Deuteronomiyo 28 - Emakhuwa Bible

Mareeliho a wiiwelela

¹ Nyuwosa mwamwiiwelela oororomeleyeene Yave Mulukwaanyu muttharaka malamulo ootheene kinoovahakani olelo, Owo onimoowelihaxani opwaha miloko sootheene sa elapo ya vathi.

² Mwamwiiwelela Yave Mulukwaanyu, mareeliho ootheene awo animoorweelasani yoohoolelakani:

³ Munooreelihiwa musidadeni ni mmatta.

⁴ Anamwaniinyu eniireelihiwe, hiihotho soohepha sa imattasanyu ni sikhaani sa mihuwosanyu – axaana a imombesanyu ni iputtiputthi sa ikhondoolosanyu.

⁵ Sinooreelihiwa mipaparasanyu ni muneetheyaanyumo etrigu.

⁶ Munooreelihiwa mwa sootheene muneeraanyu mpake.

⁷ Yave onimoowinelani mwa amwiittana eniyoowananeni. Awo eniyoorweelaseni mphironi, mene khula mutthu anaatthawele mpattaawe.

⁸ Yave onooreeliha matathaanyu ni sootheene muneeraanyu mpake. Owo onimooreelihani mweelaponi onoovahaaweni.

⁹ Yave onimookhalihani mulokwaawe wootteela, ntoko oororomelinghaaweni ni nlipelo, nyuwosa mwiiwelela malamulowaawe ni mwatthara ephirowaawe.

¹⁰ Vano miloko sootheene sa mulaponi nsoone weera nyuwo ti a Yave ni nseereke owoovani.

¹¹ Owo onooweettiherelani nnene oovahakani anamwane, axaana a mihuwosanyu ni soohepha mweelaponi aaroromelinghaawe makholowaanyu woovahani.

¹² Yave onoohula erimu, woothokororawo muhakhwaawe weera arumihele epula elapwaanyu mweehuhuni yootthuneya ni weera areelihe mitekosanyu sootheene. Nyuwosa munookoongoriha miloko sincipale ni kheewo muneeraanyu moolihase.

¹³ Mwiiwa nnenesene malamulo a Yave Mulukwaanyu kinoovahaakani olelo ni mwatthara yaawo, nyuwosa munookhala muru wa miloko ohikhanle ekholo; munookhala vasulu ohikhanle vathi.

¹⁴ Muhihapuweru nakhalaru nlamulo kinoovahaakani olelo muttharaka miluku sikina ni murumeelaka.

Soowoopiha sa ettiyamaaru

¹⁵ Wa soothesene, yuwosa mwaahimwiiwelela Yave Mulukwaanyu muhittharaka malamulowaawe ni ikanosawe sootheene kinoovahaakani olelo, vano malapho ootheene eniyoomoreleni ti ala:

¹⁶ Munoolaphiwa musidadeni ni mmatta.

¹⁷ Sinoolaphiwa mipaparasanyu ni muneetheyaanyumo etrigu.

¹⁸ Anoolaphiwa anamwaniinyu, hiihotho soohephasanyu, axaana a imombesanyu ni a ikhondoolosanyu.

¹⁹ Munoolaphiwa mwa soothesene, muneeraanyu mpake.

²⁰ Yave onimoorumihelasani malapho ohiiwanana ni opwapwelana mwa sootheene muneeraanyu mpake mpaka muneeraanyu mphwatiwe muhaawaka wootutuxereya niwoko na yoonanara mpankaanyu woomuttiwala Yoowo.

²¹ Yave onimoorumihelasani mahooxo a iretta mpaka ophwatiwawanyu mweelaponi muneeraanyu mwavolowe weera mwakuxe.

²² Yave onimoorumihelasani ikwerere soohonona, xipwexa soowiipaipa, ovihaxa mpaka ohaawela maahi iretta sa irooro, mwa seiyo sineera soohooxaseni mpaka ophwatiwawanyu.

²³ Erimu eniikhale ebronze* vasuluwanyu ni etthaya ntoko eyuuma vathivanyu.

²⁴ Yave onootatuxa epula ettuura ni ntthupi mmamattanimanyu, mwa nenno nneera nirweele wiirimu mpaka ophwatiwawanyu.

²⁵ Yave onimoopakihani weera nyuwo ngwiniwe ni amwiittanaanyu. Nyuwosa mmwaarowele ephiro emoharu, mene mmwaamwareye, soottiihakani iphumu imwene sootheene sa elapo ya vathi.

²⁶ Mittembosanyu nsikhale yooca ya apalame ootheene ni ya asinama ooluwa a ntuphini, ahikhalaka oowoomolela.

