Deuteronomiyo 4 - Emakhuwa Bible

Moisesi onooperera wiiwelela

¹ Vano mwiiwe aYixrayeli ikano ni malamulo kineeraaka kooxuttiheni. Mwiiwelele yaawo weera mukhale ni okumi ni mwakuxe elapo Yave Muluku a makholowaanyu onoovahaaweni.

² Muhaandyeerere malamulo makina naari muhivukule malamulowaaka, mene mwiiwelele malamulo a Yave Mulukwaanyu mwa yaawo kinoolamulelaakani.

³ Mwaahoona ni maithwaanyu yeeyo Yave aapankaawe oBahali-Peyori. Yave Mulukwaanyu aahaaphwata ootheene yaamutthara Bahali-Peyori.

⁴ Vaheera ootheene nyuwo mpwaherenre munroromelaka Yave Mulukwaanyu olelo muri ni okumi.

⁵ Moone, kohooxuttihani ikano ni malamulo ntoko aakilamulenlaawe Yave Mulukwaaka weera mwiiwelele yaawo mweelaponi muneeraanyu mvolowe weera mwakuxase.

⁶ Mwiiwelele nnenesene niwoko eyo enimoonihera miloko sikina mirukusanyu ni osuwelawanyu. Iyo siiwaru ikano sootheene iyo, nseere: “Vekhaikhai muloko ola mutokotoko ti musuweli ni wa miruku.”

⁷ Khoowowo muloko mutokotoko mukina, Mulukwaaya owaattamenle ntoko Yave Mulukwaahu oraawe vakhiviruwahu hiyo nnimvekelaahu.

⁸ Khoowowo muloko mutokotoko mukina orino ikano ni malamulo ooreera, ntoko malamulo ala kinoovahasakani olelo.

⁹ Mwiipasoope nnenesene weera muhittiwale itthu maithwaanyu yoonnaaya. Muupuwelele seiye mahuku ootheene a okumaanyu. Mwaathaliherase anamwaniinyu ni anamwanaaya.

¹⁰ Muupuwelele nihuku mwaaraanyu ohoolo wa Yave Mulukwaanyu oHorebi, Owo aakeerenlaawe: “Muthukumanyihe muloko ohoolowaka weera wiiwe maswaaka ni oxuttere okittittimiha mahuku ootheene onkhalaaya mweelaponi, waaxuttihakatho anamwanaaya.”

¹¹ Nyuwosa mwaahaattamela, munakhalasa mukerekhere mwaako, owo ovarelaka munihutteni nooriipa okhuneelaka mwaako ni epiphi.

¹² Vano Yave aahuuluma ni nyuwo mmooroni. Mwaahiiwa masu, mene kheewo moonnaanyu – mwiiwa masuru.

¹³ Aahooxuttihasani wiiraanawawe eyo tiiyo Malamulo Muloko. Aalepa vatthaabwani piili sa maluku, anoolamulelasani weettela.

¹⁴ Ehuhuweene yeele Yave aakilamulela wooxuttihasani ikano ni malamulo weera nyuwosa mweettele mweelaponi munrowaanyu okuxa.

Okhoottihiwa olapa miluku sikina

¹⁵ Nihuku Yave uulummaawe ni nyuwo mmooroni oHorebi, kheewo moonnaanyu. Tivawo, mwiipasoope nnenesene,

¹⁶ weera muhiinanarihe mwiipakelaka muluku mukina a yakhalaru ecaambulo yoolikana mulopwana hoye hoye muthiyana,

¹⁷ naari akhalaru mwaamunama a mulaponi hata mwaapalame omvavawo,

¹⁸ hoye hoye yakhalaru yoopattuxiwa eniipurula, naari yakhalaru ehopa mmaahini oowiixera.

¹⁹ Nyuwosa mwaweha osulu moonaka nsuwa, mweeri ni ithenyeeri ni itthu sootheene sa wiirimu, muhihapuwe mukokhorelaka seiyo ni mulapaka itthu Yave Mulukwaanyu okawenlaawe miluku sootheene sa elapo ya vathi.

²⁰ Wa nyuwo, Yave aahookuxani, ookhumihakani muttukutthani enghaniwa eyuuma, eyo tiiyo wExipitu, weera mukhalase muloko wa yoohiyeraawe, ntoko onooneyaaya olelo.

²¹ Yave aakinyoonyeriwa niwoko na nyuwo. Owo aalipela weera nkimulapuwa Yordanu weera kihivolowe elapo yooreera Yave Mulukwaanyu onoovahasaaweni ntoko yoohiyeriwa.

²² Kinkhwela elapweene yeela. Nkinimulapuwa Yordanu, mene nyuwosa munoomulapuwa weera mwakuxe elapo yooreera eyo.

²³ Mwiipasoope weera muhittiwale wiiraana wa Yave Mulukwaanyu oopakenlaaweni. Muhiipakele akhalaru muluku mulikanxeraka yakhalaru etthu Yave Mulukwaanyu ookhoottihenraaweni.

²⁴ Vano, Yave Mulukwaanyu ti mooro onlaliha; Muluku a ehace.

