Epacerero 45 - Emakhuwa Bible

Yoseefe oniisuweliha wa axunneiye

¹ Emaareene yeele Yoseefe aahooceela ovilela. Aahaalamula yaale yaamvarela muteko: “Mukivenyerase.” Vano hiiho khaawo aahanle ni yoowo ehuhu Yoseefe iisuwelihaawe wa axunneiye.

² Yoseefe aakhuwela iinlaka moota wooweera mpaka awExipitu wiiwa, ni ihabari iye saaphiya vaate wa Farawu*.

³ Yoseefe aaweerela axunneiye: “Miyo ti Yoseefe. Atithaka nlelo akumi?” Mene ale yaatteenguwa vamaithoniwawe woohiwera omwaakhula.

⁴ Yoseefe aaweerela axunneiye: “Mukikhuveele.” Awosa emwaattamelakaru, aaweerela: “Miyo ti Yoseefe, munninyu yoole mwaamuthumihalaanyu wExipitu.

⁵ Vano muhiithananiherase, naari muhiixoove niwoko na okithumiha wenno. Aari Muluku aakirumihale ohoolowanyu weera ancipale ekhale ni okumi.

⁶ Hapo nrino iyaakha piili emvolaaya etala mweelaponi ni iyaakha ithanu sinrwa, khoorwa olimmwa naari ohemphwa.

⁷ Muluku ookirumiha ohoolowanyu weera akhapelele ekhapiraanyu mweelaponimu, ni weera avuluxe okumaahu moota wootikhiniheya.

⁸ Khamuhiyono nyuwosa mukiruuhale nno, mene aani Muluku muneene. Owo ookikhaliha ntoko namalaka a Farawu* ni muhooleli a vaatewawe wootheene ni elapo yootheene ya wExipitu.

⁹ Muhokoleele woowaakuveya wa atithaka, mwaweerele: ‘Mwaninyu, Yoseefe, eenre ha: ‘Muluku ookikhaliha pwiiya a wExipitu wootheene. Nrwe wenno woowaakuveya.’

¹⁰ Nyuwosa mmwakhale elapo ya oGoxeni, ni hiiho mmwikhale vakhiviruwaka, nyuwosa vamoha ni anamwaniinyu, nitho osuulwaanyu, ikhondoolosanyu ni imombesanyu, ni sooreelasanyu sootheene.

¹¹ Miyo nkookhavihereni ni yooca, niwoko nlelo soohala iyaakha ithanu sa etala. Moota ola nyuwo ni amusaanyu ootheene ni mihuwosanyu sootheene khasirwa sihaawa.

¹² Nyuwosa ni munnaka Benyamini muneera moonaka ni maithwaanyu weera vekhaikhai ti miyo kinuuluma ni nyuwosa.

¹³ Mwaaleele atithaka ovuwawaka wootheene wExipitu, ni sootheene nyeenyuweenesa moonnaanyu, ni mwaawiihe nno atithaka woowaakuveya.”

¹⁴ Vano iinlaka, owo aamutuphela munneiye Benyamini anamukhubaara, ni Benyaminitho aamukhubaara, iinlaka.

¹⁵ Woottharelana, Yoseefe aahaabeca axunneiye ootheene ni aahiinla ni yaawosa. Vahoolowaya paahi yaawenraaya ontthekulano.

¹⁶ Wiiwanyeyakaru wa Farawu* weera axunneiye Yoseefe ahoowa, owo ni anamalakaawe ootheene yaahakalalasa.

¹⁷ Farawu* aamweerela Yoseefe: “Waaleele axunneiyo weera eweliheke mirittisaya mwaaxinamanimwaya, ehokoleeleke elapo ya oKanaani.

¹⁸ Muhokoleeleke nno mwaaruuhaka atithinyu ni emusaanyu. Kinimoovahani nipuro nooreeraxa na wExipitu ni nyuwosa mmweereke ocano sooruuweriwa sa elapo ela.

¹⁹ Mwaalamuleleketho weera ekuxe ikaaro sikina sa wExipitu weera yaaruuhelekeno axaaraya, anamwanaaya ni atithaya.

²⁰ Muhitthukuruwe ni sooreelasanyu, niwoko sooreerelaxa sootheene sa wExipitu nsikhale sawinyu.”

²¹ Vano anamwane a Yixrayeli yaapaka yeeyo. Yoseefe aahaavaha ikaaro ntoko Farawu* aalamulenlaawe, anaavahatho yooca wa mukwaahaaya.

²² Wa khula mutthu aamvaha ikuwo sikina sinyowani. Wa soothesene, aamvaha Benyamini ixekeli* macira mararu ni ikuwo sinyowani sincipale.

²³ Aahaarumihela atithawe abuuru muloko ekunxeene sooreerelaxa saari wExipitu ni abuuru asithiyana muloko ekunxeene etrigu, ipaawu ni sooca sikina sa munkwahani.

²⁴ Vahoolowaya aahaaraxela axunneiye ni, epwahaka, Yoseefe aaweerela: “Muhicocopolaneke mphironi!”

²⁵ Vano yaavenya wExipitu, enahokoleela wa atithaya, elapo ya oKanaani

²⁶ ni yaahaathalihera ihabari iya: “Yoseefe ori ni okumi! Mwa yeeyo: Ti mutokweene a wExipitu wootheene.” Yakobe owanoni waamuuma ni khaawaakhulela.

²⁷ Mene emuthaliherakaru sootheene Yoseefe aaweerenlaawe, ni oonaka Yakobe ikaaro Yoseefe aaruminghaawe sookuxeriwano, munepaawe waakakhamuwa.

²⁸ Yakobe aaheera: “Kooviriyeliwa! Mwanaka Yoseefe nlelo mukumi! Kinoorowa kamoone kihinaaye okhwa.”