. Khasirwa sikhalatho mirupi sineera siphwate elapo ya vathi yootheene.”

¹² Vano Muluku aapwaherera: “Ela ti eneneero ya wiiraana kimpakaaka ni nyuwo, ni itthu sa okumi sootheene siri ni nyuwo, wa ikhapira sootheene sa muhoolo:

¹³ Muuraaka kiikaathiyaaka mmahutteni. Eniikhale eneneero ya wiiraanawaka kinkhalihaaka ni elapo ya vathi.

¹⁴ Miyo kaaruuhaka mahutte mweelaponi ya vathi ni mwemmo wakhuma muura,

¹⁵ vano nkuupuwelele wiiraanawaka ni nyuwo ni itthu sootheene sirino okumi sa moota wootheene. Khasirwa sikhala mirupi sineera siphwate elapo yootheene.

¹⁶ Imaara sootheene muura oneeraaya okhumeke mmahutteni, nkiwehe yoowo ni nkuupuwelele wiiraana woohimala variyari wa Muluku ni itthu sa okumi sootheene sinkhala mweelaponi ya vathi.”

¹⁷ Amalihaka wuuluma, Muluku aamweerela Nowe: “Ela ti eneneero kikhalinghaaka variyari wa Miyo ni ikhalelo sootheene sa okumi siri mweelaponi ya vathi.”

Anamwane a Nowe

¹⁸ Anamwane a Nowe yaakhumme munikulani aari Xemi, Hami ni Yafeti. Hami aari tiithi a Kanaani.

¹⁹ Ale yaari anamwane a Nowe. Okhuma wa yaale elapo yootheene yoomakiwa ni atthu ancipale.

²⁰ Nowe aari namalima nitho aari oopacera ophatteya ematta ya iwuuva*.

²¹ Aawura eviinyu, anahapaliwa mpakatho anarula muheemanimwawe.

²² Hami, tiithi a Kanaani aahoona ohiwara wa atithawe, anarowa waathalihera axunneiye eeli yaari vaate.

²³ Vano Xemi ni Yafeti yaakuxa ekuwo ni, yiikuttelenleene, yaawaattamela atithaya. Vanonto, yeettaka nttulittuli erowaka wa atithaya, yaahaakhuneela atithaya, ehoonaka ohiwarawaya.

²⁴ Nowe ommwareyaka ohapaliwa ni oonelelaka yeeyo aapankaawe neetthaako, aaheera:

²⁵ “Oolamphwa akhale Kanaani. Owo anaakhale ookisera a ipottha sootheene sa axunneiye!”

²⁶ Vano aapwaherera: “Ooreelihiwa akhale Yave, Muluku a Xemi! Vano, Kanaani akhale epotthaawe.

²⁷ Muluku unnuwihe elapo ya Yafeti, weera ekhapiraawe emake vamoha muheemani mwa Xemi, ni weera Kanaani akhaleke epotthaaya!”

²⁸ Sivinreene mirupi, Nowe aapwaherera okhala ni okumi iyaakha macira mararu ni miloko mithanu.

²⁹ Aakhanle ni okumi iyaakha macira mathannamaxexe ni miloko mithanu, anakhwa.