Deuteronomiyo 22 - Emakhuwa Bible

¹ Mwaphwanya emombe hoye hoye ekhondoolo ya munninyu eriheiyeene, mpwatthe muupuwelaka omuronghela muneene.

² Munna owo aahikhala vakhiviruwanyu hoye hoye mwaahimusuwela, mukuxe eyo muroweno owannyinyu, mwiikaathi munikhoolani mpaka aneeraawe arwe munninyu aasaasaka. Vano mmwinnyerere.

³ Mpake mooteene yoowo mwamphwanya buuru, mukaandyo naari yakhalaru etthu eriheiye ya munninyu. Mpwattheke.

⁴ Nyuwosa mwamoona buuru hoye hoye emombe ya munninyu emorenleene mphironi, mpwattheke. Mukhavihere weemela.

⁵ Muthiyana ahiware soowara sa elopwana naari mulopwana sa ethiyana, niwoko Yave Mulukwaanyu onimuthanya yoole ompaka yeeyo.

⁶ Mwavira eraayawo epuuru ya mwaapalame, mmwirini hoye hoye vathi, ni naangolo aapuramenleene axaanaawe hoye hoye moocaawe, muhimwaavule ni axaaneene.

⁷ Ngwaavule axaana, mene munghiyeke naangolo arowaka weera sootheene siweetteleni nnenesene ni owaatteleni okumi.

⁸ Mwaatekaka empa enyowani, mutekelele mukhwipi wa nipatho weera muhiruuhele nthowa vaatewanyu wooyeeheya ephome akhala mukina anaamore vanipathoni.

⁹ Muhaale mmattamwanyu mwa iwuuva* moota miili wa mmiso. Mwaala, soohepha ni soowiima sa emattaanyu ya iwuuva* sinoovaliheya.

¹⁰ Muhittipure ni emombe elopwana ni buuru soopiili vamoha.

¹¹ Muhiware soowara sa mapururu a ikhondoolo ootakansiwa ni nliinya ekuwo emoharu yeeyo.

¹² Muhele icikwaitti mmaloothoni maxexe a yoowiikhuneelaanyu.

Ikano mwaha wa ntheli

¹³ Mulopwana athela ni akonneene ni muthiyana aahimutthuna,

¹⁴ amuulumelaka soonanara, amwaaluxaka eeraka: “Koomuthela muthiyana ola, mene kimukonanakaru, kohoonelela weera aari oohiikosoopa.”

¹⁵ Mwa yeeyo atithawe ni amayawe muthiyana owo yaarongheleke asitokweene a vamulako wa esidade eneneero enaakhulela wiikosoopawawe.

¹⁶ Tiithi a muthiyana owo aweereleke ahooleli: “Mulopwana ola koomutheliha mwanaka, mene khanimutthuna.

¹⁷ Vano owo oomwaaluxa eeraka: ‘Kohoonelela weera mwaninyu khiikosoompe.’ Vaheera eneneeroweene ela enaakhulela wiikosoopa wa mwanaka.” Vahoolowaya asinaangolowaawe ewoonihereke ahooleli a esidade eneneero ya waakhuleleya wa wiikosoopawawe.

¹⁸ Vanonto ahooleli emuttaruxeke mulopwana owo

¹⁹ ni nlivo na ixekeli* ncira sa eparatha* weera evahiwe atithawe muthiyana owo, niwoko mulopwana owo oomwaaluxa mwaamwali a muloko wa aYixrayeli. Muthiyana owo apwaherereke okhala mwaariye; mulopwana ahimwalanekeno wa mahuku ootheene.

²⁰ Wa soothesene, yoowootheriwaawe yakhala ya ekhaikhai waakhuleleyaka weera mwaamwali owo khiikosoompe,

²¹ vano aronghiweke vamulako wa vaate wa atithawe ni asilopwana a esidadeene yeeyo emvonyaseke maluku mpaka okhwa. Owo oopaka yoowuuliha muru oYixrayeli wooraruwa areene vaate wa atithawe. Mmalihe yoonanara variyariwanyu.

²² Mulopwana aphwanyeriwa araruwaka ni mwaara a muneene, ooweeli awo yiiviweke. Mmalihe yoonanara variyariwanyu.

²³ Esidade emoha aphwanyeriwa mulopwana araruwakano mwaamwali oowiikosoopa ootthomeriweene,

²⁴ mwaaronghase ooweeli vamulako wa esidade eyo ni mwaavonyase maluku mpaka okhwa. Mwaamwali oowiikosoopa iiviweke niwoko aari musidadeni, mene khaakhuwenle avekelaka ekhavihero; ni mulopwana owo niwoko oomveihera mwaara a mukina. Mmalihe yoonanara variyariwanyu.

²⁵ Vaheera mulopwana amphwanya mwaamwali oowiikosoopa ootthomeriwa ntuphini, anamvarela, mulopwana paahi iiviweke.

²⁶ Muhimpakele etthu mwaamwali owo, niwoko owo kheewo opankaawe yoophwanela okhwa. Mulattu owo onlikana ni yoole onimutuphela mukhwaawe, anamwiiva.

²⁷ Mulopwana owo omphwannye mwaamwali oowiikosoopa ntuphini ni hata owo aakhuwenle, khaawo yeera emukhavihere.

²⁸ Mulopwana akumana ni mwaamwali oowiikosoopa oohitthomeriwa, anamukoniha, enaphwanyerasiwa,

²⁹ owo aaliveke atithawe mwaamwali oowiikosoopa ixekeli* miloko mithanu sa eparatha* ni amutheleke mwaamwali, niwoko na omveiha. Ahimwalaneru.

³⁰ Ahikhaleru mulopwana anaathele amwaara a atithawe niwoko onooveiha etthoko ya atithwawe.