²⁷ Yave onimoohooxani ni anamukoxo a wExipitu, anantthweenye, makwatta a ithuku ni ovele mwa yoowo oneera wookelani, ohinalameya.

²⁸ Owo onimoohooxani ni anepa, ohoona ni ohicela muru.

²⁹ Nyuwo mmweereke waapapela mukhwipi othana eriyari, ntoko oohoona areene mpiphini. Khasiweettelani nnene sootheene muneeraanyu mpake. Khula nihuku mmweereke ohooxiwa ni wiiyeriwa ahikhalaka oowootapuxani.

³⁰ Nyuwo mmuure, mene muthiyana owo anaatheliwe ni mulopwana mukina. Mmwiteke empa, mene khamukhalamo. Mmwiphattheiye ematta ya iwuuva*, mene khamulawiha yoowiimaaya.

³¹ Emombaanyu elopwana eniyiiviwe vamaithoniwanyu, mene khamukhuuraru. Buurwaanyu mmwaakhiwe ni khamuhokoloxeriwa. Ikhondoolosanyu eniivahiwe amwiittananaanyu ahikhalaka ootapuxa.

³² Anamwaniinyu asilopwana ni asithiyana eniivahereriwe wa miloko sikina ni mmwikhulumuwase waaweherera khula nihuku muhiweraka waahokoloxa.

³³ Muloko muhisuwenlaanyu onuuce sooruwera sa elapwaanyu ni mitekosanyu sootheene ni nyuwosa mmwihasuliwe woonanara mahuku ootheene.

³⁴ Nsookhwiiheni anepa seiyo muneeraanyu moone.

³⁵ Yave onimoovulalihani ni anantthweenye mmakuthani ni imettoni; makhwatta matokotoko oohivola erutthu yootheene.

³⁶ Yave onimooronghani nyuwo ni mwene munthanlalaanyu woolamulani mmulokoni muhisuwenlaanyu nyuwo ni makholowaanyu. Weiwo mmwalape miluku sikina sipakiwe sa nyiri ni maluku.

³⁷ Mmwikhale oottiyeya iphumu, ootthebwiwa ni ootheiwa wa miloko sootheene weiwo aneerawe oorongheni Yave.

³⁸ Mmwaalaxe, mene mmwahephe vakhaanixa, niwoko nasope anaahaleele omaliha.

³⁹ Mmwaphatteye imatta sa iwuuva* mulimelaka, mene khamuwura eviinyuwaaya naari khamuhepha iwuuvasaya niwoko nsiwenyiwe ni nyuungu.

⁴⁰ Mmwikhalane nyiri sa sooliveira* mweelaponimwanyu moothemwene, mene nyuwosa asineenaanyu khamvarela muteko makhura niwoko soowiimasaya nsikhale miloloru.

⁴¹ Mmwaayare anamwane asilopwana ni asithiyana, mene awo kheekhala ni nyuwo, niwoko eniitthukasiwe.

⁴² Nasope anaakamele nyirisanyu sootheene mphatteiyaanyu mulaponimwanyu.

⁴³ Anamarwa ankhala variyariwanyu eniyoovikaneni khula emaara, mene nyuwosa mmwivikaneye.

⁴⁴ Awo eniyookoongoriheni itthu, mene nyuwo khamwaakoongoriha. Awo ti eniikhale muru, nyuwosa mukhalaka ekholo.

⁴⁵ Malapho ootheenaawo eniyoomorelaseni. Awosa eniyoottharelelaseni ni eniyoophwanyaseni mpaka muneeraanyu mphwatiwe, niwoko na ohimwiiwelela Yave Mulukwaanyu hata oheettela malamulo ni ikano oovanghaaweni.

⁴⁶ Malapho awo eniikhale eneneero ni woopereriwawanyu nyuwo ni ekhapiraanyuweene ya muhoolo wa mahuku ootheene.

⁴⁷ Mweenre muhimurumeelaka ni otthapa munghakalalelaka Yave Mulukwaanyu mweehuhuni saaweettelaayani nnene,

⁴⁸ vano nyuwosa mmwaarumeelase amwiittana aneeraawe oorumiheleni Yave, nyuwosa mureene mutalani ni muntthonani, moosiwani ni oohaawaxa. Owo anaahele nivatta na eyuuma muxikomwanyu mpaka aneeraawe oophwateeni.

⁴⁹ Yave anootannyereleni muloko wa ottai weera woorweelaseni ntoko xaaka atthunaka ovara; muloko muneeraanyu muhiiweke nuulumonaya.

