Epacerero 16 - Emakhuwa Bible

Hagari ni mwaniye Iximayeli

¹ Sarai, mwaara a Abraamu, khaamuyanre naari mwaana mmoha. Vano owo aakhalano epottha emoha ya wExipitu, yiitthaniwa Hagari.

² Sarayi aamweerela Abraamu: “Yave ookooceeliha oyara. Vano, apaale epotthaaka enoowera wooyarelani mwaana wa miyo. Munkoneno.” Abraamu aahaakhulela aatthunaawe Sarayi.

³ Vano hiihaawo, vahoolo wa iyaakha muloko ekhalaka elapo ya oKanaani, Sarai, mwaara a Abraamu, aamvaha iyawe epotthaawe Hagari ngwExipitu, ntoko mwaariye.

⁴ Abraamu aamukonano Hagari ni owo aarupala. Vano asuwelaka weera oorupala, Hagari aapacera omuramusa Sarai.

⁵ Sarai aamweerela Abraamu: “Miyo kohoovahani mmatatanimwanyu epotthaaka, ni vano yoonnaaya weera yoorupala, eyo enookiramusa. Yave akhale Mphukaahu.”

⁶ Abraamu aamwaakhula Sarai: “Owo nlelo onoopwaherera okhala epotthaanyu. Mumpakeke yeeyo muntthunaanyu.” Vano Sarai aapacera omuhasula moota wooweera owo aatthawa.

⁷ Ndyelo a Yave aamphwanya vanaattuuttuni, munikareni, ori mphironi enrowa oXuri,

⁸ anamukoha: “Hagari, epottha ya Sarai, mungweela woowi ni munkela woowi?” Owo aamwaakhula: “Kinimtthawa Sarai, pwiiyaaka.”

⁹ Vano ndyelo a Yave aamweerela: “Muhokoleele vaate wa pwiiyaanyu ni mwamwiiwelelewo.”

¹⁰ Vanonto, ndyelo aapwaherera: “Kinimwaandyeerera ekhapiraanyu weera ahikhale anaawere waalikela.”

¹¹ Ndyelo a Yave aaheeratho: “Nyuwo moorupala ni mmungyare mwaana mulopwana muneeraanyu munttehe nsinanawe Iximayeli, niwoko Yave ohoona ohaawawanyu.

¹² Anaakhale ntoko buuru a muthupini ni mahuku ootheene aniittane ni ootheene, ni ootheene eniyiittane ni yoowo. Owo anaakhale oohasuweene iittanaka ni axunna ootheene.”

¹³ Nno naari nsina Hagari aamuttenghaawe Yave aamweerenlaawe yoowo: “Nyuwo ti Muluku munkoona,” niwoko aaheera: “Nkimoone Yoole onkoona.”

¹⁴ Tivawo naattuuttu ole iitthaniwaawe “Beer Lahi-Royi” ni omphwanyaneya eriyari ya oKadexi ni oBeredi.

¹⁵ Hagari aamuyara mwaana mulopwana, vano atithawe, Abraamu, yaamutteha nsinanawe Iximayeli.

¹⁶ Abraamu aarino iyaakha miloko mithannamiraru niithannamosa Hagari aamuyanraawe Iximayeli.