²⁵ Nyuwosa mwaayarasaka anamwane ni osuulu mukhanleene ehuhu yincipale mweelaponi ni vano mwahapuwa mwiipakelaka wakhalaru moota wa muluku mpakaka yeeyo Yave Mulukwaanyu ohintthunaawe, muntannyeraka isarasawe,

²⁶ vanonto, wiirimu ni vathi ti anamoonaaka olelo weera nyuwosa munoophwatiwa woowaakuveya mweelaponi mwa yeeyo munkuxaanyu woomulapuwa Yordanu. Nyuwo khamukhalaxawo, mene munoophwatiwa woomalela.

²⁷ Yave onimoomwaraxelani variyari wa miloko, eniihale paahi akina akina a nyuwosa variyari wa miloko mwa weiwo Yave aneeraawe awoomoleleni.

²⁸ Weiwo mmwalape miluku soopakiwa ni atthu siri sa nyiri ni maluku sihingwera woona, wiiwa, oca hoye hoye wiimura.

²⁹ Wa soothesene, nyuwosa mwamwaasawo Yave Mulukwaanyu, munoomphwanya nyuwosa mwamwaasaasa ni murimaanyu ni okumaanyu wootheene.

³⁰ Nyuwosa mwaahaawasaka ni itthu sootheene iyo sookhumelelasani, hiiho mahuku a muhoolo mmwinghokolele Yave Mulukwaanyu ni mmwimwiiwelele.

³¹ Vano Yave Mulukwaanyu ti Muluku a ikharari. Owo khoohiyasani hata khoophwatasani naari khattiwala wiiraana aapakenlaawe makholowaanyu ni nlipelo.

Yave ti Muluku

³² Mukohakohe mwaha wa ihuhu sa khalayi, nyuwo muhinaaye okhalasa – okhuma nihuku aampattuxalaawe mulopwana mweelaponi; mukohakohe wiirimu wootheene: Kheenatoko okhumelela etthu etokotoko naari wiiwiwa ntoko yeela!

³³ Sookhala miloko sikina siiwale nsu na Muluku nuulumaka mmooroni ntoko mwiiwalaanyu ni vahoolowaya sinapwaherera ni okumi?

³⁴ Khoowowo muluku mukina olakenle okhumiha muloko mmoha variyari wa mukina weera okhale wawawe ovarelaka muteko woota murima, ineneero sootikhiniheya, owana, ntata nooweraxa, moono woolipa ni miteko sitokotoko ni sooweraxa. Itthu sootheene iye oopakenlaaweni Yave Mulukwaanyu wExipitu, ntoko moonnaanyu ni maithwaanyu!

³⁵ Yave owooniherenleni itthu iye sootheene osuwela weera Yave ti Muluku. Khoowowo muluku mukina ahikhanle Yoowo.

³⁶ Wiirimu oowiiwihani nsunawe weera oolakeeni. Mulaponi aawooniherani moorwaawe mutokotoko mwaahiiwa maswaawe eweelaka mmooroni.

³⁷ Aahookhumihani wExipitu ni owerawawe otokotoko niwoko na waasivelawawe makholowaanyu ni othanlawawe ikhapirasaya.

³⁸ Aahoomola ohoolowanyu miluku sitokotoko ni soolipaxa eerelaka woovolonghani ni okuxa elapwaaya ntoko yoohiyeriwaanyu, mooteene yoola onooneyaaya olelo.

³⁹ Musuwele yeeyo olelo ni muhele vamurimani weera Yave ti Muluku a wiirimu ni vathi. Khawowo mukina.

⁴⁰ Mwiiwelele ikanosawe ni malamulowaawe kinoovahasaakani olelo weera sootheene siweetteleni nnenesene nyuwosa ni anamwaniinyu ni weera mukhale ni okumi wa mahuku mancipale mweelaponi Yave Mulukwaanyu onoovahasaaweni.”

Isidade sootthawela

⁴¹ Vahoolowaya Moisesi aathanla isidade tthaaru mpatta ninkhuma nsuwa wa oYordanu.

⁴² Akhalaru mutthu eera amwiive mukhwaawe mweerisani ni woohilakela atthawelekemo. Namwiiva aatthawela emoha ya isidadesene seiyo eerelaka woopola okumaawe.

⁴³ Isidadesene seiye saari ti iya: Wa aRubeni oBezeri muttuttuwani wa nikare; wa aGadi oRamoti oGiliyade ni wa aManaxe oGolani oBaxani. Miloko mithanu niithanu.

Ovolowa wa Nlamulo

⁴⁴ Nna ti nlamulo Moisesi aavanghaawe aYixrayeli.

⁴⁵ Ti seiya ikano ni malamulo ni sooruma Moisesi aavanghaawe ekhummeene wExipitu.

⁴⁶ Yaari okhopela Yordanu vareyareyani naapaka mwiinano wa oBeti-Peyori, mweelaponi ya Sihoni, mwene a awAmori. Owo aalamula oHexiboni ni aawiniwa ni Moisesi ni aYixrayeli ekhummeene wExipitu.

⁴⁷ Awosa yaakuxa elapwaawe ni elapo ya Ogi, mwene a oBaxani, eyo tiiyo mamwene meeli a awAmori yaakhala mpatta ninkhuma nsuwa oYordanu.

⁴⁸ Elapweene yeele yaakhumme wAroweri mukerekhere nreyarya na wArenoni mpaka mwaako Siyoni (eyo tiiyo Heremoni),

⁴⁹ yaatakanserana elapo yootheene ya wAraba, mpatta ninkhuma nsuwa oYordanu, mpaka Ephareiya ya wAraba, mpatta wa ohitto mukerekhere mwaako Pisega.