⁵⁰ Onuukhale muloko wooluwa ohinaattittimiha mamookwaaxa hata ohinaamorela ikharari amiravo.

⁵¹ Oniwaamalihe axaana a mihuwosanyu ni sooruwera sa mulaponimwanyu mpaka muneeraanyu mphwatiwe. Awosa khayoohiyeraniru etrigu, eviinyu enyowani hoye hoye makhura naari axaana a imombe hata iputtiputthi sa ikhondoolosanyu mpaka muneeraanyu muhononiwe.

⁵² Awosa eniirice isidade sootheene sa mweelaponimwanyu mpaka sineeraaya sipittuwe ixiri soorakamela soolipihiwa, mwa seiyo munroromenlaanyu. Eniirice isidade sootheene mweelaponimwanyu moothemwene Yave Mulukwaanyu onoovahaaweni.

⁵³ Mmweereke waakhuura anamwaniinyu asilopwanya ni asithiyana Yave Mulukwaanyu onoovahaaweni niwoko na ohaawa wa ohooxiwawanyu moota muneeraanyu mwaamelelihiwe ni amwiittanaanyu.

⁵⁴ Hata ooleeleya variyariwanyu khammorela ikharari munneiye naari mwaariye onimusivelaawe hata anamwane eniihale ni okumi,

⁵⁵ moota wooweera khaawo aneeraawe amvaheru enama ya anamwanaawe onkhuuraawe. Khayaahaleelaru niwoko na mahooxo amwiittanaanyu eneeraaya yootannyereni mpuwa mooriciwani isidadesanyu sootheene.

⁵⁶ Muthiyana ooleeleya ni a emutthu variyariwanyu – yoowo aahaamutannyaru mukina – anaawehe aahovelaka aiyawe onaasivelaawe nitho anamwanaawe.

⁵⁷ Aniipithihe nrupo na vantekhuni ni mwaana a mwiiruuni weera akhuure meekhaawe ehuhu ya oriciwa niwoko na mahooxo amwiittanaanyu eneeraaya etannyere mmasidadenimwanyu.

⁵⁸ Nyuwosa mwaaheettela oororomeleyeene masu ootheene a Nlamulo nna alempwale mulivurunimu muhittittimihaka Nsina nna noovuwaxa ni noowoopiha, eyo tiiyo Yave Mulukwaanyu,

⁵⁹ Owo onimoorumihelani mahooxo oowoopiha nyuwosa ni ekhapiraanyu, irisa soowoopihaxa soopwaherera ni iretta sootepaxa naweiwo.

⁶⁰ Yave onimoorumihelasani iretta soowoopiha sootheene sa wExipitu ni iyo nsookeleeni.

⁶¹ Owo onimoorumihelanitho moota wootheene wa ikwerere ni irisa soohiyanahiyana sihilempwe mulivuruni ela ya Nlamulo mpaka muneeraanyu mphwatiwe.

⁶² Nyuwosa khalayi mwahaareere waatta ntoko ithenyeeri sa wiirimu mmwivukuwase muhalaka vakhaani niwoko na ohimwiiwelela Yave Mulukwaanyu.

⁶³ Mooteene yoowo waamusivenlaaya Yave aweettiherelakani nnene ni awaattihakani, onoomusivelatho woophwatani ni woohelani nthala. Nyuwosa mmwaakhiwe elapo muneeraanyu mwavolowe weera mwakuxe.

⁶⁴ Vano Yave onimoomwaraxelani mmilokoni sa mipatta sootheene sa elapo. Weiwo mmwalape miluku sikina sipakiwe sa mwiri ni maluku mwa seiyo nyuwosa hata makholowaanyu mwahaasuwenlaanyu.

⁶⁵ Mmilokoni mmo nyuwosa khammumulela hata khamphwanya nipuro noowiitthuuwiha inaawosanyu. Iwo Yave onimoovahani murima woohiweherera, maitho oosareya othanana ni okumi woovalaveleya.

⁶⁶ Mahuku ootheene mmwikhale moohovelani, oothananaxeene othana ni ohiyu, muhisuwelaka eniyookhumeleleni.

⁶⁷ Oxeexelo mmweereke: “Eya! Fataari waari ohiyu!” ni ohiyu: “Eya! Fataari waari othana!” niwoko na woova oniwoosareyeni vamurimani ni seiyo muneeraanyu moone.

⁶⁸ Yave onimoohokoloxerani wExipitu mmakulani mphironi kaaweerenlaakani weera khamviratho. Iwo mmwathumihiwewo ntoko ipottha ilopwana ni ithiyana, mene khaawo eniyoothumeeni.’