Ecipo Yooreeraxa 1 - Emakhuwa Bible

Ovolowa

¹ Ecipo yooreeraxa ya Salomoni.

Ootthomeriwa

² Ii! Owo aakibeeciye, eyanowaawe yaakibeecasiye. Aani, okitthunawawe ti woosiveleyaxa opwaha eviinyu.

³ Wunkhela wa makhuraawe ti wooreera; nsinanawe ninlikana makhura oowunkhela ooyeehiwa. Kheehiyono yootikhiniha weera asimwali animoosivelani!

⁴ Mukikuxe! Nrowe naakuveke! Amwene ekironghe mmapuronimwaya! Ninghakalala ni otteeliwa mwaha wa nyuwo; nnootthapela osivelawanyu opwaha eviinyu. Vekhaikhai, nyuwo ti oolapeya!

Asinthamwene a ootthomeriwa Ootthomeriwa

⁵ Kooriipa, mene kiri ooreera, ii! Asithiyana a oYerusaleemu; ooriipa ntoko iheema sa oKedari, ntoko iluttu sa iheema sa Salomoni.

⁶ Muhikiwehe hiiho niwoko na oriipawaka; ti nsuwa nihinse exapalaaka. Anamwane asilopwana a amayaka aakinyoonyeriwa, enakikhaliha namawehaweha a imatta sa iwuuva*; wa soothesene, nkaawera okosoopa emattaaka ya iwuuva*.

⁷ Mukileele, nyuwo kinoosivelaakani, muncihaanyuwo muhuwaanyu ni muniitthuuwihaanyuwo muhuwaanyu nsuwa vamuru. Mukileele weera kihivire mmuhuwoni wa asinthamwenaanyu kiikhuneenleene eluttu.

Namatthomera

⁸ Nyuwo, ooreeraxa a asithiyana, mwaahisuwenle, mutthare mphito wa muhuwaaka ni mwaacihe axaana a ipurisanyu mukerekhere iheema sa akukhuli.

⁹ Nyuwo oosiveleyaaka kinoolikanxerani ekavalu* ethiyana etthukiweene eriyari ya ikavalu* silopwana sa Farawu*.

¹⁰ Moota areenraaya maramaanyu eriyari ya axiveeve, ni muxikomwanyu ngwanreene onyooro wa eyuuma yoorikaxa!

¹¹ Nnimoopakelani axiveeve a eyuuma yoorikaxa ehuruweliweeneno eparatha*.

Ootthomeriwa

¹² Mwene areene vameesaniwawe, wunkhela wa makhuraaka a enardu*, waamwareela.

¹³ Oosiveleyaaka kimmoona okhala ntoko mwaamurupa wa emira* omvira ohiyu eriyari ya mapelaaka.

¹⁴ Oosiveleyaaka ori ntoko ekhuce ya ithutu sa hena* a imatta sa iwuuva* sa wEni-Gedi.

Namatthomera

¹⁵ Moota mureenraanyu, ii! Oosiveleyaaka! Ii! Moota mureenraanyu! Maithwaanyu anlikana ikhunda!

Ootthomeriwa

¹⁶ Moota mureenraanyu oosiveleyaaka! Ii! Moota mutikhiniheiyaanyu! Vamunyepuni wootikanela ti wookonawahu.

¹⁷ Mikoomba sa empaahu ti sa nyiri sa esidari*, ni nipathonahu ti na nyiri sa ipinyeiru*.