Deuteronomiyo 24 - Emakhuwa Bible

Ikano mwaha wa othela ni omwalana

¹ Mulopwana amuthela muthiyana ahinamutthunatho niwoko noophwanya ohintthunaawe mookumini mwa muthiyana owo, mulopwana owo amvaheke ekaratta ya omwalana ni amoomoleke.

² Vano, muthiyana owo avennyeene vaate wa mulopwana oopacera, onootthuniheriwa otheliwa ni mulopwana mukina.

³ Wakhala weera aiyawe anaaveeli khaanimutthuna emvahaka ekaratta ya omwalana enamoomola hoye hoye mulopwana owo anaaveeli akhwa,

⁴ vano opacenre omuhiya ahimutheletho niwoko wa yoowo muthiyana owo ti oohitteelaawe. Amuthela, eyo eniikhale ya mwiikho vamaithoni wa Yave Mulukwaanyu. Muhitthekihe elapo Yave Mulukwaanyu onoovahaaweni ntoko yoohiyeriwa.

⁵ Mulopwana athela vaanaanoru, ahirumihiwe okhottoni naari ahilamuliwe ovara muteko mukina. Owo akhaleke owaani eyaakheene yeeyo ootaphuweene amuhakalalihaka mwaarawe.

⁶ Muhikuxe nxilo hoye hoye namaha ntoko yooweemexera, niwoko mummwaakha mpatta wa okumaawe.

⁷ Mukina aphwanyiwa amvaraka munneiye muYixrayeli weera angwinele amuthumihaka ntoko epottha, namavara owo iiviweke. Mmalihe yoonanara ela variyariwanyu.

⁸ Mwaha wa iretta sa makokho, mwiipasoope weera mpake nnenesene yeeyo asaserdoti* ari aLeevi eneeraaya yoolamuleleni. Mwiiwelele nnenesene yeeyo kaalamulenlaaka.

⁹ Muupuwelele yeeyo Yave Mulukwaanyu aampakenlaawe Miriyami mphironi mukhumaleene wExipitu.

¹⁰ Mmoha a nyuwo amooliha mukhwaawe yakhalaru etthu, ahivolowe mpaanimwawe iikuxeraka yooweemexera.

¹¹ Mukhaleke vaate ni munghiyeke yoowo mmoolinghaanyu ooruuhelakani yooweemexera.

¹² Mulopwana owo akhala oohaawa, yooweemexeraawe ehikone owannyinyu.

¹³ Munghokoloxere mukaandyowaawe wiilaka weera iikhuneeleno aakonaka. Hiiho owo onimoothamalani ni eyo eniikhale etthu yoowaakhuleleya wa Muluku.

¹⁴ Muhimuhasule namutekwaanyu oohaawaxa, akhalaka munninyu muYixrayeli hoye hoye namarwa onkhala mmasidadenimwanyu hoye hoye mulaponimwanyu.

¹⁵ Munlive khula nihuku ohinaaye wiila, niwoko owo namahaawa onkhalela yeeyo. Ohiyanawaya, owo onoomudyoonttelela Yave niwoko na nyuwo ni hiiho nyuwo munookhalano nthowa na yoottheka.

¹⁶ Muhiwiive asitiithi niwoko na soottheka sa anamwanaaya naari anamwane niwoko na soottheka sa atithaya. Khula mutthu iiviweke niwoko na sootthekasawe muneenaawe.

¹⁷ Muhivirikanyihe ekhaikhai mwaathorihaka anamarwa hoye hoye akwaasuni naari muhikuxe mukaandyo wa naamukhweli ntoko yooweemexera.

¹⁸ Muupuwelele weera mwaari ipottha wExipitu ni weera Yave Mulukwaanyu oowoopolaniwo. Tivawo kinoolamulelaakani opaka yeeyo.

¹⁹ Mwaahephaka munahiya ottuli ehara emoha, muhihokoleele okuxa. Munghiyere namarwa, mukwaasuni ni naamukhweli weera Yave Mulukwaanyu areelihe mitekosanyu sootheene.

²⁰ Mwaapukunyaka soowiima sa makhura a sooliveira*, muhipukunye veeli. Singhala munghiyereke namarwa, mukwaasuni ni naamukhweli.

²¹ Mwaahephaka iwuuvasanyu, muhihokoleeletho. Singhala munghiyereke namarwa, mukwaasuni ni naamukhweli.

²² Muupuwelele weera mwaari ipottha wExipitu. Tivawo kinoolamulelaakani opaka yeeyo.