Epacerero 25 - Emakhuwa Bible

Abrahaamu onimuthela Ketura

¹ Vano Abrahaamu aamuthela muthiyana mukina iitthaniwa Ketura.

² Owo aamuyarela anamwane ala: Zimerani, Yokixani, Medani, Yixbaki ni Xuwa.

³ Yokixani aamuyanre Xeba ni Dedani. Vano ekhapira ya Dedani yaari awAxuri, Aletuxi ni aLewumi.

⁴ Anamwane a Midiyani yaari Efa, Eferi, Hanoki, Abida ni Eldaha. Ootheene ala yaari a ekhapira ya Ketura.

⁵ Abrahaamu aamuhiyera Isaki sootheene aarinaawe.

⁶ Vano wa anamwane akina a ikuxosawe sa okaporo yaakhala ni Abrahaamu, aahaavaha itthu sikina aarinaawe ni areene nlelo ni okumi, aahaarumihela mpatta wa ninkhuma nsuwa weera ehikhale vamoha ni mwanawe Isaki.

⁷ Abrahaamu aakhala ni okumi iyaakha ncira ni miloko mithannamiili niithanu.

⁸ Aakhwiiye uuluvanleene, ni misingu sitokweene, anavithiwa athukumanyihiwaka vamoha ni makholowaawe.

⁹ Vano anamwanaawe Isaki ni Iximayeli yaamvitha munikhukuni na oMakipela waattamela oMamre, mmatta mwa Efroni, mwaana a Zowari, muHiti.

¹⁰ Yaari ematta Abrahaamu aathummaawe ni aHiti. Ti weiwo Abrahaamu ovithiwaawe vamoha ni mwaariye Sara.

¹¹ Vahoolo wa okhwa wa Abrahaamu, Muluku aamureeliha mwanawe Isaki. Vano, Isaki aamanke vakhiviru wa oBeher-Lahi-Royi.

Anamwane a Iximayeli

¹² Okawanyeya wa ekhapira ya Iximayeli, mwaana a Abrahaamu aayareliwaawe ni epottha Hagari ngwExipitu Sara aamvanghaawe ti wu:

¹³ Masina a anamwane a Iximayeli alempwale ettharihiwaka oyariwawaya ti ala: Nebayoti, ntthaara na Iximayeli, Kedari Adibeeli, Mibsami,

¹⁴ Mixma, Duma, Masa,

¹⁵ Hadadi, Tema, Yeturi, Nafixi ni Kedema.

¹⁶ Yaari ti yaala anamwane muloko neeli a Iximayeli, yaathatungwe asitokweene a ipuumbasaya. Mittetthesaya ni mapuro yaamankaaya yaahaakhela masinaaya.

¹⁷ Iximayeli aakhala ni okumi iyaakha ncira ni miloko miraru niithannapiili. Aahookhwa, anavithiwa athukumanyihiwaka vamoha ni makholowaawe.

¹⁸ Vano anamwanaawe yaamwaramwareya variyari wa elapo wookela oHavila ni oXuri, vakhiviru ni mwiinano ni wExipitu, ohoolo wa mutthu arowaka wAxuri. Vano yaakhala oohiiwanana ni axunnaya ootheene.

Esawu ni Yakobe

¹⁹ Ola ti mwaha wa emusi ya Isaki, mwaana a Abrahaamu. Abrahaamu aamuyanre Isaki.

²⁰ Vano Isaki aarino iyaakha miloko mixexe aathelanaawe ni Rebeka, mwaana muthiyana a Betuweli, ngwArami a oPadan-Arami, ni murokoriye Labani, ngwAramitho.

²¹ Vano Isaki aamvekela Yave mwaha wa mwaariye, niwoko owo aari mwali eekupa. Yave aamwaakhula nivekelonawe ni Rebeka, mwaariye, aarupala.

²² Asinamwane yaamukakhana mmirimanimwawe, tivawo eenraawe: “Heeni enkikhumelelaaya yeela?” Vano aarowa omukoha Yave.

²³ Yave aamweerela: “Miloko miili sa atthu siri mmirimanimwanyu. Miloko miili sa atthu sinookhuma murukulunimwanyu. Mmoha wa seiyo onuukhale woolipaxa, mene mutokweene anamurumeele mukhaani.”

²⁴ Vano ephiyaka ehuhu ya oyara waasuwanyeya weera mmirimanimwawe yaakhala maphapo.

²⁵ Mwaana aapacenre oyariwa aari ooxeera vancipale ni erutthu yootheene yoosareya mapururu, tivawo yamutthenghaaya Esawu.

²⁶ Vahoolowaya aayariwa munneiye ntatanawe nivanreene etthottopwa ya Esawu, mwa yoowo yaamutthenghaaya Yakobe. Vano ehuhu Rebeka aayaraawe, Isaki aarino iyaakha miloko mithannamosa.

²⁷ Asinamwane ale yaahunnuwa. Esawu aathatuwa namalupattha ooweraxa ni wannamusivela mutuphini. Vaheera Yakobe aari mutthu oomaala ni wannamusivela okilaathi paahi muheemani.

²⁸ Isaki aamukupaleelaxa Esawu, niwoko owo aatthunaxa enama, vaheera Rebeka aamukupaleelaxa Yakobe.

²⁹ Vanonto emaara emoha, Yakobe eera aapeyaka nrupantakanse, Esawu aahokolowaawe mutuphini avoliweene etala.

³⁰ Owo aamvekela: “Okimeele vakhaani nrupantakanse nooxeera nno vawo. Koovoliwa etala.” Tivawo iitthaniwaawetho Edomi.

³¹ Vano Yakobe aamwaakhula: “Okithumihereke toko soophwanela sa ontthaara.”

³² Esawu aaheera: “Kihanle vakhaani okhwa, yoopwattheya ti eheeni okhala ntthaara?”

³³ Wa soothesene, Yakobe aamunyeserera: “Olipele toko.” Hiiho ole aalipela amuthumiheraka munneiye soophwanela sa ontthaara.

³⁴ Vano Yakobe aamurumeela Esawu, amvahaka yooca ni nrupantakanse na irooro. Owo aahooca, anawura, aneemela, anarowa. Hiiho Esawu aaderera soophwanela sa ontthaara.