Epacerero 35 - Emakhuwa Bible

Yakobe onghokoleelatho oBeteli

¹ Muluku aamweerela Yakobe: “Mvenye nno ni mwamake oBeteli, ni wu mwamutekele altaari* Muluku, mwa Yoowo iixoonihenre wa nyuwo mwaatthawaka amunnawaanyu Esawu.”

² Yakobe aaweerela yaawo a vaatewawe nitho yaawo aaraaweno: “Mwiitapuxe wa miluku sa anamarwa siri variyariwanyu. Mwiitteelihe ni muceendye ikuwo.

³ Nrowe nithaamele oBeteli. Kintthuna kamutekelewo altaari* Muluku okikhavihenre miyo kaaraaka moothananani, ni okihoonle mmapuroni moothemwene miyo keettaaka.”

⁴ Yaamvaha Yakobe miluku sootheene sa anamarwa yaarinaaya, ni axiveeve yaawanraaya. Vano Yakobe aathipela sootheene muxerexere mwiri wa ekarivalyu* waattamela wa oXekhemi.

⁵ Awo ettimulakaru, Muluku aahaaruuhela amaki a isidade iye yaavinraaya woova vancipale, moota wooweera khaawo aatthimakenle anamwane a Yakobe.

⁶ Yakobe ni ootheene yaari ni yoowo yaaphiya oLuzi, eyo tiiyo oBeteli, elapo ya oKanaani.

⁷ Weiwe aamutekela altaari* Muluku, anatteha nipuro nne El-Beteli, niwoko iwe Muluku aahiixoonihera wa yoowo aatthawaawe amunnawaawe.

⁸ Vano Debora, murumeiyi a Rebeka, aahookhwa, anavithiwa vathi wa mwiri wa ekarivalyu* waattamela oBeteli. Tivawo Yakobe aattenghaawe nipuro nne Aloni Bakuti.

⁹ Ahokoleelaka Yakobe oPadan Aram, Muluku aahiixooniheratho wa yoowo, anamureeliha,

¹⁰ amweerelaka: “Nsinananyu ti Yakobe, mene vano khamurwa mwiitthaneliwatho Yakobe; nsinananyu nnikhale Yixrayeli.” Hiiho aamutteha Yixrayeli.

¹¹ Aamweerelatho: “Miyo ti Muluku a ikuru sootheene. Muyaraneke ni mwaandyeereraneke. Vano muloko, aani mpaka miloko sincipale, nsikhumelele mwa nyuwo, ni eniikhale mamwene variyari wa ekhapiraanyu.

¹² Elapo kaamvanghaaka Abrahaamu ni Isaki, kinoovahanitho nyuwo, ni kinoovaha mooteene yoowo ekhapirwaanyu.”

¹³ Vahoolowaya Muluku aawela wa nipuro nne uulummaawe ni yoowo.

¹⁴ Yakobe aaheemexa nrimbu na nluku vanipuroni nenenenne Muluku aamuulumannaawe, anamiinela yooveleela yoowura ni aattikitthela makhura.

¹⁵ Yakobe aatteha nipuro nne Muluku uulummaawe ni yoowo Beteli.

Okhwa wa Rakheli

¹⁶ Yaattimula oBeteli, ni exuurakamelanneene ni wEfrata, Rakheli aapacera oyara ni mahooxo matokotoko.

¹⁷ Woowoona hiiho, namayariha aamweerela: “Muhoove, mookhalano va mwaana mulopwana mukina!”

¹⁸ Vano ahaleelaka okhwa, aamutteha mwaana ole Ben-Oni, mene atithawe yaamuttenghe Benyamini.

¹⁹ Rakheli aahookhwa, anavithiwa mukerekhere ephiro enrowa wEfrata, eyo tiiyo oBeteleheemu.

²⁰ Yakobe aaheemexa nrimbu vanihiyeni na Rakheli, ni mpaka olelo va nrimbu nne nri ekanyero ya nihiye na Rakheli.

²¹ Yixrayeli aattimulatho, anakunga eheemaawe ohoolo wa oMigedal Ederi.

²² Amankeene nlelo elapweene yeele, Rubeni aamukonano Biliya, ekuxo ya atithawe. Yixrayelitho aasuwela yeeyo. Yakobe aakhalano anamwane muloko neeli.

Anamwane a Yakobe

²³ Yaayariwe ni Leya yaari Rubeni, nttharanawe Yakobe, Simeyoni, Leevi, Yuda, Isakari ni Zebuloni.

²⁴ Yaayariwe ni Rakheli yaari Yoseefe ni Benyamini.

²⁵ Yaayariwe ni Biliya, murumeiyi a Rakheli, yaari Dani ni Nafitali.

²⁶ Yaayariwe ni Zilipa, murumeiyi a Leya, yaari Gadi ni Axeri. Ti yaala anamwane a Yakobe yaayareliwe oPadan Aram.

²⁷ Vahoolowaya Yakobe aarowa waaxekura atithawe, Isaki, oMamre, vakhiviru ni oHeberoni, eyo tiiyo oKiriyati. Ti weiwo Abrahaamu ni Isaki yaamankaaya.

²⁸ Isaki aakhalano iyaakha ncira ni miloko mithannamiraru sa okumaawe.

²⁹ Okhwiiye akwaaxeiyeene, anavithiwa athukumanyihiwaka vamoha ni makholowaawe. Vano, anamwanaawe, Esawu ni Yakobe, yaamvitha.