Epacerero 3 - Emakhuwa Bible

Yoottheka yoopacera

¹ Vano enowa yaari ni miruku soolokottha opwaha inama sootheene sa ntuphini Yave Muluku aapankaawe. Enowa yaamukoha muthiyana: “Ti yeeyo Muluku eenraawe: ‘Muhice naari yoowiima emoha ya nyiri sa ematta’?”

² Muthiyana aahaakhula enowa: “Ninoowera oca soowiima sa nyiri sa mmatta,

³ mene Muluku eenre: ‘Muhice yoowiima ya mwiri ori eriyari ya ematta hata muhitave weera muhikhwe.’”

⁴ Enowa yaamweerela muthiyana: “Vekhaikhai, khamurwa mukhwa!

⁵ Muluku oosuwela weera vanihukuni nyuwo muneeraanyu muce, maithwaanyu eniihuleye ni mmwikhale ntoko Muluku, musuwelaka yooreera ni yoonanara!”

⁶ Oonakaru muthiyana weera mwiri ole waalikana woosiva wa nlumi, woohaaweleya wa maitho ni, ohiya toko yeeyo, woomvorenghela murima weera aphwanye miruku, aarukula yoowiima ya mwiri ole, anaca, anamvaha iyawe ni owotho aahooca.

⁷ Maitho a ooweeli ale yaahuleya ni yaahoona weera khayaawanre. Vano yaakohola makukhu a efiigu* weera yiittiyeleleno.

⁸ Iiwaka mulopwana ni mwaariye mikhitto sa Yave Muluku eettaka mmatta yoopaka epheyo ya oxekuwa, yaahiipitha vamaithoni wa Yave Muluku variyari wa nyiri sa mmatta.

⁹ Vano Yave Muluku aamwiitthana mulopwana amukohaka: “Muri woowi nyuwo?”

¹⁰ Owo aamwaakhula: “Kohiiwa mikhittosanyu mmatta ni kinoova niwoko kiri pwitipwiti, tivawo kiipinthaaka.”

¹¹ Vano Muluku aamukoha: “Taani ooleenleni weera khamuwanre? Nyuwo murimooca yoowiima ya mwiri, mwa yoowo Miyo kookhoottihenraakani oca?”

¹² Mulopwana aaheera: “Ti muthiyana mukivanghaanyu ntoko mukhwaaka okivanghe yoowiima ya mwiri ni miyo kohooca.”

¹³ Yave Muluku aamukoha muthiyana: “Eheeni nyuwo mpankaanyu?” Vano muthiyana aamwaakhula: “Enowa yookilokottha ni miyo kohooca.”

¹⁴ Yave Muluku aaheerela enowa: “Weenre opakaka yeeyo – oolaphiwa ti weyo variyari wa mihuwo sootheene ni variyari wa inama sa ntuphini. Ngwiipurule ni erukuluwaawo ni ngweesele ntthupi mahuku ootheene a okumaawo.

¹⁵ Nkiittanihe variyariwawo ni muthiyana, variyari wa ekhapiraawo ni ya muthiyana. Owo anaaswanye murwaawo ni weyo onuulume etthottopwaawe.”

¹⁶ Aamweerela muthiyana: “Nkaattihe vancipale ohaawa wa orupalawanyu. Moohaawani nyuwo munimwaayara anamwane. Yoohaawelaanyu eniikhale wa ayinyu ni owo onimoolamulani.”

¹⁷ Vano aamweerela mulopwana: “Mweenre mmwiiwelelaka mwaarinyu ni muca yoowiima ya mwiri, mwa yoowo Miyo koolamulenlaakani weera muhice, yoolaphiwa ti etthaya niwoko na nyuwo. Mmwice ni ohaawa otokotoko mwa yeeyo mookuminimwanyu wa mahuku ootheene.

¹⁸ Eyo eniyoovaheeni malaxi a nyiiwa ni ontthuneya weera nyuwo muceeke soomela sa mmatta.

¹⁹ Mmweereke oca yoocaanyu muvaraka muteko moota woovihaxa mpaka muneeraanyu muhokoleele vatthayani. Vano mmwivenxiwe mwa yeeyo, niwoko nyuwo ntthupi ni mmwihokoleele wa ntthupini.”

²⁰ Adamu aamutteha mwaariye Eva, niwoko owo aarwa othatuwa maayi a omutthu wootheene.

²¹ Yave Muluku aapaka soowara sa ixapala ni aahaawariha seiye Adamu ni Eva.

²² Vanonto Yave Muluku aaheera: “Vano mutthu oothatuwa ntoko Hiyo asuwelaka yooreera ni yoonanara. Khoontthuniheriwa weera owo arukuleke yoowiima ya mwiri wa okumi weera ace ni akhale ni okumi mahuku ootheene.

²³ Tivawo Yave Muluku aamoomonlaawe mmatta ya wEdeni weera alimeke mutthayani mwa mwemmwe owo aakhumihiwaawe.

²⁴ Amoomolakaru mulopwana, Yave Muluku aawiikaathi mpatta wa ninkhuma nsuwa wa ematta ya wEdeni akerubini* ni ikatana sa mooro ni saattikinyeya elipelelaka ephiro enrowa wa mwiri wa okumi.