Epacerero 6 - Emakhuwa Bible

Mirupi

¹ Yaapacereya waandyeererana atthu mweelaponi, yaahaayara anamwane asithiyana.

² Vano, anamwane a Muluku yaahoona weera anamwane asithiyana a atthu yaari ooreera ni yaahiithanlela yaawo yaatthunaaya.

³ Vano Yave aaheera: “Munepaaka khoorwa omaka mwa mutthu mahuku ootheene, weenre omutthu owehereraka okhwa. Owo anaakhale ni okumi iyaakha ncira ni miloko miili paahi.

⁴ Wa mahuku ale ni vahoolowaya yaakhala aNeefili* mweelaponimu, eyo tiiyo ehuhuweene yeele anamwane a Muluku yaathelanaaya ni anamwane asithiyana a atthu yaayarelaka anamwane. Vano aNeefili* ale yaari atthu oolipaxa murima a ehuhu ya khalayi, aani atthu a epili.

⁵ Yave aahoona waandyeerereya wa sootakhala sa atthu mweelaponi ni weera soowuupuwela sa mirimasaya sannaasaasa mahuku ootheene seiye siri soonanara paahi.

⁶ Yave aathananihiwa niwoko na ompakawawe mutthu mweelaponimu, ni eyo yaamvoreya vamurimaniwawe.

⁷ Yave aaheera: “Kinoophwata omutthu mwa elapo ya vathi, mwa yoowo kipattunxaaka. Aani kinimwaaphwata atthu ootheene vamoha ni inama soopattuxiwa sitokweene ni sikhaani ni ipalame sa musulu, niwoko kooriipiwa murima woopattuxa.”

⁸ Wa soothesene, Nowe aamusiveliha Yave.

Nikula ntokotoko na Nowe

⁹ Ola ori mwaha wa Nowe: Nowe aari mulopwana mmoha oororomeleya ni oohikhalano milattu variyari wa muloko wa ehuhuwaawe. Vano owo anneetta vamoha ni Muluku.

¹⁰ Aakhalano anamwane asilopwana araru: Xemi, Hami ni Yafeti.

¹¹ Muluku aahoona weera elapo ya vathi yaasareya soonanara ni nipuhero.

¹² Muluku awehaka elapo ya vathi, aahoona sootakhala sincipale niwoko ootheene yaamanke elapo ya vathi, yaatthara iphiro sootapanyeya.

¹³ Tivawo Muluku aamweerenlaawe Nowe: “Koolakela waaphwata atthu ootheene, niwoko elapo ya vathi yootheene yoosareya nipuheronaya. Vekhaikhai, kinimwaaphwata vamoha ni elapo yootheene.

¹⁴ Mpake nikula ntokotoko na mwiri wa goferi* ni ikwartu soohiyanahiyana ni muttikitthele nnyoma mpuwa ni omokoni.

¹⁵ Mpakeke ni miringo iya: mweerakameloni imeetru* ncira ni miloko miraru niithanu, mweekhuveeloni imeetru* miloko miili ni piili ni eriyari ya emeetru*, ni orakamawaya okhuma vathi wookela osulu imeetru* muloko nitthaaru ni eriyari ya emeetru*.

¹⁶ Mpake nipatho moota wooweera ehale ekhato eriyari ya nikula ni nipatho, orakamawaya eriyari ya emeetru*. Mpake mulako mpararinimwaya ni mukawanyihe nikula mpatta mmoha vathi, mukina eriyari ni wookisera osulu.

¹⁷ Miyo kinoorupiha mirupi sincipale mweelaponi yootheene ya vathi weera kiphwate soopattuxiwa sootheene siri ni okumi. Sootheene siri mweelaponi yootheene sinimookhwa.

¹⁸ Vano kinookhaliha wiiraana ni nyuwo. Ontthuneya ovolowa munikulani nyuwo vamoha ni amwaarinyu, anamwaniinyu ni axaarayatho.

¹⁹ Vanonto, moota wootheene wa soopattuxiwa soohiyanahiyana muvoloiheke munikulani piili-piili, ethiyana ni elopwana, weera sikhale ni okumi vamoha ni nyuwo.

²⁰ Piili sa mikhalelo sootheene sa ipalame, sa asinama ni sa siniipurula sirweeke wa nyuwo weera sipwaherere ni okumi.

²¹ Mukuxeke moota wootheene wa sooca ni muthokororeke weera muce nyuwosa ni iyo.”

²² Nowe aapaka sootheene ntoko Yave aamulamulenlaawe.