Ecipo Yooreeraxa 2 - Emakhuwa Bible

¹ Miyo ti ethutu yooxeera ya Saroni, aani ethuthu yooreeraxa ya mmareyareyani.

Namatthomera

² Oosiveleyaaka ti eriyari ya amiravo ntoko ethutu yooreeraxa eriyari ya nyiiwa.

Ootthomeriwa

³ Oosiveleyaaka eriyari ya amiravo ori ntoko emasiyera eriyari ya nyiri sa moothakoni. Kintthunaxa okilaathi vamunttuusinivawe ni yoowiimaawe ti yoocoocowaxa vanluminiwaka.

⁴ Owo aakirongha vasaala ya ifesta, ni ebandeiraawe mwa miyo, ti osivela.

⁵ Dyoontte mukicihe iwuuva* soowuumihiwa, mukikhomaalihe ni masa, niwoko kimvoreiwa osivela.

⁶ Moonowaawe woothiyana, onkhala waamuruwaka, ni moonowawe woolopwana, onkikhubaara.

⁷ Asithiyana a oYerusaleemu, miyo kinoodyoonttelelani mwa anaahe ni ikorsa sa ntuphini: muhivenye mukhoveni hata muhitannye osivela ehuhuwaaya ehinaaye.

⁸ Ngwiriyane! Ti oosiveleyaaka! Moone! Owo ongwa weiwo atuphaka mmanyaakoni, iinaka mmattumuxani.

⁹ Oosiveleyaaka ori ntoko naahe, aani ntoko napunci a naahe. Moone! Owo ori wiithela exiraahu, aweheraka muxanelani, athurumelaka mmwiikitthoni.

¹⁰ Oosiveleyaaka aahuuluma, anakeerela: “Oosiveleyaaka, mweemele; ooreeraaka, mukitthare.”

Namatthomera

¹¹ Moone! Eyiitta yoovira; epula yoomala, enarowa.

¹² Ithutu sinttuva mulaponi, ni yoophiyera ehuhu yoowiipa; mulaponimwahu oniiwanyeya wiipa wa ikhunda.

¹³ Mwiri wa ifiigu oniima soowiima soopacera; iwuuva* sinttuva onamwareela wunkhelawaya. Mweemele, murwe oosiveleyaaka; ooreeraaka, nrowe.

¹⁴ Ekhundaaka eri mmakhukuni a nyala, moowiipitha muxerexere nyaako, mukoonihere ekhovaanyu, mukihiye kiiwe nsunanyu; niwoko nsunanyu ti noosiveleya, ni ekhovaanyu ti yooreeraxa.

Ootthomeriwa

¹⁵ Munivarele akhwatte, axaana a akhwatte annanariha imatta sa iwuuva*, niwoko imattasahu sa iwuuva* soottuva.

¹⁶ Oosiveleyaaka ti awaka ni miyo ti awawe; owo onciha eriyari ya ithutu sooreeraxa.

¹⁷ Muhokolowe oosiveleyaaka ohinaaye wiila ni sihinaaye olakaseya nyunttuusi; mukhale ntoko naahe hoye hoye ntoko napunci a naahe mmattumuxani oovinavineya.