Epacerero 4 - Emakhuwa Bible

Kayini ni Abeli

¹ Vano Adamu aamukonano Eva ni owo aarupala, anamuyara Kayini. Eva aaheera: “Ni ekhavihero ya Yave koomuyara mwaana mulopwana.”

² Vahoolowaya aamuyara Abeli, munneiye Kayini. Abeli aari mukukhuli aarino muhuwo ni Kayini aari namalima.

³ Eviraka ehuhu, Kayini aamuruuhela Yave soowiima sa vatthayani ntoko yooveleela.

⁴ Abelitho aamuruuhela Yave mipatta sooneneva sa ikhondoolo ntoko yooveleela wa seiye saari matthaara. Yave aasivelihiwa ni Abeli ni sooveleelasawe

⁵ mene khaasivelihiwe ni Kayini ni sooveleelasawe. Tivawo Kayini aanyoonyiwaawe vancipale ni ekhove yaammora.

⁶ Vano Yave aamweerela Kayini: “Heeni munyoonyingwaanyu? Heeni muhihakalanlaanyu?

⁷ Mwapaka yeeyo eri yooreera, munimwaakhuleliwa. Mwaahipaka yeeyo eri yooreera, vano yoottheka yoohiireherera wootuphelani vamulako. Eyo enghaawela woowinani, mene ontthuneya weera nyuwo muhiihiyerere ni yeeyo.

⁸ Kayini aamweerela munneiye: “Nrowe omatta.” Ereene hiihaale mmatta, Kayini aammana munneiye, anamwiiva.

⁹ Vahoolowaya Yave aamukoha Kayini: “Ori woowi munninyu?” Owo aahaakhula: “Nkisuwenle. Apaale kiri namalipelelaawe?”

¹⁰ Yave aamukoha: “Mpanke eheeni? Mwiiwe, ephome ya munninyu enkikhuwelela Miyo vatthayani.

¹¹ Vano oolaphiwa ti nyuwo mweelaponimu, mwa yeeyo ehunle eyanowaaya weera yaakhele ephome ya munninyu nyuwo mmwiivalaanyu.

¹² Mwaalimaka ematta, kheerwatho eruwera. Mmwikhale namarwa oohikhalano wiitthuuwa mweelaponimu.”

¹³ Kayini aamweerela Yave:“Nttaruxonaka ti noopwahaxa yeeyo kingweraaka ovilela.

¹⁴ Olelo munkoomola mweelaponimu ni nkikhalatho vakhoveniwanyu. Nkikhale ootthawatthawa oohikhalano wiitthuuwa mweelaponi ni akhalaru mutthu aneera akiphwanye, onookiiva.”

¹⁵ Yavetho aamwaakhula: “Khoorwa weereya hiiho. Mukina amwiiva Kayini, anaahaawe woohaalikeleya.” Yave aamwiikaathera Kayini eneneero weera ahikhale mutthu aneera amphwanya, amwiive.

¹⁶ Vano Kayini aasusa vamaithoni wa Yave ni aarowa omaka mweelaponi ya oNodi, mpatta ninkhuma nsuwa wEdeni.

Ekhapira ya Kayini

¹⁷ Kayini aakonano mwaariye ni owo aarupala, anamuyara Henoki. Vahoolowaya Kayini aateka esidade emoha, mwa yeeyo aatteha nsina na mwanawe Henoki.

¹⁸ Henoki aamuyanre Irade; Irade aamuyanre Mehuxayeli; Mehuxayeli aamuyanre Metusayeli ni Metusayeli aamuyanre Lameki.

¹⁹ Lameki aahaathela asithiyana eeli – mmoha iitthaniwa Ada ni mukina Zila.

²⁰ Ada aamuyanre Yabali aari tiithi a ootheene yaale yaakhala muheemani ni yaahuwa mihuwo.

²¹ Nsina na munneiye naari Yubali aari tiithi a ootheene yaawiipa amakita ni ampetta.

²² Nave Zila, aamuyanre mwaana mulopwana iitthaniwa Tubal-Kayini aahana iyuuma sootheene soorikaxa sa ebronze* ni iyuuma. Murokoriye Tubal-Kayini aari Nahama.

²³ Lameki aaweerela axaariye: “Ada ni Zila mukiiwe; axaara a Lameki mwiiwelele maswaaka: Miyo kaamwiiva mulopwana mmoha niwoko na okivulaliha, aani mmiravo mmoha niwoko na okimana.

²⁴ Kayini iinleliwa ikuhu imaara ithannapiili, vano Lameki imaara soohaalikeleya!

²⁵ Adamu aakonanotho mwaariye ni owo aamuyara mwaana mulopwana mukina iitthaniwa Seeti, eeraka: “Muluku ookivaha mwaana mulopwana mukina vanipuroni na Abeli, eenre Kayini amwiivaka.”

²⁶ Vanonto Seeti aamuyara mwaana mulopwana mukina aamuttenghaawe nsinanawe Enoxi. Wa ehuhuweene yeele atthu yaapacera wiitthana Nsina na Yave.