Epacerero 24 - Emakhuwa Bible

Othela wa Isaki

¹ Abrahaamu aahuuluvala vancipale, ni Yave aamureeliha mwa sootheene.

² Vanonto aamweerela murumeiyaawe mutokweene aawehaweha sootheene aarinaawe sa vaatevawe: “Wiikaathi ntatanawo vatakhwiniwaka

³ ni omulipele Yave Muluku a wiirimu nitho a elapo ya vathi weera ohimwaasere muthiyana mwanaka variyari wa anamwane asithiyana a oKanaani, eriyari ya yaawo miyo kimankaaka.

⁴ Vano ontthuneya weyo orowa elapwaaka weera waamuthanlelewo mwanaka Isaki muthiyana eriyari ya asinaangolowaaka.”

⁵ Murumeiyi ole aamukoha: “Ankha muthiyana owo aahitthuna okitthara elapweene yeela? Kimuroiheke mwaninyu elapo yeeyo mukhumelenlaanyu?”

⁶ Abrahaamu aamwaakhula: “Nnene! Ohimuhiye mwanaka ahokoleelaka weiwo.

⁷ Yave Muluku a wiirimu, aakivenxale vaate wa atithaka ni elapwaaka kiyariwaaka ni aakiroromelinghe ni nlipelo weera aarwa ovaha elapo ela ekhapiraaka, anaamurumihe ndyelowaawe ohoolowawo, weera weiwo wamuruuhele muthiyana mwanaka.

⁸ Vano muthiyana owo aahitthuna orwa wenno, weyo khoonono mulattu ni nlipelo, mene ohimuhokoloxere mwanaka wuuwu.”

⁹ Murumeiyi aahiikaathi ntatanawe vatakhwini wa Abrahaamu, apwiyaawe, analipela weera anaakwanihere masu ale.

¹⁰ Vanonto, murumeiyi ole aavenya ni ahaaci muloko a apwiyaawe, akuxakatho itthu sikina sooreeraxa sa apwiyaawe. Aavenya arowaka oMesopotamiya, mpatta wa esidade Nahori aamankaawe.

¹¹ Vano, wiilaka, aahaakokhoriha aahaaci muxerexere wa ehime ya ottuttuwani yaari okhwipi wa esidade ele. Yaari ehuhu emoharu yeeyo asithiyana a esidade ele yaakhovolenlaaya orika maahi ohimeni.

¹² Vano aavekela: “Yave, Muluku a apwiyaaka Abrahaamu, mukivahe nihuku nna etthu yooreeraxa, ni mukhale ni murima wooreera mwaakhalelaka apwiyaaka Abrahaamu.

¹³ Ntoko munoonaanyu, kiri va mukhwipi wa ehime ela ni asimwali a muloko wa esidade ela anrwa orika maahi.

¹⁴ Muntthunihere weera kamweerela mwaamwali: ‘Okivahe maahi’ ni owo aneera: ‘Ngwure ni kinimwaavaha akamelowaanyu maahi,’ vano, akhale yoowo munthanlenlaanyu murumeiyaanyu Isaki. Hiiho, nkisuwele weera mohaareerela murima apwiyaaka.”

¹⁵ Owo ahinaaye omaliha ovekela, aakhumelela Rebeka iireiyeene mwaapu. Owo aari mwaana muthiyana a Betuweli, mwaana mulopwana a Milka, mwaara a Nahori, munneiye Abrahaamu.

¹⁶ Mwaamwali ole aari ooreeraxa ni oowiikosoopa, hata mulopwana mmoha kaatonke okonano. Rebeka aakhuruwela vahimeni, anarika maahi, anarowa.

¹⁷ Vano murumeiyi ole aarowa woowaakuveya omukumanano, anamweerela: “Dyoontte mukivahe maahi vakhaani a mmwaapunimwanyu.”

¹⁸ Owo aaheera: “Ngwureke apwiyaaka,” ni woowaakuveya aarula mwaapu anamurumeela.

¹⁹ Vano amvahakaru owura maahi, aamweerela: “Nkaavahetho maahi akamelowaanyu weera ewureke mpaka waakwana.”

²⁰ Woowaakuveya aahiittha maahi iitthelaka nipuro na owura, anatthimakela ohimeni weera ariketho maahi ookwana owuriha ikamelu* sootheene.

²¹ Vanonto, murumeiyi a Abrahaamu aangwehexexa ole amaanleene, weera oone Yave aariki akwanihere otthuna wa apwiyaawe.

²² Ikamelu* iye simalihakaru owura maahi, mulopwana ole aamvaha mwaamwali ecipini ya ebeka* emoha olemelawaya, anangwariha mmoononimwawe ipangiiri piili sa eyuuma yoorikaxa, ixekeli* muloko olemelawaya.

