Deuteronomiyo 30 - Emakhuwa Bible

Ororomeleya wa Yave

¹ Yoorweelakani mareeliho ni malapho ootheene koothalihenraakani ni enoophwanyaniwo weiwo Yave Mulukwaanyu aneeraawe oomwaraxeleniwo eriyari ya miloko,

² nyuwosa vamoha ni anamwaniinyu mwahokoleela wa Yave Mulukwaanyu mwiiwelelaka ni murimaanyu ni okumaanyu wootheene munatthariha sootheene koolamulenlaakani olelo,

³ vano Yave Mulukwaanyu onimoohokoloxani wootthukiwani, oomorelakani ikharari ni oothukumanyihakanitho ni miloko sootheene mwa weiwo mwaamwareenlaanyuwo.

⁴ Yave Mulukwaanyu onimoothukumanyihaniwo weera muhokolowe, mwaarooronghiwaru ommaleloni wa elapo.

⁵ Owo onimoohokoloxerani elapo ya makholowaanyu ni nyuwosa mmwakuxase yeeyo. Onooweettiherelani nnene awaandyeererakani waapwaha makholowaanyu.

⁶ Yave Mulukwaanyu onimoovahasani ni ekhapiraanyu murima woororomeleya weera munsiveleke ni murimaanyu ni okumaanyu wootheene ni weera mukhaleke ni okumi.

⁷ Owo onimwaarumihela malapho ootheene awo, amwiittanaanyu anoothanyani ni anoosoondani.

⁸ Nyuwosa munoomwiiwelelatho Yave Mulukwaanyu muttharaka malamulowaawe ootheene kinoovahaakani olelo.

⁹ Vano Yave Mulukwaanyu onooreeliha mitekosanyu sootheene, anamwaniinyu, axaana a mihuwosanyu ni soohepha sa imattasanyu. Owo onimoohakalalelanitho aweettiherelakani nnenesene, ntoko aahakalalenlaawe makholowaanyu,

¹⁰ nyuwosa mwamwiiwelela Yave Mulukwaanyu muttharaka malamulowaawe ni ikanosawe silempwale mulivuruni ela ya Nlamulo ni mwahokoleela wa Yoowo ni murimaanyu ni okumaahu wootheene.

Muthanle okumi

¹¹ Yeeyo koolamulenlaakani olelo kheerinke opaka hata khamunooceela ophwanya.

¹² Nlamulo nna khanikhanle wiirimu wookwana okoha: “Taani anaawelewo weera aniruuhele Nlamulonawe weera niiwelele?”

¹³ Naari khanikhanle okhopela ephareiya wookwana okoha: “Taani anaalapuwe ephareiya weera aniruuhele Nlamulonawe anilaleerakatho weera niiwelele?”

¹⁴ Hoye! Nlamulo nri vakhiviruwanyu – nri mmwanomwanyu ni vamurimaniwanyu – tivawo nyuwosa muneeraanyu mweetteleke.

¹⁵ Moone, kinghela olelo ohoolowanyu okumi ni weetteleya nnene, ni mpatta mukina okhwa ni ophwatiwa.

¹⁶ Olelo kinimoolamulelani omusivela Yave Mulukwaanyu, weetta mphironimwawe ni wiiwelela malamulowaawe, ikanosawe ni soolamulasawe. Hiiho munookhala ni okumi mwaandyeerereyaka, ni Yave Mulukwaanyu onimooreelihani mweelaponi muneeraanyu mwavolowe weera mwakuxe.

¹⁷ Vaheera murimaanyu wahapuwa ni mwaahimwiiwelela muniihiyerera mukokhorelaka miluku sikina,

¹⁸ kinooleelani olelo weera vekhaikhai munoophwatiwa. Khamukhalaxawo elapo mumvolowaanyu, mwa yeeyo munrowaanyu okuxa munlapungweene Yordanu.

¹⁹ Wiirimu ni vathi ti anamoonaaka olelo weera koowooniherani okumi ni okhwa; mareeliho ni malapho. Vano muthanle okumi weera nyuwosa ni anamwaniinyu mukhaleke ni okumi,

²⁰ ni weera munsivele Yave Mulukwaanyu, mwiiwe nsunawe mumvarexexaka Yooworu. Vanonto Yave ti okumaahu ni Owo onoowaandyeererani iyaakha mweelaponi aaroromelinghaawe ni nlipelo waavaha makholowaanyu Abrahaamu, Isaki ni Yakobe.”