Epacerero 34 - Emakhuwa Bible

Onyakulihana wa anamwane a Yakobe ni atthu a oXekhemi

¹ Emaara emoha, Dina, mwaana a Leya aamuyarenlaawe Yakobe, aavenya weera aasuwele asithiyana a elapo ele.

² Vano, Xekhemi, mwaana a Hamori, muHivi, aalamula elapweene yeele, aamoona, anamvara ni ikuru, anamukoniha.

³ Murimaawe waasivelaxiwa ni Dina, mwaana a Yakobe, ni aamusivela mwaamwali ole, anamuulumano amunyeengaka.

⁴ Tivawo Xekhemi aarongwaawe waaleela atithawe Hamori eeraka: “Mwakuurele mwaamwali ole weera kimuthele.”

⁵ Yakobe aasuwelaawe weera mwaniye Dina aaveihiwa, anamwanaawe yeera ereene ntuphini ni muhuwo. Tivawo aaweherenraawe emaalelo mpaka ohokolowawaya.

⁶ Hamori, atithawe Xekhemi, yaarowa wuuluma ni Yakobe.

⁷ Ehokolowakaru anamwanaawe Yakobe ntuphini, ni esuwelaka sootheene, yaathananaxa ni onyoonyiwa. Niwoko Xekhemi aapaka etthu yoowuulihaxa muru oYixrayeli woomukoniha mwaana a Yakobe – etthu ehineeriwa!

⁸ Hamori aaweerela: “Mwanaka, Xekhemi, oosivelaxiwa ni mwaninyusa. Dyoontte, mmwinnyerere owo weera amuthele.

⁹ Nithelaneke yoohiru. Munivaheke anamwaniinyu asithiyana, ni nyuwo mwaakuxeke awihu.

¹⁰ Mwiitekiheke ni hiyo. Elapwaahu moohuleliwa nyuwosa. Mmakekemo, mumpakekemo nakoswaanyu ni mphwanyeke sawinyusene.”

¹¹ Xekhemi aahaavekela atithawe ni axirokoriye Dina: “Dyoontte mwaakhulele. Miyo kiri oolikaneene woovahani yeeyo nyuwo muneeraanyu mukivekele.

¹² Hata mwaandyeereraka muttengo nitho yoovaha wa omutthomera, kinimoolivani yeeyo muneeraanyu mukivekele. Paahi mukivahe mwaamwali ola weera kimuthele.”

¹³ Anamwanaawe Yakobe yaahaakhula yaalokotthasaka Xekhemi ni atithawe, Hamori, mwaha woomukoniha murokoraya Dina.

¹⁴ Vano yaaheera: “Khoongwereya opaka yeeyo nimvahereraka murokorihu wa mulopwana oohiineliwa. Napaka yeeyo, eniikhale yoonuuliha muru.

¹⁵ Hiyo nnaakhulele yoohimaanyu ni yoohimaahu: weera nyuwosa mwaakhulele wiineliwa asilopwanaanyu ootheene, ntoko ekhovelelowaahu.

¹⁶ Vahoolowaya, nneeraahu noovaheeni, anamwanaahu ni nnithelelaneke ni awinyu. Hiyo nnimakeke ni nyuwosa, ni nnikhale muloko mmoha paahi.

¹⁷ Mwaahaakhulela wiineliwa, ninoomukuxa murokorihu nipwaheke.”

¹⁸ Vano, yoohimaaya yaamureera Hamori ni mwanawe Xekhemi.

¹⁹ Xekhemi, mmiravo oottittimiheyaxa a ootheene a vaate wa atithawe, khaalekenle okwanihera yaavekenlaaya, niwoko vekhaikhai aamutthunaxa mwaana a Yakobe.

²⁰ Hamori vamoha ni mwanawe Xekhemi yaarowa vamulako wa esidade weera yuulume ni atthwaaya yeeraka:

²¹ “Atthu awo ti a murettele. Mwaatthunihere weera emakeke mweelaponimwahu, ni muumu empakeke nakoswaaya ni hiyo, niwoko nookhala nipuro nookwana wa yaawo. Vano naatheleke anamwanaaya, ni awo yaatheleketho awihu.

²² Vano, awo eniilikane okhala ni hiyo ntoko muloko mmoha, naakhulela weera asilopwanaahu ootheene yiineliweke ntoko awotho yiinelingwaaya.

²³ Muupuwelele weera mihuwosaya, inamasaya, sooreelasaya ni iyuumasaya soorikaxa sinoowereya okhala sawihu. Vano naakhuleleke otthunawaya weera awo ekhaleke ni hiyo.”

²⁴ Atthu ootheene yaathukumanne vamulako wa esidade yaahaakhulela masu a Hamori ni Xekhemi, ni asilopwana ni asimiravo ootheene a esidade ele yaahiinelasiwa.

²⁵ Eviraleene mahuku mararu a wiineliwa, nlelo ehaawaka ovoreya wa wiineliwa, anamwane eeli a Yakobe, Simeyoni ni Leevi, axirokoriye Dina, yaakuxa ikatanasaya, enavolowa musidadeni ehihovelaka etthu, enawiiva asilopwana ootheene.

²⁶ Vanonto yaamwiiva ni ikatana Hamori vamoha ni mwanawe Xekhemi, enamukhumiha Dina mpaani mwa Xekhemi, enapwaha.

²⁷ Asinamwane akina a Yakobe yaavolowa musidadeni ni eviraka saaraaya mittembo, yaahuhula esidade weiwo murokoraya aaveihingwaawewo.

²⁸ Yaakuxasa ikhondoolo, imombe, abuuru ni sootheene saari musidade ni mmatta.

²⁹ Yaahaakuxa asithiyana, anamwane, mihakhusaya sootheene nitho sootheene yaaraayano mmampaani.

³⁰ Yakobe aamweerela Simeyoni ni Leevi: “Nyuwosa mookiwayawayiha mukiruuhelaka osoondiwa ni aKanaani ni aPerizi, asimwaneene muumu. Hiyo nri vakhaani ni awosa yatakansa ikurusaya, ni yanirweela miyo ni amusaaka nniiphwatiwe.”

³¹ Awo yaamwaakhula: “Wookhala nnene murokorihu omukhaliha ntoko puuta?”