Epacerero 29 - Emakhuwa Bible

Yakobe omphiya vahimeni ya oHarani.

¹ Vano Yakobe aapwaherera mukwaahaawe, anarowa elapo ya amaki a ninkhuma nsuwa.

² Nihuku nimoha, awehaka mukhwipi, aahoona ehime ntuphini ni mihuwo miraru sa ikhondoolo siixaatalenleene mukerekheremwaya, hapo mihuwo iye saawura ehimeene yeele. Vano ehime ele yaakhuneeliwa ni nluku ntokotoko.

³ Tivawo mihuwo sootheene saathukumanaayawo, akukhuli yannapirikixa nluku naawaleliwa ehime, enawuriha maahi ikhondoolo ni vahoolowaya yaamuhokoloxera nluku nne vahimeni.

⁴ Vano Yakobe aahaakoha: “Axunna nyuwosa ti a woowi?” Awosa yaamwaakhula: “Hiyo ti a oHarani.”

⁵ Vanonto owo aahaakohatho: “Moomusuwela Labani musulwaawe Nahori?” Awosa yaamwaakhula: “Aani, noomusuwela.”

⁶ Owo aapwaherera: “Owo ori salaama?” Ni awosa yaaheera: “Aani, ori salama. Mmooneke mwaamwali ole onrwa vale ni ikhondoolo. Ti mwanawe Rakheli.”

⁷ Owo aaheera: “Hapo nlelo othana, kheehiyono ehuhu ya othukumanya muhuwo. Fataari ngwuriheke maahi ikhondoolo, ni muroweke mwaciheke.”

⁸ Vano awosa yaamwaakhula: “Khoongwereya mihuwo sootheene sihithukumanne, ni nluku nihipirikixingwe ninkhuneeleliwa ehime. Nto ningwurihaahu ikhondoolo.”

Yakobe onkumana ni Rakheli

⁹ Owo nlelo eera atthekulaka, aarwiiyaawe Rakheli ni ikhondoolo sa atithawe, niwoko owo aari mukukhuli.

¹⁰ Yakobe amoonaka Rakheli, mwaana a Labani, acimweenaaya amayawe ni ikhondoolosaya, aahaattamela, anapirikixa nluku naakhuneeleliwe ehime, anawuriha ikhondoolo sa atatawe Labani.

¹¹ Yakobe aambeeca Rakheli, aniinla akhuwelaka.

¹² Vanonto Yakobe aamuthalihera Rakheli weera aari mmusi a atithawe nitho weera aari mwaana a Rebeka. Rakheli aatthimaka, anarowa waaleela atithawe.

¹³ Iiwaka Labani ihaali sa Yakobe, musulwaawe, aamutthimakela, anamukumanano, anamukhupaara, anambeeca. Vahoolowaya aamukuxa amurowanaka owaani. Wu Yakobe aamuthalihera itthu sootheene saamukhumelenle.

Othela wa Yakobe

¹⁴ Labani aamweerela: “Vekhaikhai weyo mmusaaka xaxaxa. Yakobe areene vaate wa Labani wookwanaka mweeri mmoha,

¹⁵ Labani aamweerela: “Wookhala mmusaaka khoontaphulela weera onoovara muteko wa siiyo. Okileele nlivo heeni kineeraaka koolive?”

¹⁶ Labani aarino anamwane asithiyana eeli. Nsina na mutokweene naari Leya ni na mukhaani Rakheli.

¹⁷ Vano maitho a Leya yaari oohiphwaneliwa, mene Rakheli aari ooreera ni oophwaneliwa.

¹⁸ Hapo Yakobe aamusivelaxa Rakheli, aamwaakhula: “Kinimoovarelani muteko iyaakha itthannapiili mukiliveleke mwaninyu mukhaani ori Rakheli.”

¹⁹ Labani aamweerela: “Fataari omuthela weyo ohikanle omuthela akhalaru mukina. Okhaleke va ni miyo.”

²⁰ Hiiho Yakobe aamvarela muteko iyaakha ithannapiili amweerelaka Rakheli. Wa soothesene, vamaithoniwawe yaari ehuhu ekhaani niwoko na omusivelaxawawe.

Labani onimulokottha Yakobe

²¹ Vano Yakobe aamweerela Labani: “Mukivaheke mwaaraka niwoko iyaakha naavarihannaahu sookwanela. Kintthuna ovolowa ntheli”

²² Labani aahaathukumanyiha atthu ootheene a nipuro nne, anapaka efesta.

²³ Wa soothesene, wiilakaru, Labani aamuronghela Yakobe Leya ni Yakobe aakonano.

²⁴ Vanonto, Labani aamvaha Leya epotthaawe Zilipa weera amurumeeleke.

²⁵ Oxaawaya aahoona weera aari Leya! Tivawo aamweerenlaawe Labani: “Mukipankeni? Koovara muteko kimweerelaka Rakheli! Vano Mukilokontthenleni?”

²⁶ Labani aamwaakhula: “Mweelaponimwahumu khookhoveleliwe hiiho weera atheliweke toko mukhaani mutokweene ahinaaye.

²⁷ Okwanihereke esimanaawe ola, vano nnoovahetho mukhaani wavara muteko iyaakha ithannapiilitho.”

Yakobe onimuthela Rakheli

²⁸ Yakobe aahaakhulela, anakwanihera esimanaawe ole. Vahoolowaya Labani aamvaha Rakheli, mwanawe, weera amutheleke.

²⁹ Labani aamvaha Rakheli epotthaawe Biliya weera amurumeeleke.

³⁰ Aamuthelatho Rakheli, aari yoowo aamukupaleenlaawe ompwaha Leya. Aamvarelatho muteko Labani iyaakha ithannapiili.

³¹ Yave oonaka weera Leya khaapwatthiwa, aamvahera oyara, vaheera Rakheli aari mwali eekupa.

Anamwane asilopwana a Leya

³² Leya aarupala, anamuyara mwaana mulopwana mmoha, anamutteha Rubeni, niwoko aaheera:“Yave ohoona othananawaka, vano aiyaka anookisivela.”

³³ Aarupalatho, anamuyara mwaana mulopwana eeraka: ”Vanonto Yave oonaka weera miyo nkinsiveliwa, ookivahatho ola. Ni aamutteha Simeyoni.”

³⁴ Aarupalatho, anamuyara mwaana mulopwana aneera: “Emaara ela aiyaka anootepa okitthunaxa miyo, niwoko kohaayarela anamwane araru.” Tivawo amuttenghaawe Leevi.

³⁵ Aarupalatho, anamuyara mwaana mulopwana, aneera: “Emaara ela kinoomuttottopela Yave.” Tivawo aamuttenghaawe Yuda, anahiya oyara.