Epacerero 47 - Emakhuwa Bible

¹ Yoseefe aarowa omuthalihera ihabari Farawu*: “Atithaka ni axunnaka ahoorwa wookhuma oKanaani ni mihuwosaya ni sooreelasaya sootheene ni vano ankhala mweelaponi ya oGoxeni.”

² Vahoolowaya aahaathanla athanu a axunneiye anamoonihera Farawu*.

³ Farawu* aahaakoha: “Mumvara muteko heeni?” Awosa yaamwaakhula: “Arumeiyaanyu ti akukhuli ntoko makholowaaya.”

⁴ Nlelo yaamweerelasa: “Nirwiiye omaka wenno mweehuhuni vakaani, niwoko mweelaponi ya oKanaani etala yoowirimaxa ni mihuwo sa arumeiyaanyu khasinono yooca. Vano, dyoontte, mutthunihere weera arumeiyaanyu ekhale mweelaponi ya oGoxeni.”

⁵ Farawu* aamweerela Yoseefe: “Atithinyu ni axunninyu yoorweenleni nyuwo.

⁶ Elapo ya wExipitu moovahereriwa: Atithinyu ni axunninyu emakeke mpatta wooreerelaxa wa wExipitu. Mwaahiyeke emakeke oGoxeni. Ni nyuwo moona weera akina a yaawo anoowera, mwaakhaliheke ookosoopa mihuwosaka.

⁷ Vano Yoseefe aahaarongha atithawe Yakobe wa Farawu* ni aawoonihera wa yoowo. Yakobe aamureeliha Farawu*.

⁸ Vanonto Farawu* aamukoha Yakobe: “Pwiiya, murino iyaakha ihai?”

⁹ Yakobe aamwaakhula: “Iyaakha sa mukwaahaaka mweelaponi ya vathi soophiyera ncira ni miloko miraru. Iye siri vakhaani ni soorika ni khasimphiyera iyaakha sa mukwaahaaya makholowaaka.”

¹⁰ Vano, Yakobe aamureeliha Farawu*, anapwaha.

¹¹ Hiiho Yoseefe aahaamakiha atithawe ni axunneiye ni aahaakawela mpatta wooreeraxa wooreerela wExipitu, eyo tiiyo elapo ya oRamesese, ntoko Farawu* aalamulenlaawe.

¹² Yoseefe aahaavahatho atithawe, axunneiye ni emusi yootheene ya atithawe yooca, attharihaka waatta wa anamwane a khula mutthu.

Iyaakha sa etala

¹³ Khayaariwo yooca elapo yootheene, niwoko etala yaawirima. Okhuma wExipitu mpaka oKanaani wannahaawiwa mwaha wa etala.

¹⁴ Yoseefe aahuukanya musurukhu wootheene wa atthu yaari wExipitu ni oKanaani waaliviwano etrigu atthu yaathumaaya, anarongha empa ya emwene ya Farawu*.

¹⁵ Omalakaru musurukhu wootheene mweelaponi ya wExipitu ni oKanaani, awExipitu ootheene yaamwaattamela Yoseefe emudyoonttelelaka: “Munivahe yooca. Muhinihiye nikhwaaka weenre musurukhwaahu omalaka.”

¹⁶ Vano Yoseefe aahaakhula: “Mwaahikhalano musurukhu, mukiruuhele mihuwosanyu ntoko nlivo na yooca.”

¹⁷ Hiiho yaamuruuhela Yoseefe mihuwo ni owo aahaavahasa etrigu yaakakhanyihaka ni ikavalusaya*, ikhondoolosaya, ipurisaya, imombesaya ni abuurwaaya. Ophiyera eyaakha yootheene ele owo aahaaciha yaakakhanyihaka ni mihuwosaya sootheene.

¹⁸ Eyaakha yaamala, ni eyaakha yaattharelana yaahokoleela wa Yoseefe yeeraka: “Khannookhuwani etthu nyuwo apwiyaahu. Weenre musurukhwaahu omalaka ni mihuwosahu sikhalaka sawinyu, khaninono hata etthu emoha yoowoovahani, ohikhanle axineenaahu ni imattasahu.

¹⁹ Muhinihiye nikhwaaka ni imattasahu sikhwelakhwelaka nyuwo moonaka! Munithume hiyo ni imattasahu naakakhanyihaka ni etrigu. Hiiho hiyo ni imattasahu nnikhale ipottha sa Farawu*. Munivahe etrigu weera nikhale ni okumi ni nihikhwe etala nitho weera elapo ehikhale meekhaaya.”

²⁰ Vano Yoseefe aathuma imatta sootheene sa wExipitu amuthumelaka Farawu*. Khula ngwExipitu aathumiha emattaawe woonaka weera etala ti yaaweeriha. Imatta sootheene saathatuwa sa Farawu*.

²¹ Hiiho Yoseefe aahaakhaliha awExipitu ootheene ipottha – okhwipi ni okhwipi.

²² Wa soothesene, paahi imatta sa asaserdoti* sahaathumihiwe, niwoko munlamuloni awo yannacihiwa ni Farawu* ni yaakhalela yeeyo. Tivawo yahaathuminghaaya imattasaya.

²³ Vano Yoseefe aaheerela muloko: “Mwiiwe! Olelo kohoothumasani, nyuwosa ni imattasanyu kimuthumelaka Farawu*. Mukuxe ezo ela weera mwaale mmatta.

²⁴ Mene nyuwosa mmumvahe Farawu* mpatta wanaathanu wa soohepha. Mipatta sinisihale, nsikhale sawinyu. Mvareleke muteko ntoko ezo wa imattasanyu, ni ntoko sooca sa nyuwo, anamwaniinyu ni atthu a vaatewanyu.”

²⁵ Awo yaamwaakhula:“ Pwiiyaahu, nyuwo mohoopola okumaahu! Moonoonihera onnene ni nnikhale ipottha sa Farawu*.”

²⁶ Hiiho Yoseefe aavaha nlamulo nimpwaherera mpaka olelo nneera weera mpatta wanaathanu wa soohepha wa elapo yootheene ya wExipitu ti wa Farawu*. Paahi imatta sa asaserdoti* sahaakhanle sa Farawu*.

Mahuku ookisera a Yakobe

²⁷ Vano aYixrayeli yaahiitekiha wExipitu mweelaponi ya oGoxeni. Weiwo yaaphwanya sawayasene, yaayarana, enaandyeererana.

²⁸ Yakobe aakhala iyaakha muloko niithannapiil wExipitu ni iyaakha sootheene sa okumaawe saari ncira ni miloko mixexe niithannapiili.

²⁹ Ekhuveelaka ehuhu ya okhwawawe, Yakobe aamwiitthana mwanawe Yoseefe, anamweerela: “Watthuna okisiveliha, wiikaathiki ntatananawo wiithela etakhwaaka ni okiroromeliheke weera onookoonihere onnene ni ororomeleya: Ohikivitheke mwExipitu.

³⁰ Miyo kaakhwaaka ntoko asitithaka, okivenxe wExipitu nno ni wakivithe vamoha ni yaawosa.” Yoseefe aamwaakhula: “Kinoopaka yeeyo mukivekenlaanyu.”

³¹ Yakobe aanyesera:“Olipele.” Vano Yoseefe aalipela ni Yakobe aahiixaatalela wayoophiteeraawe.