Deuteronomiyo 9 - Emakhuwa Bible

Emalihero ya ettiyamaaru

¹ Mwiiwe aYixrayeli, munghala vakhaani omulapuwa Yordanu weera mwavolowase mulaponi ni mwawine miloko soowaatta ni soolipaxa woopwahasani nyuwo; miloko sirino isidade sitokotoko ni ixiri soorakamela osulu.

² Atthu a weiwo ti oolipaxa ni oorakama; ti awAnaki! Nyuwosa mohiiwa wuulummwawaya mpaka moosuwela eneeriwa: “Khaawo ongwera waawina awAnaki!”

³ Wa soothesene, musuwele nnenesene olelo weera Yave Mulukwaanyu ti Yoowo muneenaawe onrowa ohoolowaanyu ntoko mooro onlaliha. Owo onimwaaphwata aawinaka ohoolowanyu. Nyuwosa munimoomola mphwataka woowaakuveya, ntoko Yave oororomelinghaaweni.

⁴ Vano vahoolo wa owoomola ohoolowanyu Yave Mulukwaanyu, muhiixeerelase: “Yave okiruuhenle nno weera kikuxe elapo ela niwoko na waakhuleliwawaka ni Muluku.” Hoye! Ti niwoko na otakhala wa miloko iyo Yave aneeraawe oomole ohoolowanyu.

⁵ Khoohiyono niwoko na waakhuleliwawanyu ni Muluku naari oreerawanyu murima muneeraanyu mwakuxe elapwaaya, mene niwoko na otakhala wa miloko iyo. Yave Mulukwaanyu onimoomola ohoolowanyu weera akwanihere yeeyo aaroromelinghaawe ni nlipelo makholowaanyu Abrahaamu, Isaki ni Yakobe.

⁶ Tivawo, musuwele weera khoohiyono niwoko na waakhuleliwawanyu ni Muluku Owo aneeraawe oovaheeni, elapo yooreera eyo weera mwakuxe mweenre nyuwo mukhalaka muloko woottiyamaaru.

⁷ Muupuwele yeeyo ni muhittiwale moota mwaantannyenraanyu isara Yave Mulukwaanyu munikareni. Okhuma nihuku mwaakhumalaanyu wExipitu mpaka ophiyawanyu nno nyuwosa moonttiyelamaaru Yave.

⁸ oHorebi mwaamunyoonyiha Yave. Aanyoonyiwaxa moota wooweera aatthuna woophwatani.

⁹ Miyo kaawenlaka vamwaako weera kaakhele itthaabwa piili sa maluku; itthaabwa sa wiiraana Yave Muluku oopakenlaaweni, kaakhalawo mahuku miloko mixexe kihicaaka yooca naari kihiwuraka maahi.

¹⁰ Yave aakinnyerera itthaabwa piili sa maluku saalempwale ni ekatha ya Muluku. Mwemmo yaalempwaayamo malamulo ootheene Yave oothalihenraaweni vamwaako, nsunawe nikhumaka mmooroni vanihukuni na muthukumano.

¹¹ Eviraleene mahuku miloko mixexe ale, Yave aakinnyerera itthaabwa piili sa maluku; itthaabwa sa wiiraana,

¹² anakeerela: “Mukhuruweke woowaakuveya, niwoko mulokwaanyu owo, mwa yoowo mukhumihalaanyu wExipitu woovirikanyiha. Woohapuwa woowaakuveya mphironi Miyo kilamulenlaaka, wiipakelaka ecaambulo yoohaniwa.”

¹³ Vanonto Yave aakeerela: “Miyo kinoona weera vekhaikhai muloko ola ti woottiyamaaru!

¹⁴ Mukihiyeke weera kaaphwate, kicipihaka nsinanaya mweelaponi. Kinimootatuxani muloko woolipaxa ni woowaatta woopwaha muloko owo.”

¹⁵ Hiiho kaarukunuwa, kinakhuruwa vamwaako, owo ovarelaka. Itthaabwa piili sa wiiraana saari mmatatanimwaka.

¹⁶ Kaahoona weera mwaamutthekela Yave Mulukwaanyu; mwiipakelaka muluku a eyuuma mulikanxeraka mwaamombe. Mwaahapuwa woowaakuveya mphironi mwa Yave Mulukwaanyu olamulenlaawe.

¹⁷ Hiiho kaakuxa itthaabwa piili, kinavonyera vathi kipwexaka vamaithoniwanyu.

¹⁸ Vahoolowaya miyo kaamukokhorelatho Yave mahuku miloko mixexe kihicaaka yooca naari kihiwuraka maahi niwoko na soottheka sitokotoko mwaapankaanyu. Mwaapaka yeeyo Yave ohintthunaawe, mutannyaka isarasawe.

¹⁹ Koova isara ni nthorihelo na Yave, niwoko Owo aanyoonyiwa mpaka ohalela woophwatani. Wa soothesene, Yave aakiiwatho.

²⁰ Yave aamunyoonyeriwa Aharoni mpaka ohaleela omphwata, mene ehuhuweene yeele kaamvekelelatho Aharoni.

²¹ Vahoolowaya kaamukuxa mwaamombe a yootthekaanyu, kinamuhisa. Kaamuttikittha, anakareya mpaka othatuwa ntthupi, kinavonyera ntthupi nne mmoolokoni ophattungwe omwaako.

²² Ohiya yeeyo, nyuwosa mwaatannyatho isara sa Yave oTibera, oMasa ni oKiberoti-Hataava.

²³ Vano Yave oorumihaaweni oKadexi-Bareneya, aaheera: “Mvolowasewo ni mwakuxe elapo koovahansaakani.” Vaheera nyuwosa mwaavaanya Nlamulo na Yave Mulukwaanyu. Khamwaamuroromenle naari khamwaamwiiwelenle.

²⁴ Okhuma vaavaale koosuwelaakani nyuwosa munnapwaherera omvaanya Yave.

²⁵ Kaamukokhorela Yave wookwana mahuku miloko mixexe niwoko Yave aahima weera aarwa woophwatani.

²⁶ Kaamvekenle Yave keeraka: “Ii! Adonai Yave, muhiphwate mulokwaanyu; yoohiyeraanyu mooponlaanyu ni ikurusanyu sitokotoko mukhumihaka wExipitu ni ntatananyu nooweraxa.

²⁷ Ngwuupuwelele arumeiyaanyu Abrahaamu, Isaki ni Yakobe. Muhiwehe ottiyamaaru wa muloko ola, yootakhala ni yootthekaaya.

²⁸ Mwaahipaka yeeyo, amaki a elapo munikhumihalaanyu eniyeere: ‘Yave okhumihenre muloko ole weera awiive munikareni, niwoko khaawenre waarongha mweelaponi mwa yeeyo aaroromelinghaawe, aathanyaka.’

²⁹ Vaheera ola mulokwaanyu, yoohiyeraanyu, mwa yoowo mukhumihalaanyu wexipitu ni ikurusanyu sitokotoko ni moonowaanyu woolipaxa.”