²³ Vanonto aamukoha: “Weyo mwaana awani? Dyoontte okileele naariweene nipuro vaate wa atithawo weera miyo ni asikhwaaka nakonewo.”

²⁴ Ole aamwaakhula: “Miyo ti mwaana a Betuweli, mwaana a Milka ni a Nahori.

²⁵ Vano owannyihu nookhala nipuro nookwana wa nyuwo okhalawo, nitho nookhalano malaxi ni yooca yincipale yookwana oca axinama.”

²⁶ Mulopwana ole aahuurama amulapaka Yave, eeraka:

²⁷ “Ooreelihiwa ti Yave, Muluku a apwiyaaka Abrahaamu, ohihiyerenre owoonihera apwiyaaka oreerawawe murima ni ororomeleyawawe. Wa mpattaaka, Yave aakeettiha akihoolaka mphironi mpaka vaate wa asinaangolowaaya apwiyaaka.”

²⁸ Vano, mwaamwali ole aatthimakela owannyawe, anaathalihera soothesene amusaaya amayawe.

²⁹ Rebeka aakhalano acimweenaawe yiitthaniwa Labani. Awo yaavenya woowaakuveya erowaka ohimeni weera yamusuwele mulopwana ole.

³⁰ Yoonakaru ecipini ni ipangiiri mmoononi mwa murokoraya, ni emwiiwakaru Rebeka athalihaka sootheene mulopwana ole aamuleenlaawe, aavenya, anamphwanya mulopwana ole eemenleene vahimeni mukerekhere wa akamelowaawe.

³¹ Vano yaamweerela: “Ngweeke ooreelihiwa a Yave. Mukhalenle heeni okerekhere iwo? Kooreherera empa ni nipuro na ikamelu*.”

³² Vanonto murumeiyi aarowa owaani ni Labani aalamulela okuruxiwa mirindi vakameluni. Aavaha malaxi ni yooca ikamelu* iye ni maahi wa mulopwana ole vamoha ni yaawo yaari ni yoowo weera erapihe inaawo.

³³ Vahoolowaya yaangwiihera yooca, mene murumeiyi aaheera: “Nkirwa kica kihinaaye wooleelani etthu kirinaaka.” Labani aamweerela: “Hayaka, muulumeke.”

³⁴ Vano owo aaheera: “Miyo ti murumeiyi a Abrahaamu.

³⁵ Yave aamureeliha vancipale ni owo aakhalano mihakhu sincipale. Oomvaha ikhondoolo, imombe, iyuuma soorikaxa, arumeiyi alopwana ni athiyana, ikamelu* ni abuuru.

³⁶ Sara, mwaara a apwiyaaka, ngwuuluvalanimwawe aahaayarela mwaana ori namahiyeriwa a soothesene Abrahaamu orinaawe.

³⁷ Vano apwiyaaka yaakilipeliha, yeeraka: ‘Weyo khoorwa omwaasera muthiyana mwanaka variyari wa asithiyana a oKanaani a elapweene yeela kimankaaka.

³⁸ Orowe wa emusi ya atithaka, wa nihimonaka noohaasaasiwa weera wamwaasere mwanaka muthiyana.’

³⁹ Vanonto kaahaakoha apwiyaaka: ‘Ankha muthiyana owo aahitthuna okitthara’

⁴⁰ Awo yaakaakhula: ‘Yave Yoowo kinimurumeelaaka anoorumihele ndyelowaawe, nitho anoowerihe weera weyo weette nnenesene ni mukwaahaawo, weeratho omuruuhele mwanaka, muthiyana a nihimonaka, aani a emusi ya atithaka.

⁴¹ Vano, waaphiyaka wa asinaangolowaaka ni awo yakhootta omvaha mwanaka muthiyana, weyo onuukhale ootaphuweene ni nlipelo nna. Aani, vamwaheene yoola, weyo khootthukiwa ni nlipelo nna.’

⁴² Olelo kiphiyakaru ohimeni koovekela: ‘Yave, Muluku a apwiyaaka Abrahaamu, waari weera mukwaahaaka ti otthunawanyu, mwiiwe nivekelonaka nna:

⁴³ Va miyo kiri yeemelelo ohoolo wa ehime ela. Vano, arwa mwaamwali orika maahi ni miyo kamweerela: ‘Dyoontte okivahe maahi weera kiwure a mmwaapunimwawo,’

⁴⁴ ni owo akaakhula: ‘Ngwureke, nitho kinimwaavaha maahi akamelowaanyu,’ vano, akhale yoowo Yave omuthanlalaawe weera akhale mwaara a mwanaya apwiyaaka.’

