Epacerero 46 - Emakhuwa Bible

Yakoobe onthaamela wExipitu

¹ Yixrayeli aattimula ni soorelasawe sootheene. Aaphiyaawe oBerxeba, aampakela yooveleela Muluku a atithawe Isaki.

² Vano Muluku aamuulumano Yixrayeli mmooneloni moohiyuni: “Yakobe, Yakobe!” Owo aamwaakhula: “Miyo kiri va.”

³ Owo aamweerela: “Miyo ti Muluku, aani, Muluku a atithinyu. Muhoove orowa wExipitu, niwoko kinimookhalihaniwo muloko mutokotoko.

⁴ Miyo Yoomeene kinimoohoolani wExipitu ni vekhaikhai kinimoohokoloxani. Vano ntata na Yoseefe nniwale maithwaanyu.”

⁵ Yakobe aattimula oBerxeba. Anamwane a Yixrayeli yaahaakuxa atithaya Yakobe, anamwanaaya ni axaaraya mukaaroni Farawu* aaruminghaawe.

⁶ Yaakuxatho mihuwosaya ni sooreela yaaphwannyaaya oKanaani. Hiiho Yakobe aarowa wExipitu ni ekhapiraawe yootheene.

⁷ Aahaarowano wExipitu anamwanaawe, asilopwana ni asithiyana ni axisulwaawe asilopwana ni asithiyana, eyo tiiyo ekhapiraawe yootheene.

⁸ Vano masina a anamwane a Yixrayeli (eyo tiiyo Yakobe ni anamwanaawe) yaarongwe wExipitu ti ala: Rubeni, ntthaara na Yakobe.

⁹ Anamwanaawe Rubeni yaari ala: Hanokhi, Palu, Hezironi ni Karimi.

¹⁰ Anamwane a Simeyoni yaari ala: Yemuyeli, Yamini, Ohadi, Yaki, Zowari ni Xawuli, mwaana a muthiyana muKanaani.

¹¹ Anamwane a Leevi yaari ala: Gerxono, Kohathi ni Merari.

¹² Anamwane a Yuda yaari ala: Eri, Onani, Xela, Perezi ni Zera. Eri ni Onanitho yaahookhwa mweelaponi ya oKanaani. Anamwane a Perezi yaari ala: Hezironi ni Hamula.

¹³ Anamwane a Isakari yaari ala: Tola, Puwa, Yope ni Ximeroni.

¹⁴ Anamwane a Zebuloni yaari ala: Serede, Eloni ni Yaleyeli.

¹⁵ Yaari yaala anamwane Leya aamuyarannaawe Yakobe oPadan-Arami omuhiya mwanawe muthiyana, Dina. Vano ekhapiraawe yootheene yaari miloko miraru naararu.

¹⁶ Anamwane a Gadi yaari ala: Zifeyoni, Hagi, Xuni, Ezeboni, Eri, Arodi ni Ariyeli.

¹⁷ Anamwane a Axeri yaari ala: Yimena, Yixeva, Yixevi ni Beriya. Vano murokoriye aari Sera. Anamwane a Beriya yaari ala: Heberi ni Malekiyeli.

¹⁸ Ela yaari ekhapira Zilipa aamuyarannawe Yakobe. Vano aari Zilipa Labani aamvanghaawe mwanawe muthiyana, Leya, ntoko murumeiyi. Zilipa aahaayara wookwana anamwane muloko ni athannamosa.

¹⁹ Anamwane a Rakheli, mwaariye Yakobe yaari ala: Yoseefe ni Benyamini.

²⁰ wExipitu, Asenati, mwaana muthiyana a Potifari musaserdoti* mmoha a wOni, aamuyarano Yoseefe anamwane eeli ala: Manaxe ni Efrayimi.

²¹ Anamwane a Benyamini yaari ala: Bela, Bekeri, Axebeli, Gera, Nahamani, Ehi, Roxi, Mupimi, Hupimi ni Arede.

²² Ala yaari anamwane Rakheli aamuyarannaawe Yakobe – muloko ni axexe.

²³ Mwaana a Dani aari Huximi.

²⁴ Anamwane a Nafitali yaari ala: Yakhezeyeli, Guni, Yezeri ni Xileme.

²⁵ Ala yaari anamwane Biliya aamuyarannaawe Yakobe. Vano aari Biliya yoowo Labani aamvanghaawe mwanawe muthiyana, Rakheli, ntoko murumeiyi. Biliya aahaayara anamwane athanneeli.

²⁶ Ootheene yaale yaarongwe wExipitu ni Yakobe – ekhapiraawe yootheene waahiya axaaraya anamwanaawe waapwexerera yaari atthweene miloko mithannamosa ni athannamosa.

²⁷ Navetho, yaalikeleliwa anamwane eeli Yoseefe aayanraawe wExipitu, epuumba ya emusi ya Yakobe yaarongwe wExipitu yaaphiyera miloko mithannamiili.

Yakobe onkhala oGoxeni

²⁸ Vano Yakobe aamuhooliha Yuda wa Yoseefe weera asuwele moota woorowa oGoxeni, enaphiya elapo ya oGoxeni.

²⁹ Yoseefe aawela ekaaro, anarowa oGoxeni weera aakumaneno atithawe Yakobe. Akumanakaru ni atithawe, aatthimaka weera aakhubaare, ni aakhubaaraka yaawo, aahiinla vancipale apisaka omaala.

³⁰ Yakobe aamweerela Yoseefe: “Vano kikhweeke hapo kohoona ekhovaawo ni koosuwela weera weyo nlelo mukumi!”

³¹ Yoseefe aaweerela axunneiye ni emusi yootheene ya atithawe: “Kinoorowa kaaleele aFarawu* weera axunnaka ni emusi yootheene ya atithaka yaamanke mweelaponi ya oKanaani, ahoorwa wenno.

³² Nkeere weera asilopwanaawo akukhuli ankosoopa mihuwo ni aarwaano mihuwosaya ni sootheene arinaaya.’

³³ Vano Farawu* alamula owiitthanani ni ookohani: ‘Mumvara mutekoni?,’

³⁴ mwamwaakhule ha: ‘Arumeiyaanyu anghuwa muhuwo okhuma enamwanaaya ntokotho yaapakaaya makholowaaya.’ Hiiho munootthuniheriwa omaka mweelaponi ya oGoxeni, niwoko akukhuli ootheene ari oonyoosiwa ni awExipitu.”