Deuteronomiyo 29 - Emakhuwa Bible

¹ Ti seiya sootthuneya sa wiiraana Yave aamulamulenlaawe Moisesi waapakela aYixrayeli oMowabe ohiya wiiraana aapakenlaawe oHorebi.

Orehererela wiiraana oMowabe

² Moisesi aawiitthana aYixrayeli ootheene anaweerela: “Mwaahoona ni maithwaanyu sootheene Yave aampakenlaawe Farawu* wExipitu ni wa asitokweenaawe ni elapwaawe yootheene.

³ Mwaahoona ni maithwaanyu woota murima otokotoko iwe ni ineneero sootikhiniheya sitokotoko.

⁴ Wa soothesene, mpaka olelo Yave khoovangheni soowuupuwela siniiwexexa hata maitho anoona naari maaru aniiwa.

⁵ Wa iyaakha miloko mixexe Miyo kooweettihani munikareni soowarasanyu ni ikwakwaattasanyu sihithaalaka.

⁶ Khamwaaca yooca naari khamwaawura eviinyu hata soowura sikina soohapala. Kipakenle yeeyo weera musuwele weera Miyo ti Yave Mulukwaanyu.

⁷ Mphiyakaru nipuro nna, Sihoni, mwene a Hexeboni ni Ogi, mwene a oBaxani yaanaattamela weera eniwaneno, mene hiyo naahaawinasa.

⁸ Naakuxa elapwaaya, nnaavaha aRubeni, aGadi ni eriyari ya epuumba ya Manaxe ntoko yoohiyeriwa.

⁹ Mutthariheke oororomeleyeene sootthuneya sa wiiraana wu weera itthu siweetteleni nnenesene mwa sootheene muneeraanyu mpake.

¹⁰ Olelo nyuwosa ootheene muri vamaithoni wa Yave Mulukwaanyu – mapwattapwatthaanyu ni asilopwana oothanliwa; ahooleelaanyu ni yaawo anoolamulani nitho aYixrayeli akinaawo

¹¹ vamoha ni anamwaniinyu ni axaarinyu ootheene mpaka anamarwa ankhala mukonenlaanyumo, mwa yaawosa anoothikilelani ikhuuni ni yoorikelakani maahi.

¹² Muri va weera mvolowase ngwiiraanani ni Yave Mulukwaanyu; wiiraanawene weiwo Owo ompakaawe olelo ni nyuwosa ni nlipelo.

¹³ Owo ontthuna weera nyuwo mukhale mulokwaawe ni Owo akhale Mulukwaanyu, ntoko aaroromelinghaawe makholowaanyu Abrahaamu, Isaki ni Yakobe.

¹⁴ Wiiraana wu ni nlipelo nkinoopakelani nyuwo paahi,

¹⁵ muri va ni hiyo vamaithoni wa Yave Mulukwaahu, menetho yaawo ahikhanle ni hiyo va olelo.

¹⁶ Nyuwosa asineenaanyu moosuwela moota naakhalaahu wExipitu ni moota niviravinraahu miloko soohiyanahiyana mpaka ophiya va.

¹⁷ Mwaahoona mmilokoni mmwe icaambulosaya sa mwiikho soopakiwa ni nyiri, maluku, eparatha* ni eyuuma yoorikaxa.

¹⁸ Nnene weera ahikhale anaaphwanyaneye mwa nyuwo mulopwana hoye hoye muthiyana, nihimo naari epuumba anuupuwelele omuhiya Yave Mulukwaahu, alapaka miluku sa miloko iye. Ahiphwanyaneyeru eriyaraanyu mmoha onkhala ntoko mkwankhwaari mmoha omphuwa soowaawa ni soohapala.

¹⁹ Mutthu ntoko owo, iiwaka masu a nlipelo nna, oniiruuhela nreeliho, eeraka: “Koolipa orookhalaru weera kintthara murimaaka.” Eyo eniiruuhele nttaruxo elapo yoonaanela mpaka yoowuumeene.

²⁰ Yave kharwa amuleveleela; isarasawe ni ehacaawe sinoompattela mutthweene yoowo. Malapho ootheene alempwale mulivurunimu anoommorela ni Yave onoocipiha Nsinanawe mweelaponi.

²¹ Yave onoommwalamwaliha variyari wa ipuumba sootheene sa aYixrayeli weera ahaawe otakhaliwa etthariheyaka malapho ootheene a wiiraana alempwale mulivuruni ela ya Nlamulo.

²² Anamwaniinyu ni ikhapirasanyu ni anamarwa anrweela ilapo soorakamela eniyoone irisa sineera simorele mweelaponi ni moota Yave aneeraawe aruuhele iretta.

²³ Elapo yootheene eniikhuneeleye ni maakha, enxofre* ni itthu soohisiwa moota wooweera waala etthu woohimela, kheewo eneera yunnuwewo. Onuukhale ntoko ophwatiwa wa oSodoma ni oGomora, wAdema ni oZeboyimi mwa seiye Yave aaphwantaawe oonyoonyiweene ni isara.

²⁴ Miloko sootheene nsikohe: “Yave opakenle heeni hiiha elapo ela? Onyoonyiwa moota heeni wuuwu ni isara iya?”

²⁵ Vano yoowaakhula eniikhale ela: “Ti niwoko muloko ola woohiya wiiraana wa Yave, Muluku a makholowaaya, wiiraanawene weiwe aapakenlaawe aakhumihaleene wExipitu.

²⁶ Awosa aalapa miluku sikina ekokhorelaka seiyo; miluku yahaasuwenlaaya khalayi, mwa seiye Yave aahiihalaawe olapa.

²⁷ Tivawo isara sa Yave siluttuwenlaaya elapo ela moota wooweera owo ooruuhela malapho ootheene alempwale mulivuruni ela.

²⁸ Oosareyeene isara, ooriipiweene ni onyoonyaxiwa, Yave oowoomolasa mweelaponimwaya, anaavonyera elapo ekina, ntoko onooneyaaya olelo.”

²⁹ Itthu sa wiiphiini ti sa Yave Mulukwaahu, mene itthu soothupululeya ti sawihu ni anamwaniihu wa mahuku ootheene weera niiwelele masu ootheene a malamulo ala.