Epacerero 38 - Emakhuwa Bible

Mwaha mmoha wa Yuda ni Thamari

¹ Mweehuhuweene yeele Yuda aamwalamwala ni axunneiye, anarowa okhala nivaate na mulopwana mmoha a wAdulami iitthaniwa Hira.

² Weiwo, Yuda aamphwanya muthiyana muKanaani iitthaniwa Xuwa, anamuthela, anakonano.

³ Owo aarupala, anamuyara mwaana mulopwana, mwa yoowo aamuttenghaawe Eri.

⁴ Vahoolowaya, aarupalatho, anamuyara mwaana mulopwana, anamutteha Onani.

⁵ Vano aamuyaratho mwaana mulopwana mukina, anamutteha Xela. Owo aayariwe Yuda areene oKezibi.

⁶ Yuda aamuthanlela Eri, Mwanawe a ntthaara, muthiyana mmoha iitthaniwa Tamari weera amuthele.

⁷ Wa soothesene, Yave khawaamusivenle mweettelo wooriheya wa Eri, ntthaara na Yuda, tivawo aamwiivalaawe.

⁸ Yuda aamweerela Onani: “Othelaneke ni naamukweli a munneiyo, weera okwanihere ekhovelelo ya nikelampa ni yoowo, ni weera hiiho ekhumelele ekhapira wa amunnawaawo.”

⁹ Onani aasuwela weera ekhapira ele khayaakhala yawawe. Tivawo, khula emaara aakonaaweno naamukhweli, owo annarihela vathi olopwanaawe weera ahihiye ekhapira wa amunnawaawe.

¹⁰ Mukhaleloweene yoole khawaamusivenle Yave, tivawo aamwiivalaawetho.

¹¹ Yuda aamweerela Tamari, mwaara a mwaniye: “Ohokoleeleke wa atithawo ni wakhalekewo ntoko naamukhweli, mpaka aneeraawe unnuwe mwanaka Xela.” Vano Yuda aamoova weera owo anaakhwe ntoko axunneiye. Hiiho Tamari aarowa okhala vaate wa atithawe.

¹² Eviraka ehuhu ekina, aahookhwa mwaariye Yuda, mwaana muthiyana a Xuwa. Oviraleene wiinanela, Yuda aarowa oTimena owoona anamamettha a muhuwaawe vamoha ni nthamwenaawe Hira, ngwAdulami.

¹³ Aleeliwakaru Tamari: “Atatinyu ari mphironi ya oTimena weera emetthe ikhondoolosaya,”

¹⁴ owo aaceendya ikuwosawe sa onaamukhweli, anakhuneela ekhovaawe ni ekuwo, anakilaathi vamulako wa wEnayimi ori mphironi ya oTimena. Owo aapaka yeeyo niwoko aahoona weera Xela ohunnuwa, ni nlelo eera ahinaaye othelana ni yoowo.

¹⁵ Yuda amoonakaru, uupuwela weera aari puuta, niwoko owo aakhuneela ekhovaawe.

¹⁶ Ahisuwelaka weera aari mwaara a mwanawe, aamurowela muxexere wa musewe, anamweerela: “Orwe va. Kintthuna wookonano.” Tamari aamwaakhula: “Mmukivahe eheeni weera mukikonane?”

¹⁷ Owo, aamwaakhula: “Kinimoorumihela epuri emoha ya muhuwaaka.” Ole aamwaakhula: “Khamunkivaha yookiroromeliha mpaka muneeraanyu mukirumihele yeeyo?”

¹⁸ Owo aamukoha: “Yoororomeliha heeni kineeraaka koovahe?” Owo aamwaakhula: “Munelaanyu woottittelano ni eciikhwe nitho ekopowaanyu mvarenlaanyu mmatatani.” Owo aamvaha yeeyo, anakonano ni ole aarupala.

¹⁹ Vahoolowaya owo aarowa, anarula ekuwo iikhuneenlaawe, anahokoleela owara ikuwo sa onaamukhweli.

²⁰ Yuda aarumiha epuri, amwinnyereraka nthamwenaawe ngwAdulami, weera aakhele yoororomelihiwaawe muthiyana ole, mene khaamphwannye.

²¹ Vanonto, aahaakoha atthu a elapweene yeele: “Ori woowi puuta a wEnayimi onkhovelela okilaathi mukerekhere wa ephiro?” Awo yaamwaakhula: “Nno khawoworu puuta.”

²² Ole aahokoleela wa Yuda, anamweerela: “Nkimphannye ni, ohiya hiiho, atthu a nipuro nne yeenre weera khawoworu puutawo.”

²³ Yuda aamwaakhula: “Omuhiyekeno, weera nihitheiwe. Ekhaikhai ti weera koomurumihela epuri, mene weyo khoomphwannye.”

²⁴ Siviraleene nyeeri miraru, yaamweerela Yuda: “Mwaara a mwaninyu Tamari, ooraruwa, ni mooraruwanimwawe oorupala.” Vano Yuda aawaakhula: “Munkhumihere vaate weera ahisiwe mukumi!”

²⁵ Owo aakhumiheriwaawe vaate, aahaarumihela atithaya aiyawe mutthenga ola: “Miyo kirupalihiwe ni mulopwana ori muneene a itthu iya. Mooneke nnenesene weera munsuwele muneene taani a munela woottittelano ola, eciikhwe ela ni ekopo ela.”

²⁶ Yuda aasuwela weera saari sawawe, aneera: “Ola ti oororomeleya okipwaha miyo, niwoko kaaheereke omwinnyerera mwanaka Xela.” Vanonto khaamukonannetho.

²⁷ Ephiyerakaru ehuhu ya oyara, yaari maphapo mmirimanimwawe.

²⁸ Eyariwaka hiihaale, mmoha a yaawo aakhumihera vaate ntata, ni namayariha aakuxa nliinya nooxeera anamulutta mmoononimwawe eeraka: “Ola ti opacenre okhuma.”

²⁹ Owo aahokoloxa ntata, ni oopacera oyariwa aari mukina! Vano namayariha aaheera: “Khuu! Ophutunle moota heeni woowaakuveya?” Vano aamutteha Perezi.

³⁰ Vahoolowaya aakhuma munneiye aarino nliinya nooxeera mmoononimwawe, anattehiwa Zera.