Deuteronomiyo 26 - Emakhuwa Bible

Soowiima soopacera ni mpatta wanaamuloko

¹ Mwaavolowaka elapo Yave Mulukwaanyu onoovahaaweni ntoko yoohiyeriwa ni munakuxa mwiitekihakawo,

² mwarukule soowiima soopacera sikina sikina sootheene muneeraanyu mwaruwere mweelaponi Yave Mulukwaanyu onoovahaaweni ni mwaheleke sootheene mumpaparani. Vahoolowaya mwarowaseke vanipuroni Yave Mulukwaanyu aneeraawe athanle ntoko woomakawo Nsinanawe.

³ Mwamweerele musaserdoti* anaarumeele ehuhuweene yeeyo: “Miyo kinghima olelo vamaithoni wa Yave Mulukwaanyu weera kohoorwa elapo Yave aaroromelinghaawe ni nlipelo makholowaahu weera aannivaha.”

⁴ Musaserdoti* awaakhelelekeni mpapara ikaathiki ohoolo wa altaari* a Yave Mulukwaanyu.

⁵ Vano mweeraseke vamaithoni wa Yave Mulukwaanyu: “Atithaka yaari ngwArami ooweetteetta, enarowa wExipitu ni atthu akina vakhaani, enamakawo ethatuwaka muloko mutokotoko, woolipaxa ni woowaattaxa.

⁶ Wa soothesene, awExipitu yaanipakela yoonanara enihasulaka ni enivarihaka miteko soovihaxa.

⁷ Vano naamukhuwelelatho Yave, Muluku a makholowaahu ni Owo aahiiwa maswaahu anoona ohasuwawahu, mitekosahu soovihaxa ni ohaawawahu.

⁸ Tivawo Yave aanikhumihalaawe wExipitu ni ntata nooweraxa ni moono woolipaxa apakaka miteko soowoopihaxa ni ineneero sootikhiniheyaxa.

⁹ Ooniruuha nipuro nna anivahaka elapo ela, elapo yoosareya mukaka ni oravo.

¹⁰ Vanonto miyo kinruuha soowiima soopacera sa vathi Nyuwo Yave mukivanghaanyu.” Mwiikaathi mpapara vamaithoni wa Yave Mulukwaanyu ni mwamukokhorele.

¹¹ Nyuwo, aLeevi ni anamarwa variyariwanyu muhakalalele itthu sooreera sootheene Yave Mulukwaanyu oovanghaaweni nyuwo ni emusaanyu.

¹² Mwaavahaka mpatta wanaamuloko wa soothesene, munruweraanyu khula eyaakha yanaararu, eyo tiiyo eyaakha ya sanaamuloko, mmwinnyerereke muLeevi, namarwa, mukwaasuni ni naamukhweli weera awo ecaase mmasidadenimwanyu mpaka ovona.

¹³ Vahoolowaya mwamweerele Yave Mulukwaanyu: “Kookuxa owannyaka mpatta wootteeliheriwa kinamvaha muLeevi, namarwa, mukwaasuni ni naamukhweli kittharihaka sootheene mukilamulenlaanyu. Kohiiwelela malamulowaanyu kihittiwalaka hata nimoha a yaawo.

¹⁴ Nkiciiyeru mpatta wootteeliheriwa kiinanelaka naari nkivenxaleru kireene oohitteela hata nkaavangheru anamakhwa ntoko sooveleela. Koomwiiwelela Yave Mulukwaaka; koopaka sootheene mukilamulenlaanyu.

¹⁵ Wiirimu iwo, ngwehe vaNipuroniwanyu Nootteela* ni mureelihe mulokwaanyu aYixrayeli ni elapo munivanghaanyu ntoko mwaaroromelinghaanyu ni nlipelo makholowaahu, elapo yoosareya mukaka ni oravo.”

Soolipiheriwa soomalihera

¹⁶ Yave Mulukwaanyu onoolamulelani olelo wiiwelela ikano ni malamulo ala; mutthareke nnenesene ni murimaanyu ni okumaahu wootheene.

¹⁷ Nyuwosa olelo mohiiwa weera Yave ti Mulukwaanyu ni weera mmweettase mphironimwawe mwiiwelelaka ikano, malamulo ni soorumasawe ni weera munoomwiiwelela.

¹⁸ Olelo Yave oohimatho weera nyuwo ti mulokwaawe xaxaxa ntoko Owo aaroromelinghaawe ni weera nyuwosa mwiiwelelaseke malamulowaawe ootheene.

¹⁹ Owo oohima weera onimoowelihani moovuwani epiili ni nttittimiho ntokotoko opwaha miloko sootheene opankaawe. Mmwikhale muloko wootteeliheriwa Yave Mulukwaanyu, ntoko aaroromelinghaawe.