Deuteronomiyo 7 - Emakhuwa Bible

Muloko woothanliwa

¹ Yave Mulukwaanyu oovoleihakani mweelaponi mwa weiwo munrowaanyu okuxa, Owo onimoomola ohoolowanyu miloko sincipale – aHiti, aGiregaxi, awAmori, aKanaani, aPerizi, aHivi ni aYebusi – miloko mithannamiili soolipa woopwahasani nyuwosa.

² Yave Mulukwaanyu aawinnyererakani ni mwaawinaka, vano ontthuneya ophwata woomalela. Muhiiraaneno naari muhimoreliwe ikharari.

³ Muhithelane ni atthu a weiwo. Muhaathelihase asinamwaniinyu asithiyana ni anamwanaaya asilopwana, hata muhaakuxe anamwanaaya asithiyana mwaathelihaka anamwaniinyu asilopwana,

⁴ niwoko awo animwaahapuxa anamwaniinyu asilopwana weera ehikitthare elapaka miluku sikina. Weereya hiiho, isara sa Yave sinimoopattelasani soophwatasakani woowaakuveya.

⁵ Vano nyuwosa entthuneya opakela miloko iyo ti ela: Mwaaphwate altaaraaya, mwaapwexe amarimbwaaya ootteela, muuhe nyiri soothipeleliwa sa Axera ni mwahiseke mmooroni icaambulosaya sa miluku.

⁶ Nyuwosa ti muloko wootteeliheriwa Yave Mulukwaanyu. Owo ohoothanlani nyuwosa variyari wa miloko sootheene sa elapo ya vathi weera mukhale mulokwaawe wootthuneyaxa.

⁷ Yave khoosivelenleni nyuwosa naari khoothanlenleni waatta opwaha miloko sikina, niwoko vekhaikhai ti nyuwosa muhaattale wa miloko sootheene.

⁸ Yave ookhumihanseni ni ntata nooweraxa anawoopolani mweelaponi ya okaporo mmatatani mwa Farawu*, mwene a wExipitu, niwoko noowoosivelani Yave ni nlipelo aapakenlaawe makholowaanyu.

⁹ Musuwele weera Yave Mulukwaanyu ti Muluku. Owo ti Muluku oororomeleya ompwaherera wiiraana ni onnene wa ikhapira macira muloko sa yaawo animusivela yiiwelelaka malamulowaawe.

¹⁰ Vaheera Muluku onoomuttaruxa amphwataka woowaakuveya yoowo onimuthanya.

¹¹ Tivawo mwiiwelele nlamulo, eyo tiiyo ikano ni sooruma kinoolamulelaakani olelo.

Mareeliho a wiiwelela

¹² Mwiiwelela malamulo ala musungaka, muneettela, Yave Mulukwaanyu onimoopwahererelihani wiiraanawawe ni onnene aaroromelinghaawe ni nlipelo makholowaanyu.

¹³ Owo onimoosivelani, onimooreelihani ni onoowaandyeererani. Onimoovahani anamwane ancipale, soohepha sincipale sa etrigu, eviinyu enyowani ni makhura ni muhuwo wa imombe ni wa ikhondoolo mweelaponi Owo aalipelenlaawe makholowaanyu woovahani.

¹⁴ Nyuwosa munooreelihiwa opwaha miloko sikina; asilopwanaanyu ni asithiyanaanyu ootheene animwaayara anamwane mpaka axinama a mihuwosanyu.

¹⁵ Yave onoowaakiherani iretta sootheene. Khasookhumelelani iretta soowoopihaxa ntoko musuwenlaanyu seiye saaphwannye awExipitu; mene sinrowa waakela amwiittanaanyu ootheene.

¹⁶ Nyuwosa ontthuneya ophwata miloko sootheene Yave Mulukwaanyu aneeraawe oovahereraseni. Muhimoreliwe ikharari naari muhilape milukusaya niwoko eyo enimookhalelani ntapha.

¹⁷ Apaale munimwiixeerelasa: “Miloko iyo ti soolipaxa onipwaha hiyo. Nnoomole hai?”“”

¹⁸ Wa soothesene, muhoove iyo. Muupuwelele nnenesene yeeyo Yave Mulukwaanyu aampakenlaawe Farawu* ni wExipitu wootheene.

¹⁹ Mwaahoona ni maithwaanyu woota murima otokotoko, ineneero sootikhiniheya sitokotoko, ntata ni moono wooweraxa mwa yoowo Yave Mulukwaanyu ookhumihenraawenino. Yave Mulukwaanyu onoopakela mooteene yoowo miloko sootheene munoovaanyu.

²⁰ Ohiya toko yeeyo, Yave Mulukwaanyu onimwaarukureeriha nyuru eriyaraaya mpaka waaphwata eniihalaawo, yaawo awiipithanseni.

²¹ Muhoove niwoko Yave Mulukwaanyu ori variyariwanyu ti Muluku Mutokweene ni Oowoopiha.

²² Yave Mulukwaanyu onimoomola miloko iyo ohoolowanyu vakhaani vakhaani. Nyuwosa muhimalihase ekwaha emoha* paahi weera ehaandyeererane asinama a mutuphini ewoopopihasakani.

²³ Yave Mulukwaanyu onoowinnyererasani iyo mmatatanimwanyu aruuhelasaka minyakunyaku mpaka ophwatiwawaya.

²⁴ Owo onoowinnyerera mmatatanimwanyu mamwenaaya ni nyuwosa munoocipiha masinaaya mulaponi moota woomalela. Khaawo anoowereeni mpaka muneeraanyu mwaaphwate.

²⁵ Muhise mmooroni icaambulo sa milukusaya. Muhihaawele iparathasaya naari iyuumasaya soorikaxa sihuruweliwaayano niwoko eyo eniyookhaleleni ntapha. Itthu iyo ti sa mwiikho wa Yave Mulukwaanyu.

²⁶ Muhikuxeru etthu eri ya mwiikho muronghaka mpaanimwanyu weera nyuwosa muhiphwatiwetho. Muthanye ni musembe ni murimaanyu wootheene niwoko simwalamwaliheriwe ophwatiwa.