Epacerero 37 - Emakhuwa Bible

Oloha wa Yoseefe

¹ Yakobe aamaka elapo ya oKanaani, weiwo yaamankaayawo atithawe ntoko namarwa.

² Mwaha wa emusi ya Yakobe ti ola: Yoseefe aarinaawe iyaakha muloko niithannapiili sa okumaawe, annakosoopa mihuwo vamoha ni axunneiye yaari anamwane a Biliya ni a Zilipa yaari ikuxo sa opottha sa atithawe. Vano aahaathalihera atithawe ohinnene wa axunneiye.

³ Yixrayeli aamusivelaxa Yoseefe waapwaha anamwane akina, niwoko aamuyanre ngwuuluvalanimwawe. Tivawo aaruminghaawe ottottheliwa mukaandyo woorakama.

⁴ Axunneiye, yoonakaru weera atiithi annimusivelaxa yoowo waapwaha anamwane akina, yaamuthanya ni khayaawera omuulumano ni murettele.

⁵ Emaara emoha Yoseefe aaloha ni aathaliherakaru axunneiye, awosa yaatepaxa omuthanya.

⁶ Yoseefe aaweerela: “Mwiiwe etthu kilonghaaka.

⁷ Neera nitthukaka irece sa etrigu mmatta, vano erecaaka yaaheemela ni irecesanyu saatakanserana sirukureeraka yawaka ni saahuuramela ohoolowaya.”

⁸ Axunneiye yaaheera: “Weeraka weyo onookhala mwenaahu? Onghima weera weyo onrowa onilamula?” Vano yaatepaxa omuthanya mwaha wa olohawawe, ni yeeyo aahimmaawe.

⁹ Vahoolowaya Yoseefe aalohatho, anaathaliheratho axunneiye. Owo aaweerela: “Koolohatho. Ni emaara ela nsuwa ni mweeri ni ithenyeeri muloko nimmoha saahuuramela ohoolowaka.”

¹⁰ Aathaliherakaru yooloha ele atithawe, ni axuneiye, atithawe yaamveihera enamweerela: “Moota heeni wa oloha weyo olonghaawo? Weeraka miyo ni amayawo nitho axunneiyo ninrowa wookokhorela ohoolowawo?”

¹¹ Hiiho, axunneiye yaamukhalela ehace. Vanonto atithawe yeera yuupuwelelaka yeeyo mmurimanimwaya.

Yoseefe onthumihiwa ni axunneiye

¹² Axunneiye Yoseefe yaarowa ociha muhuwo wa atithaya waattamela oXekhemi.

¹³ Yixrayeli aamweerela Yoseefe: “Axunneiyo anciha muhuwo oXekhemi. Vano kintthuna weera weyo orowewo.” Yoseefe aawaakhula: “Kinoorowa.”

¹⁴ Yakobe aapwaherera: “Orowe woone sootheene seettaka nnene ni axunneiyo nitho muhuwo, ni okiruuhele ihabari. Yakobe aamurumihale areene vareyareyani na oHeberoni. Vano Yoseefe aathweelela aattamelaka oXekhemi.

¹⁵ Vawo mulopwana mmoha aamuphwanya axoraxoraka ntuphini, anamukoha: “Onaasa eheeni?”

¹⁶ Owo aamwaakhula: “Kingwaasaasa axunnaka. Moosuwela weiwo awosa ancihaayawo muhuwo?”

¹⁷ Mulopwana ole aamwaakhula: “Awosa aapwaha va. Miyo kiwiiwale yeeraka: ‘Nrowe oDotani.’” Hiiho Yoseefe aarowa awaasaka axunneiye, anaaphwanya vakhiviru ni oDotani.

¹⁸ Axunneiye yaamoona arwaaka ottaiwene, ni owo ahinaaye ophiya, yaavaanela omwiiva.

¹⁹ Yaaheerelana mukina ni mukhwaawe: “Namaloha ole ti yoole ongwa vale.

²⁰ Nrowe nimwiive, nitho nimvonyere muhimeni emoheemoha ya seiya. Vano nneereke: ‘Mwamunama mmoha a ntuphini oomukhuura.’ Nnoone eniyeereiye ni soolohasawe.”

²¹ Iiwakaru yeeyo Rubeni aatthuna waahiiha omwiiva aweerelaka: “Nihimwiive.”

²² Aaheeratho: “Muhivuuvihe ephome. Mumvonyereke muhimeni mmwe eri munikareni, mene muhimpake etthu yoonanara.” Etthu aatthunaawe yaari omoopola mmatatanimwaya ni omuhokoloxera wa atithawe.

²³ Yoseefe aphiyakaru, awosa yaamurula mukaandyowaawe ole woorakama aawanraawe,

²⁴ yaamvara, enamvonyera muhimeni yoowelela yahaakhanle maahi.

²⁵ Ekilaathiki weera ece, yaahoona ottaiwene mukuttula wa aYixmayeli yaakhuma oGiliyade. Akamelowaaya yaalemeliwa itthu sooreerela, balsamu* ni emira*, ni iyo yaaroiha wExipitu.

²⁶ Yuda aaweerela axunneiye: “Nniwine eheeni namwiiva munnihu niipithihaka okhwawawe?

²⁷ Nrowe naathumihere aYixmayeli ale. Nihimpaketho etthu yoonanara, niwoko munnihu xaxaxa, ooyariwano.” Axunneiye yaamwaakhulela yoowo.

²⁸ Ananakoso aYixmayeli a oMidiyani ale yaattamelakaru, axunneiye yaamukhumiha Yoseefe muhimeni, enaathumihera aYixmayeli ni ixekeli* miloko miili. Awosa yaamuroiha wExipitu.

²⁹ Ahokoleelakaru Rubeni ohimeni, ni oonaka weera Yoseefe khaakhanlemo, aahaahula soowarasawe,

³⁰ anahokoleelatho wa axunneiye, anaweerela: “Mmiravo khamomo! Vano miyo kikeleke woowi?”

³¹ Axunneiye yaamwiiva nampunci, enakuxa mukaandyo wa Yoseefe, enattikitthelano mukaandyo,

³² enaarumihela atithaya mutthenga ola: “Noottotta ola. Moone waari wa mwaninyu.”

³³ Yakobe aasuwela, anakhuwela: “Vekhaikhai ti mukaandyo wa mwanaka. Mwaamunama a ntuphini oomukhuura! Yoseefe oonyaanyiwa!”

³⁴ Vano Yakobe aahaahula soowarasawe, anawara esaakho, ni aathananaxa mahuku mancipale amwiinlelaka mwanawe.

³⁵ Anamwanaawe asilopwana ni asithiyana yanneerera ompepesa, mene owo aakhootta opepesiwa, eeraka: “Hoye! Kinoomwiinlela mpaka kineeraaka kikhale vamoha ni mwanaka mookhwaani.” Vano owo aapwaherera omwiinlela.

³⁶ Ehuhuweene yeeyo aMidiyani yaamuthumiha Yoseefe emuthumiheraka Potifari aari namuteko mutokweene a Farawu* ni mutokweene a anamalipelelaawe.