⁴⁵ Vanonto kihinaaye omaliha ovekela mmurimanimwaka, aakhumelela Rebeka iireiyeene mwaapu. Aarowa vahimeni anarika maahi, ni miyo kinamweerela: ‘Dyoontte okivahe kiwure.’

⁴⁶ Woowaakuveya aarula mwaapwaawe, aneera: ‘Ngwureke. Ni kinimwaavahatho maahi akamelowaanyu.’ Miyo koowura, ni owo aahaavahatho owura maahi akamelowaaka.

⁴⁷ Vahoolowaya kaamukoha: ‘Weyo, mwaana awani?’ Owo aakaakhula: ‘a Betuweli, mwaana a Nahori ni Milka.’ Vano kaangwariha ecipini ni ipangiiri mmoononimwawe.

⁴⁸ Kaahuurama kimulapaka Yave. Kaamutthapela Yave, Muluku a apwiyaaka Abrahaamu, aakihoonle mphironi ya ekhaikhai weera kamwaasere mwanaya musulwaaya munnaya apwiyaaka.

⁴⁹ Vano mwatthuna owoonihera ororomeleya ni oreera murima apwiyaaka, mukileele, ni mwaahitthuna mukileeletho, weera miyo kilakele etthu yoopaka.”

Othelana wa Isaki ni Rebeka

⁵⁰ Labani ni Betuweli yaamwaakhula: “Eyo engweela wa Yave. Kheewo nneeraahu nooleele yooweera aani naari hoye.

⁵¹ Rebeka ti yoola. Omukuxeke ni ola akhale mwaara a mwaana a apwiyaawo ntoko Yave eenraawe.”

⁵² Vano murumeiyi a Abrahaamu iiwakaru yeeyo yaahimalaaya, aahuuramela vathi ohoolo wa Yave.

⁵³ Murumeiyi ole aamvaha Rebeka itthu sa iyuuma soorikaxa ni soowara. Anaavahatho itthu soorikaxa acimweenaawe ni amayawe.

⁵⁴ Vahoolowaya owo ni asilopwana ale yaamuhoonle yaahooca, enawura ni iwe yaaviriha ohiyu wootheene. Oxaawaya murumeiyi a Abrahaamu aaheera: “Mukihiye kihokoleele wa apwiyaaka.”

⁵⁵ Acimweenaawe ni amayawe Rebekatho yaamwaakhula: “Omuhiye mwaamwali akhaletho ni hiyo wookwana mahuku muloko. Vahoolowaya apwaheke.”

⁵⁶ Mene aawaakhula: “Muhicerewihe ohokolowawaka, niwoko Yave oheettiha mukwahaaka nnenesene. Mukihiye kirowe weera kihokoleele wa apwiyaaka”

⁵⁷ Awo yaamwaakhula: “Nrowe nimwiitthane mwaamwali weera noone aneeraawe ahime.”

⁵⁸ Vano yaamwiitthana Rebeka, enamukoha: “Weyo wootthuna orowa ni mulopwana ola?” Owo aawaakhula: “Aani, kinoorowa.”

⁵⁹ Amusi yaaraxelana ni acimweenaawe Rebeka, murumeiyaawe, murumeiyi a Abrahaamu ni asilopwana yaamuhoonle.

⁶⁰ Yaamureeliha Rebeka emweerelaka: ”Wunnuwe murokorihu mpaka okhale maayi a atthu ancipalexa! Ekhapiraawo ewine isidade sa amwiittanaawo.”

⁶¹ Vahoolowaya Rebeka ni arumeiyaawe yaahiireherera, enawela ikamelu*, enamutthara murumeiyi a Abrahaamu. Ni hiiho aamukuxa Rebeka, anapwahano.

⁶² Vano, Isaki eera awaaka oBeher-Lahi-Royi, niwoko aamanke oNegeba.

⁶³ Oxekuwa omoha, aavenya akelaka omatta weera atthokelele. Attukhulaka maitho, aahoona ikamelu* saattamelaka.

⁶⁴ Rebekatho aattukhula maitho ni aamoona Isaki. Owo aakhuruwa wakameluni,

⁶⁵ anamukoha murumeiyi a Abrahaamu: “Mulopwana taani yoole ongweela omatta aniciceeraka?” Owo aamwaakhula: “Ti apwiyaaka.” Vano Rebeka aakhuneela ekhovaawe ni ekuwo.

⁶⁶ Vahoolowaya, murumeiyi aamuthalihera Isaki sootheene seereiye.

⁶⁷ Isaki aamuroiha Rebeka muheemani mwa amayawe Sara. Aamuthela ni aamusivela. Ni hiiho Isaki aapepeseya okhwa wa amayawe.