Epacerero 39 - Emakhuwa Bible

Yoseefe vaate wa Potifaari

¹ Yoseefe aaroihiwa wExipitu. Potifari, namuteko mutokweene a Farawu* ni mutokweene a anamalipelela a vaate wa Farawu*, aamuthumale ni aYixmayeli, mwa yaawo yaamuroihalewo.

² Yave aari ni Yoseefe ni aamukhavihera weera sootheene simweettele nnenesene ni aakhala vaate wa apwiyaawe ngwExipitu.

³ Potifari, asuwelakaru weera Yave aari ni Yoseefe ni weera sootheene aavaraawe sannamweettela nnenesene,

⁴ aamuhakalalela vancipale Yoseefe, anamukhaliha muhooleli a itthusawe. Potifari aamuhiyera okosoopa vaatevawe amuroromelaka ni sootheene aarinaawe.

⁵ Okhuma ahiyeriwakaru vaate wa Potifari ni sooreelasawe sootheene, Yave aareeliha vaate wa ngwExipitu ole niwoko na Yoseefe. Vanonto mareeliho a Yave yaari mwa sootheene Potifari aaraaweno okhumela vaate mpaka mmatta.

⁶ Owo aamuhiyera okosoopa Yoseefe sootheene aarinaawe, ni khaapwattharu etthu, ehikhanle yoocaawe. Yoseefe aari mulopwana ooyareya ni oophwaneliwa.

⁷ Eviraka ehuhu ekina, amwaarawe Potifari yaamuhaawelaxa, ni awo yaamveka Yoseefe weera aakoneno.

⁸ Yoseefe aakhootta, anamweerela mwaaraya apwiyaawe: “Moone, apwiyaaka khaampwattha itthu sa vatthokoni siri ni miyo, mpaka aakinnyerera mmatatanimwaka itthusaya sootheene.

⁹ Khawowo mutthu mukina a vaate va ookipwaha miyo. Sootheene kinlamula ti miyo woohiyani nyuwo paahi muri amwaaraya. Moota heeni miyo kineeraaka kipake etthweene yeeyo yoonanara kimutthekelaka Muluku?”

¹⁰ Hiiho naari awo yaamunyeserereene Yoseefe khula nihuku, owo aamukhootta okonano yaawo ni annasemba owaattamela.

¹¹ Nihuku nimoha, Yoseefe aavolowa mpaani weera avare mutekwaawe, ni khaarimo naari murumeiyi mmoha.

¹² Awo yaamvara malayaawe, enamweerela: “Owe okone ni miyo!” Owo aatthawela vaate, aahiyeraka malayaawe mmatatanimwaya.

¹³ Awo yoonakaru weera wootthawa aahaahiyera malayaawe mmatatanimwaya,

¹⁴ aawiitthana arumeiyi akina a vaatevene vaavaale, anaweerela: “Mooneke! muHeberi ole niruuheliwaahu weera aniruwane. Owo aavolowa mu, aneerera okiveiha, mene miyo kaakhuwela vancipale.

¹⁵ Vano owo akiiwakaru miyo kikhuwelaka, ookihiyera malayaawe, anatthawela vaate.”

¹⁶ Muthiyana ole aathokorora malaya ale, mpaka orwa wa apwiyaawe Yoseefe.

¹⁷ Vano yaahaaphitela mwaha ole: “Murumeiyi ole muHeberi muniruuhenlaanyu, ookaattamela weera akiruwane.

¹⁸ Mene kikhuwelakaru, aakihiyera malayaawe, anatthawela vaate.”

¹⁹ Apwiyaawe Yoseefe, yiiwakaru masu muthiyana aathalihenraawe: ‘Ti hiiho murumeiyaanyu okeenraawe,’ yaanyoonyiwa.

²⁰ Apwiyaawe Yoseefe yaarumiha oroweliwa Yoseefe, enamvonyera mukaliposo yaawaleliwaayamo anamatthukiwa a mwene. Vano Yoseefe aakhala mukaliposo.

²¹ Vawo Yave aari ni yoowo, amooniheraka oreerawawe murima ni amutatuxaka mutokweene a mukaliposo weera amureereliwe murima Yoseefe.

²² Tivawo mutokweene a mukaliposo aamvaherenraawe Yoseefe waawehaweha anamatthukiwa ootheene, ni itthu sootheene saapakeya mmwe. Yoseefe ti aalamula moota seeraaya sipakeyemo.

²³ Mutokweene a mukaliposo kheewo aapwatthaawe mwa itthu saari ni Yoseefe, niwoko Yave aari ni yoowo. Hiiho sootheene Yoosefe aapakaawe, sannamweettela nnenesene.