Epacerero 40 - Emakhuwa Bible

Yoseefe ontaphulela sooloha

¹ Vahoolowaya yaaheereya weera namarumeela a soowura ni namooxa ipaawu a amwene a wExipitu yaahaapahula apwiyaaya, amwene a wExipitu.

² Farawu* aahaanyoonyeriwa vancipale asitokweene eeli ale, mutokweene a anamarumeela soowura ni mutokwene a anamooxa ipaawu,

³ analamulela otthukiwa vaate wa mutokweene a anamalipelela, mukaliposomwene mwemmwe aaraawemo Yoseefe.

⁴ Mutokweene a anamalipelela aamulamulela Yoseefe waawehaweha ni waarumeela yaawo. Eviraleene ehuhu ekina,

⁵ namarumeela a soowura ni namooxa ipaawu a amwene a wExipitu yaari mukaliposo, yaalohasa. Khula mutthu aakhalano yoolohaawe, ooweeli ohiyu omoha, ni khula yooloha yaakhalano etaphulelowaaya.

⁶ Oxaawaya, Yoseefe aarowa waaxekura, anawoona weera yaari oohitteene.

⁷ Owo aahaakoha anamiteko ale a Farawu* yaatthukiwetho vaate wa apwiyaaya: “Heeni nyuwo olelo muraanyu oohitteene?”

⁸ Vanonto, awo yaamwaakhula: “Niwoko hiyo ooweeli nooloha, mene khaawo ongwera onitaphulela soolohasahu.” Yoseefe aaweerela: “Ti Muluku paahi ongwera onitaphulela sooloha. Mukithalihere seiyo mulonghaanyu.”

⁹ Mutokweene a anamarumeela a soowura aamuthalihera Yoseefe yoolohaawe: “Moolohanimwaka kohoona ohoolowaka evideira*.

¹⁰ Vano mwireene yoowo waakhalano iphandi tthaaru, onaphuwa makukhu, onakhalano ithutu, oniima mukhucenimwaya iwuuva* siitthwa.

¹¹ Mmatatanimwaka kaakhalano ekoomixi ya Farawu*. Kaakuxa iwuuva*, kinaamela mukoomixini ya Farawu*, kinaavaherera ekoomixi mmatatanimwaya.”

¹² Yoseefe aamwaakhula: “Yoothapulela ti ela: Iphandi tthaaru sintaphulela mahuku mararu.

¹³ Evinreene mahuku mararu, Farawu* anootaphule ni anoohokoloxere muteko waavaraawo khalayi. Hiiho onuuwinnyerere ekoomixi mmatatanimwaya a Farawu*, ntoko waakhovelenlaawo khalayi waaraawo mutokweene a anamarumeela a soowura.

¹⁴ Kinoovekela weera wakuupuwelele miyo, itthu saaweettelaka nnenesene, ni waadyoonttelele aFarawu* weera yuupuwelele mulattwaaka weera miyo kikhume mukaliposo mu.

¹⁵ Hapo kiroonyesererihiwa mweelaponi ya aHeberi nitho nno kheewo kipankaaka weera kiwaleliwe mukaliposomu.”

¹⁶ Iiwaka mutokweene a anamooxa ipaawu etaphulelo yooreerela ele, aamweerera Yoseefe: “Vano miyotho kooloha kiirengyeene mipapara miraru sa ipaawu sootteela.

¹⁷ Mumpaparani kiirengyaaka waakhala moota wootheene wa ipaawu ni soococowa soohiyanahiyana saasiva aFarawu*. Vanonto, saahoowa ipalame, sinaca seiyo kiirengyaaka.”

¹⁸ Yoseefe aamwaakhula: “Etaphulelo ti ela: “Mipapara miraru sintaphulela mahuku mararu.

¹⁹ Eviraleene mahuku mararu, aFarawu* eniilamulele ohitiwawawo ni onuutthukeleliwe mmwirini, moota wooweera ipalame sinimoowa wookhuura.”

²⁰ Eviraleene mahuku mararu yaari efesta yoowuupuweleliwa oyariwa wa Farawu*, ni owo aahaarehererela anamalakaawe yooca. Vamaithoni wa ootheene aalamulela oruuhiwa mutokweene a anamarumeela a soowura ni a anamooxa ipaawu weera erowe ohoolowawe.

²¹ Aamuhokoloxeratho mutekwaawe mutokweene a anamarumeela a soowura, moota wooweera ole aahokoleela okhala yoole aamwinnyerera ekoomixi Farawu*.

²² Vaheera aamutthukelela mmwirini mutokwene a anamooxa ipaawu, ntoko Yoseefe aataphulenlaawe.

²³ Wa soothesene, mutokweene a anamarumeela a soowura khamuupuwelenle Yoseefe. Ohiyanawaya, aamuttiwalaxa.